تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد ميل الخط المستقيم

أحمد مدحت

المستقيم ﺃﺏ يوازي محور السينات. إذا كانت إحداثيات النقطتين ﺃ، ﺏ هي (٧، −٢)، (−٧، ﻙ) على الترتيب، فأوجد قيمة ﻙ.

٠٢:٠٩

‏نسخة الفيديو النصية

عندنا في المثال، المستقيم أ ب يوازي محور السينات. فإذا كانت إحداثيات النقطتين أ وَ ب هي: سبعة وسالب اتنين، وسالب سبعة وَ ك، على الترتيب، عايزين نوجد قيمة ك.

إحنا عندنا في المثال، المستقيم أ ب يوازي محور السينات. ولو عندنا خطين مستقيمين متوازيين، فالميلين بتوعهم هيكونوا متساويين؛ وده معناه، بما إن المستقيم أ ب يوازي محور السينات، هيبقى ميل المستقيم أ ب يساوي ميل محور السينات. وبما إن محور السينات خط أفقي، فبالتالي ميل محور السينات يساوي صفر. وبما إن ميل المستقيم أ ب يساوي ميل محور السينات، فمعنى كده إن هيبقى ميل المستقيم أ ب يساوي صفر برضو. وإحنا عندنا إن صيغة الميل اللي بنرمز له بالرمز م للخط المستقيم المارّ بالنقطتين: س واحد وَ ص واحد، وَ س اتنين وَ ص اتنين؛ هي م تساوي ص اتنين ناقص ص واحد، على س اتنين ناقص س واحد؛ حيث م هي ميل الخط المستقيم، فإحنا هنستخدم الحقيقة دي علشان نوجد قيمة ك.

فهنفرض إن النقطة س واحد وَ ص واحد هي النقطة سبعة وسالب اتنين، ‏والنقطة س اتنين وَ ص اتنين هي النقطة سالب سبعة وَ ك. وإحنا وصلنا إن ميل المستقيم أ ب يساوي صفر، فهنعوّض في صيغة الميل للخط المستقيم عن م بصفر، وعن س واحد بسبعة، وعن ص واحد بسالب اتنين، وعن س اتنين بسالب سبعة، وعن ص اتنين بـ ك. فهيبقى عندنا صفر يساوي ك ناقص سالب اتنين، على سالب سبعة ناقص سبعة، يعني صفر يساوي ك زائد اتنين، على سالب أربعتاشر، فهنحل المعادلة دي علشان نوجد قيمة ك.

فإحنا عندنا مقام هو سالب أربعتاشر، وهنتخلّص منه من خلال إن إحنا نضرب طرفَي المعادلة اللي عندنا دي في سالب أربعتاشر؛ فهيبقى عندنا صفر في سالب أربعتاشر يساوي ك زائد اتنين، وصفر في سالب أربعتاشر يساوي صفر، يعني هيبقى عندنا صفر يساوي ك زائد اتنين.

بعد كده هنطرح من طرفَي المعادلة دي اتنين؛ فهيبقى عندنا سالب اتنين يساوي ك، يعني ك تساوي سالب اتنين. يعني قيمة ك تساوي سالب اتنين، وبكده يبقى إحنا أوجدنا قيمة ك.