تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: الأنماط العددية

نهال عصمت

يتناول الفيديو مفهوم الأنماط العددية، وطريقة إيجاد العدد المفقود.

٠٥:٣٢

‏نسخة الفيديو النصية

الأنماط العددية.

هنتكلم عن الأنماط العددية. في البداية النمط هو سلسلة من الأعداد أو الأشكال التي تتبع قاعدة معينة. بمعنى ممكن نشوف الأنماط العددية المختلفة على لوحة المائة. لوحة المائة بتبقى بالشكل الآتي.

لوحة المائة بيبقى مكتوب فيها الأعداد بالترتيب من واحد حتى مية. ممكن النمط يزيد أو يقل بأي مقدار. بمعنى لو جينا نبص على لوحة المائة، وبدأنا من العدد اتنين، وعندنا النمط بيزيد بمقدار اتنين؛ يبقى النمط هيبقى اتنين، أربعة، ستة، تمنية، عشرة، وهكذا.

طب لو عندنا النمط بيبدأ بالعدد عشرين، وفي كل مرة بيزيد بمقدار عشرة. بالتالي النمط هيبقى عشرين، تلاتين، أربعين، خمسين، ستين، وهكذا. يبقى كده عرفنا شكل الأنماط العددية على لوحة المائة.

هنبدأ نجيب صفحة جديدة، ونشوف أمثلة مختلفة على الأنماط العددية.

مطلوب: حدّد النمط ثم أوجد العدد التالي. عندنا النمط هو خمستاشر، خمسة وعشرين، خمسة وتلاتين، خمسة وأربعين، ونقط.

أول حاجة هنلاحظ إن النمط هو إننا بنضيف عشرة في كل مرة. يعني الخمستاشر لمّا زوّدنا عليها عشرة بقت خمسة وعشرين. هنزود عشرة على الخمسة وعشرين هتبقى خمسة وتلاتين. هنزود كمان عشرة على الخمسة وتلاتين بقت خمسة وأربعين.

يبقى عشان نكمل النمط هنزود عشرة على الخمسة وأربعين، هيبقى عندنا العدد الناقص أو العدد التالي هو خمسة وخمسين.

يبقى كده عرفنا نحدد النمط، وقدرنا نوجد العدد التالي. هنبدأ نجيب صفحة جديدة، ونشوف مثال آخر من الواقع.

يوضّح الجدول الآتي عدد صفحات كتاب قرأته مريم في أيام متتالية، فإذا استمر هذا النمط، فما عدد الصفحات التي ستقرؤها يوم الخميس؟ يبقى عايزين نوجد عدد الصفحات اللي مريم هتقراها يوم الخميس.

هنلاحظ إن النمط عندنا هو تلاتة، بعد كده ستة، بعديها تسعة، بعديها اتناشر، بعديها خمستاشر، بعد كده نقط.

هنلاحظ إن مريم في كل يوم بتقرا تلات صفحات زيادة عن اليوم السابق. معنى كده إن النمط في كل مرة بيزيد بمقدار تلاتة. يعني تلاتة لمّا نزود عليها تلاتة، هيبقى ستة. هنزود تلاتة على الستة، هتبقى تسعة. هنزود كمان تلاتة على التسعة، هتبقى اتناشر. هنزود كمان تلاتة على الاتناشر، هتبقى خمستاشر.

يبقى عشان نوجد عدد الصفحات التي ستقرأها يوم الخميس، هنزود تلاتة على الخمستاشر. هيبقى العدد الناقص هو تمنتاشر. يبقى نقدر نقول إن عدد الصفحات اللي هتقراها مريم يوم الخميس هو تمنتاشر.

هنبدأ نجيب صفحة جديدة ونشوف مثال آخر.

يوضح النمط التالي عدد النقاط التي سجّلها ياسر في لعبة إلكترونية، خلال ست جولات. النمط هو مية وخمسين، ومية خمسة وأربعين، ومية وأربعين، ونقط، ومية وتلاتين، ونقط. المطلوب: أوجد العددين المفقودين في النمط.

هنلاحظ عندنا إن النمط بيقل. يعني في كل مرة النمط بيقل بمقدار خمسة. يعني مية وخمسين لو طرحنا منها خمسة، هيدّينا مية خمسة وأربعين. لو طرحنا خمسة من مية خمسة وأربعين، هيدّينا مية وأربعين. يبقى عشان نجيب العدد اللي موجود بعد مية وأربعين، هنطرح خمسة من مية وأربعين. يبقى العدد هيبقى مية خمسة وتلاتين. هنطرح من مية خمسة وتلاتين خمسة، هيبقى فعلًا عندنا العدد مية وتلاتين. عشان نجيب العدد اللي بعد مية وتلاتين، هنطرح منه خمسة، هيبقى العدد المفقود التاني هو مية خمسة وعشرين. يبقى كده قدرنا نوجد العددين المفقودين في النمط.

وبكده اتكلمنا عن الأنماط العددية، وشُفنا أمثلة مختلفة عليها.