نسخة الفيديو النصية
سجل مدرب فريق كرة السلة في إحدى المدارس الأهداف التي أحرزها ثلاثة لاعبين في بطولة المدرسة كالآتي؛ عزت: لعب سبع مباريات، سدّد خمستاشر تسديدة، أحرز خمس أهداف. فاروق: لعب تلتاشر مباراة، سدد أربعة وعشرين تسديدة، أحرز تمن أهداف. بيشوي: لعب ستاشر مباراة، سدد تلاتة وعشرين تسديدة، أحرز تسعتاشر هدف.
رتّب هذه البيانات في مصفوفة، حيث إن المصفوفة تمثل اللاعبين تبعًا لأهدافهم من الأقل إلى الأكتر، والعمود الأول يمثل عدد المباريات، والعمود التاني يمثل عدد التسديدات، والعمود التالت يمثل عدد الأهداف.
معطى عندنا أربع اختيارات: أول اختيار إن المصفوفة تكون: الصف الأول سبعة خمستاشر خمسة، الصف التاني تلتاشر أربعة وعشرين تمنية، الصف التالت ستاشر تلاتة وعشرين تسعتاشر. والاختيار التاني المصفوفة هتكون: الصف الأول ستاشر تلاتة وعشرين تسعتاشر، الصف التاني تلتاشر أربعة وعشرين تمنية، الصف التالت سبعة خمستاشر خمسة. وتالت اختيار إن المصفوفة هتكون: الصف الأول سبعة خمستاشر خمسة، الصف التاني ستاشر تلاتة وعشرين تسعتاشر، الصف التالت تلتاشر أربعة وعشرين تمنية. والاختيار الرابع إن المصفوفة هتكون: الصف الأول سبعة خمستاشر خمسة، الصف التاني تلتاشر تلاتة وعشرين تمنية، الصف التالت ستاشر أربعة وعشرين تسعتاشر.
في البداية معطى إن عندنا تلات لاعبين عزت وفاروق وبيشوي. ومعطى إن عزت لعب سبع مباريات، وفاروق لعب تلتاشر مباراة، وبيشوي لعب ستاشر مباراة. ومعطى إن عزت سدّد خمستاشر تسديدة، وفاروق سدد أربعة وعشرين، تسديدة وبيشوي سدد تلاتة وعشرين تسديدة. ومعطى إن عزت أحرز خمس أهداف، وفاروق أحرز تمن أهداف، وبيشوي أحرز تسعتاشر هدف.
وبالتالي البيانات عندنا هتكون بالشكل ده، ولو عايزين نرتّب البيانات في مصفوفة فهيكون عندنا المصفوفة بالشكل ده، معطى إن الصفوف هتمثّل اللاعبين، وإن العمود الأول هيمثل عدد المباريات، والعمود التاني هيمثل عدد التسديدات، والعمود التالت هيمثل عدد الأهداف.
أول حاجة بالنسبة للصفوف اللي بتمثل اللاعبين، فهيكونوا مرتبين تبعًا لأهدافهم من الأقل إلى الأكتر، وهنلاحظ إن أقل عدد من الأهداف سجله اللاعب عزت وهم خمس أهداف؛ وبالتالي أول صف هيكون فيه بيانات اللاعب عزت، وتاني صف هيكون فيه بيانات اللاعب فاروق عشان اللاعب فاروق سجل أهداف أكتر من عزت وأقل من بيشوى، وبالتالي آخر صف هيكون فيه بيانات اللاعب بيشوي.
وبما إن أول عمود هيمثل عدد المباريات، فبالنسبة للاعب عزت اللي هنكتب بياناته في أول صف، لعب سبع مباريات؛ يعني عندنا في أول صف أول عمود هنكتب سبعة. وبالنسبة للاعب فاروق فلعب عدد مباريات تلتاشر مباراة؛ يعني في تاني صف أول عمود هنكتب تلتاشر. وبالنسبة للاعب بيشوي فلعب ستاشر مباراة؛ يعني في تالت صف أول عمود هنكتب ستاشر.
وبالنسبة لتاني عمود اللي بيمثّل عدد التسديدات؛ فبالنسبة للاعب عزت سدد خمستاشر تسديدة؛ يعني أول صف تاني عمود هنكتب خمستاشر. وبالنسبة للاعب فاروق فسدد أربعة وعشرين تسديدة؛ يعني تاني صف تاني عمود هنكتب أربعة وعشرين. وبالنسبة للاعب بيشوي فسدد تلاتة وعشرين تسديدة؛ يعني في تالت صف تاني عمود هنكتب تلاتة وعشرين.
وبما إن العمود التالت بيمثل عدد الأهداف؛ فاللاعب عزت سجل خمس أهداف؛ يعني في أول صف تالت عمود هنكتب خمسة. واللاعب بيشوي سجل تمن أهداف؛ يعني في تاني صف تالت عمود هنكتب تمنية. واللاعب فاروق سجل تسعتاشر هدف؛ يعني في تالت صف تالت عمود هنكتب تسعتاشر.
وبالتالي نكون قدرنا نكوّن المصفوفة، والمصفوفة هتكون: الصف الأول سبعة خمستاشر خمسة، الصف التاني تلتاشر أربعة وعشرين تمنية، الصف التالت ستاشر تلاتة وعشرين تسعتاشر.
