نسخة الفيديو النصية
عيّن مجال الدالة د س تساوي س تربيع ناقص ستاشر، على س زائد أربعة، ومداها.
مجال الدالة الكسرية مجموعة الأعداد الحقيقية ناقص مجموعة أصفار المقام. فنوجد أصفار المقام بإننا نساوي س زائد أربعة بالصفر، ونحاول نوجد قيمة الـ س.
نطرح أربعة من الطرفين فهتبقى س بتساوي سالب أربعة. يبقى مجال د س هيساوي ح ناقص مجموعة سالب أربعة.
بعد كده عشان نوجد مدى الدالة هنفترض إن س لا تساوي سالب أربعة. فهتبقى د س بتساوي س تربيع ناقص ستاشر، على س زائد أربعة. وممكن نكتبها بالصورة: س تربيع ناقص أربعة تربيع، على س زائد أربعة.
بالنظر للبسط هنلاقيه على صورة فرق بين مربعين. وفي حالة الفرق بين مربعين بيبقى أ تربيع ناقص ب تربيع بيساوي أ ناقص ب، في أ زائد ب.
يبقى ممكن نقول إن الدالة هتساوي س ناقص أربعة، في س زائد أربعة؛ الكل على س زائد أربعة. وباستخدام التبسيط الدالة هتساوي س ناقص أربعة.
بعد كده نوجد د سالب أربعة؛ يعني د س لمّا س بتساوي سالب أربعة. فده هيساوي سالب أربعة ناقص أربعة يعني هيساوي سالب تمنية. يبقى مدى الدالة د س هيساوي ح، يعني مجموعة الأعداد الحقيقية، ناقص مجموعة سالب تمنية.
