فيديو: إيجاد المدى الرُّبيعي لمجموعة بيانات

أوجد المدى الربيعي لمجموعة البيانات الآتية: ٩٦، ٥٢، ٨٧، ١١٤، ٧٦، ١٠١، ٧٦، ١١٤، ٩٩، ٩٦، ٨٨، ١١١، ٨٨، ٩٤، ٥٣.

٠٢:٢٨

‏نسخة الفيديو النصية

أوجد المدى الرُّبيعي لمجموعة البيانات الآتية: ستة وتسعين، واتنين وخمسين، وسبعة وتمانين، ومية وأربعتاشر، وستة وسبعين، ومية وواحد، وستة وسبعين، ومية وأربعتاشر، وتسعة وتسعين، وستة وتسعين، وتمنية وتمانين، ومية وحداشر، وتمنية وتمانين، وأربعة وتسعين، وتلاتة وخمسين.

وأول حاجة هنعملها إننا هنرتّب البيانات اللي عندنا من الأصغر للأكبر، فلمّا نرتبهم هيبقوا بالشكل ده.

بعد كده هنشوف عدد البيانات اللي عندنا، فيبقى عندنا: واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر، تلتاشر، أربعتاشر، خمستاشر.

بعد كده هنوجد الوسيط للبيانات، وبما إن عدد البيانات خمستاشر يعني عدد فردي؛ فبالتالي هيبقى الوسيط هو العدد الأوسط للبيانات المرتّبة من الأصغر للأكبر، فمعنى كده إن الوسيط عندنا هنا هو العدد الأوسط للبيانات؛ يعني أربعة وتسعين.

و خلينا نفتكر إن الوسيط بيقسّم البيانات إلى نصفين، واللي هم النصف الأدنى والنصف الأعلى.

بعد كده عشان نوجد الرُّبيع الأدنى والرُّبيع الأعلى، فهنيجي عند النصف الأدنى من البيانات وهنوجد الوسيط ليهم، فهيبقى وصيف [وسيط] النصف الأدنى من البيانات هو ستة وسبعين، والوسيط للنصف الأدنى من البيانات بنسمية الرُّبيع الأدنى.

وبنفس الطريقة هنوجد وسيط النصف الأعلى من البيانات، ‏ واللي هيبقى مية وواحد، ووسيط النصف الأعلى من البيانات بنسميه الرُّبيع الأعلى.

فكده قدرنا نوجد الرُّبيع الأدنى والرُّبيع الأعلى للبيانات، لكن هنلاحظ إن المطلوب في السؤال إننا نوجد المدى الرُّبيعي، والمدى الرُّبيعي هو الفرق بين الرُّبيع الأعلى والرُّبيع الأدنى؛ فهنعوّض عن الرُّبيع الأعلى بمية وواحد، وأما الرُّبيع الأدنى فهنعوّض عنه بستة وسبعين؛ عشان زي ما قلنا إن المدى الرُّبيعي هو الفرق بين الرُّبيع الأعلى والرُّبيع الأدنى، يعني هيساوي مية وواحد ناقص ستة وسبعين، فلمّا نحسبها هتساوي خمسة وعشرين؛ وبالتالي هيبقى المدى الرُّبيعي لمجموعة البيانات اللي عندنا هو خمسة وعشرين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.