فيديو: إيجاد مساحة سطح متوازي المستطيلات في سياق واقعي

غرفة لها أرضية على شكل مربع طول ضلعه ٥ م. ارتفاع حوائطها ٣ م، وبها باب عرضه ٨٧ سم وارتفاعه ٢٫١ م، كما إن بها نافذتين، بُعدا كل منهما ٩٠ سم، ٥١ سم. ما تكلفة طلاء الحوائط والسقف، إذا كانت تكلفة المتر المربع الواحد ١١ جنيهًا؟ قرب إجابتك لأقرب جزء من مائة.

٠٦:١١

‏نسخة الفيديو النصية

غرفة لها أرضية على شكل مربع طول ضلعه خمسة متر. ارتفاع حوائطها تلاتة متر. وبها باب عرضه سبعة وتمانين سنتيمتر، وارتفاعه اتنين وواحد من عشرة متر. كما إن بها نافذتين بُعدا كل منهما تسعين سنتيمتر وواحد وخمسين سنتيمتر. ما تكلفة طلاء الحوائط والسقف، إذا كانت تكلفة المتر المربع الواحد حداشر جنيهًا؟ قرب إجابتك لأقرب جزء من مائة.

هنرسم شكل مبسّط للغرفة زي اللي قدامنا ده، نحط عليه أبعاد كل حاجة معطاة عندنا في السؤال. معطى عندنا إن أرضية الغرفة على شكل مربع طول ضلعه خمسة أمتار. هنلاقي إن القاعدة دايمًا بتبقى زي السقف، فأبعاد القاعدة هي نفسها أبعاد السقف. فنقدر نقول إن أبعاده هتبقى هو مربع طول ضلعه خمسة أمتار.

معطى عندنا ارتفاع الحوائط بتلات أمتار. ومعطى كمان أبعاد الباب إن عرضه سبعة وتمانين سنتيمتر، وارتفاعه اتنين وواحد من عشرة متر. وعندنا أبعاد كل واحدة من النافذتين بإنها تسعين سنتيمتر، في واحد وخمسين سنتيمتر.

دلوقتي المطلوب مننا إننا نوجد تكلفة طلاء الحوائط والسقف. لو عرفنا إن تكلفة المتر المربع الواحد بحداشر جنيه. ده معناها إننا محتاجين نحسب مساحة السطح الكلية اللي هيتم طلاءها عشان نضربها في تكلفة طلاء المتر المربع الواحد. فنحصل على التكلفة الكلية للطلاء.

خلينا نشوف مساحة الأسطح اللي عايزين نطليها. زي ما عرفنا إن السقف على شكل مربع. ومساحة المربع عبارة عن طول الضلع تربيع. يبقى مساحة السقف هتبقى عبارة عن طول الضلع بتاعه اللي هو خمسة أمتار، تربيع. يعني هتساوي خمسة وعشرين متر مربع.

هنشوف مساحة الحوائط اللي عندنا. إحنا عندنا أربع حوائط. هنضرب أربعة في مساحة الحائط الواحد. الحائط الواحد أبعاده عبارة عن ارتفاع تلات أمتار، وعرض عبارة عن خمسة أمتار. فمساحته هتبقى عبارة عن مساحة مستطيل؛ يعني مساحته حاصل ضرب الطول في العرض، اللي هو خمسة في تلاتة. هنلاقي إن مساحة الحوائط عبارة عن ستين متر مربع.

ناخد بالنا من حاجة. إن الحوائط دي مش كلها هيتم طلاءها بالكامل؛ لأن فيها فراغات اللي هيبقى راكب فيها الباب والنافذتين. يعني عايزين نستبعد من مساحة الحوائط دي مساحة الباب والنافذتين؛ عشان مش هيتم طلاءهم.

طب زي ما إحنا شايفين الباب على شكل مستطيل؛ عرضه سبعة وتمانين سنتيمتر، وارتفاعه اتنين وواحد من عشرة متر. لازم وحدتين الأبعاد يبقوا نفس الوحدة. فمش هنقدر نستخدم واحدة منهم سنتيمتر وواحدة منهم متر. فهنوحد الوحدات على المتر.

سبعة وتمانين سنتيمتر دي هنقسم على مية، فهتبقى عبارة عن سبعة وتمانين من مية من المتر. فتبقى مساحة الباب هي حاصل ضرب اتنين وواحد من عشرة، في سبعة وتمانين من مية. اللي هتطلع واحد وتمنمية سبعة وعشرين من ألف متر مربع.

أما مساحة النافذتين فهتبقى عبارة عن اتنين في مساحة النافذة الواحدة، اللي هي عبارة عن مستطيل أبعاده واحد وخمسين سنتيمتر، وتسعين سنتيمتر. عايزين نوحّد الوحدات اللي بنشتغل بيها كلها بالمتر، فهنحول الأبعاد دي للمتر. فواحد وخمسين سنتيمتر هتبقى عبارة عن واحد وخمسين من مية من المتر. هنضربها في … التسعين سنتيمتر دي عبارة عن تسعة من عشرة متر. هنلاقي إن النتيجة هتبقى تسعمية وتمنتاشر من ألف متر مربع. دي مساحة النافذتين.

يبقى كده دلوقتي نقدر نوجد مساحة الحوائط اللي هيتم طلاءها بعد ما نستبعد منها مساحة الباب والنافذتين. بإننا هنقول إنها بتساوي مساحة الحوائط، نطرح منها مساحة الباب ومساحة النافذتين. فهنكتب بقى اللي إحنا لسه قايلينه. وهنقول إن مساحة الحوائط المراد طلاءها هي المساحة الكلية للحوائط، ناقص مجموع مساحتَي الباب والنافذتين. اللي هتطلع بـسبعة وخمسين ميتين خمسة وخمسين من ألف متر مربع.

دلوقتي بقى هنجمع مساحة السقف على مساحة الحوائط المراد طلاءها اللي إحنا أوجدناها؛ عشان نوجد كل المساحة الكلية اللي هيتم طلاءها. فهتبقى المساحة الكلية المراد طلاءها هي خمسة وعشرين، زائد سبعة وخمسين وميتين خمسة وخمسين من ألف. والمجموع هيطلع اتنين وتمانين وميتين خمسة وخمسين من ألف متر مربع. دي المساحة الكلية اللي هيتم طلاءها. اللي عبارة عن مساحة السقف، ومساحات الحوائط بعد استبعاد مساحة الباب والنافذتين.

دلوقتي إحنا عايزين نحسب تكلفة الطلاء الكلية. يبقى هنضرب المساحة الكلية اللي هيتم طلاءها، في تكلفة الطلاء للمتر المربع الواحد، اللي هي حداشر. فكده هتطلع التكلفة الكلية بـ تسعمية وأربعة وتمنمية وخمسة من ألف جنيهًا.

طيب ما ننساش إن إحنا مطلوب مننا نقرّب الإجابة بتاعتنا لأقرب جزء من مائة. فهنيجي تحت الخانة المكانية الخاصة بالأجزاء من مائة، اللي فيها الرقم صفر، وهنحط تحتها خطين. ونشوف الرقم اللي على يمينه، لو الرقم اللي على اليمين ده كان خمسة أو أكبر؛ فده بيخلينا نزود الرقم اللي تحته خط بمقدار واحد، والرقم اللي على يمينه وأي أرقام أخرى بنخلّيها بأصفار. وبكده هتصبح التكلفة الكلية للطلاء بعد التقريب لأقرب جزء من مائة: تسعمية وأربعة وواحد وتمانين من مية جنيهات. دي كده تكلفة طلاء الحوائط والسقف.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.