فيديو: تحديد المضاعفات المشتركة للأعداد حتى ٩

أوجد جميع المضاعفات المشتركة للأعداد ٢، ٤، ٩ حتى ٧٢.

٠٢:٥٦

‏نسخة الفيديو النصية

أوجد جميع المضاعفات المشتركة للأعداد اتنين، وأربعة، وتسعة، حتى اتنين وسبعين.

فيه طريقة ممكن نحل بيها السؤال ده، بإننا نوجد كل مضاعفات العدد اتنين لغاية اتنين وسبعين. وكل مضاعفات العدد أربعة برضو لغاية اتنين وسبعين. وكل مضاعفات العدد تسعة لغاية اتنين وسبعين. ونشوف بين مضاعفات التلات أعداد إيه المضاعفات المشتركة. بس ده هياخد مننا وقت ومجهود طويل. فهنحل بطريقة مختلفة، وهتبقى أقصر.

هنبدأ الأول بإيجاد مضاعفات العدد تسعة حتى اتنين وسبعين. مضاعفات العدد تسعة؛ أول حاجة هنحسابها كحاصل ضرب صفر في تسعة، يبقى أول مضاعف فيهم هيبقى صفر. المضاعف التالي هييجي من حاصل ضرب واحد في تسعة، اللي هو هيبقى تسعة. والمضاعف اللي بعد كده هييجي كحاصل ضرب اتنين في تسعة، اللي هو هيبقى تمنتاشر. والمضاعف اللي بعده هيبقى حاصل ضرب تلاتة في تسعة، اللي هو هيبقى سبعة وعشرين. وهنفضل نكمل بقية مضاعفات العدد تسعة بنفس الطريقة، لغاية ما نوصل للمضاعف اللي هو اتنين وسبعين. كده كتبنا كل مضاعفات العدد تسعة حتى اتنين وسبعين.

دلوقتي من بين مجموعة المضاعفات اللي حصلنا عليها دي، عايزين نشوف أيهم بيعتبر في نفس الوقت مضاعف من مضاعفات العدد اتنين. مضاعفات العدد اتنين هي أي أعداد زوجية هنلاقيها؛ يعني لو بصينا على مجموعة المضاعفات اللي قدامنا، هنعتبر صفر مضاعف من مضاعفات العدد اتنين. وتمنتاشر لأنه عدد زوجي. وستة وتلاتين من مضاعفات اتنين. وأربعة وخمسين هو برضو عدد زوجي فيعد من مضاعفات العدد اتنين. وبالمثل اتنين وسبعين.

يبقى الأعداد اللي رسمنا حواليها دواير، دي من مضاعفات العدد اتنين؛ اللي همّ صفر، وتمنتاشر، وستة وتلاتين، وأربعة وخمسين، واتنين وسبعين.

يبقى كده الأعداد اللي إحنا وصلنا لها لغاية دلوقتي هي مضاعفات مشتركة للعدد تسعة والعدد اتنين.

طب من بين مجموعة المضاعفات اللي حصلنا عليها دي، عايزين نشوف أيهم بيعتبر مضاعف مشترك كمان للعدد أربعة؛ يعني أيهم هيقبل القسمة على أربعة. هنلاقي إن الصفر بيقبل القسمة على أي عدد؛ وبالتالي هيبقى من مضاعفات العدد أربعة. تمنتاشر ما تقبلش القسمة على أربعة. ستة وتلاتين ده عدد يقبل القسمة على أربعة. وأربعة وخمسين لا تقبل القسمة على أربعة بدون وجود باقي. أما اتنين وسبعين فده عدد يقبل القسمة على أربعة .

وبالتالي فكده المضاعفات المشتركة للأعداد اتنين وأربعة وتسعة حتى اتنين وسبعين، هتبقى صفر وستة وتلاتين، واتنين وسبعين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.