فيديو: إيجاد مساحة شكل مركب يتكون من مستطيلات

احسب مساحة الشكل.

٠٣:٠٧

‏نسخة الفيديو النصية

احسب مساحة الشكل.

بنلاقي عندنا الشكل التالي هو شكل مركّب، يعني مش شكل مشهور. مطلوب مننا نوجد مساحته. عشان نقدر نحسب مساحة الشكل المركّب ده، هنقسّمه لعدة أشكال مشهورة، نقدر بسهولة نحسب مساحتها. فلو جينا مثلًا نقسّمه لشكلين، زيّ ما إحنا شايفين كده، بنلاقي إنه اتقسّم لشكلين، والشكلين عبارة عن مستطيل. فبنكتب كده: المستطيل واحد، والمستطيل اتنين.

بنلاقي عندنا أول مستطيل عرضه عبارة عن اتنين سنتيمتر. وبنلاقي إن طوله عبارة عن ستة سنتيمتر. وعرض المستطيل التاني سبعة سنتيمتر. ولكن طوله مش محدَّد. فلو لاحظنا كده، هنلاقي إن طول القطعة المستقيمة دي عبارة عن اتناشر سنتيمتر. وطول الجزء اللي إحنا شايفينه ده عبارة عن ستة سنتيمتر. فلو طرحنا اتناشر سنتيمتر؛ القطعة المستقيمة الكبيرة، ناقص القطعة المستقيمة دي، فاللي هينتج عبارة عن طول هذه القطعة المستقيمة. اتناشر ناقص ستة، يبقى ستة سنتيمتر.

يبقى دلوقتي قدرنا نقسّم الشكل المركّب لشكلين، كل شكل عبارة عن مستطيل. وهو شكل مشهور، ممكن نحسب مساحته بسهولة. وحدّدنا أبعاد كل مستطيل. بعد كده نقدر نحسب مساحة كل مستطيل. وبجمع مساحتهما، نلاقي إن مجموع مساحتيهما هيكون عبارة عن مساحة الشكل المركّب نفسه. فأول حاجة هنكتبها هو القانون اللي من خلاله هنقدر نحسب مساحة المستطيل.

بنلاقي إن مساحة المستطيل بتساوي الطول في العرض. فبنحسب مساحة المستطيل واحد. يبقى بنكتب كده: مساحة المستطيل واحد تساوي … بنلاقي إن طوله عبارة عن ستة في … عرضه اتنين. يبقى الناتج اتناشر سنتيمتر مربع. وهنحسب مساحة المستطيل اتنين، هتساوي … طوله عبارة عن ستة، في … عرضه يساوي سبعة. يبقى ستة في سبعة باتنين وأربعين سنتيمتر مربع.

بعد كده هنحسب مساحة الشكل الكلّي. هتكون كالتالي: مساحة الشكل الكلّي هتساوي مساحة المستطيل واحد زائد مساحة المستطيل اتنين. يبقى المساحة الكلية هتساوي اتناشر زائد اتنين وأربعين. يبقى الناتج هيساوي أربعة وخمسين سنتيمتر مربع.

يبقى مساحة الشكل المرسوم هتساوي أربعة وخمسين سنتيمتر مربع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.