فيديو: امتحان الإستاتيكا الدور الثاني للعام السابق • ٢٠١٨/٢٠١٧ • السؤال الثاني

امتحان الإستاتيكا الدور الثاني للعام السابق • ٢٠١٨/٢٠١٧ • السؤال الثاني

٠٤:٥٢

‏نسخة الفيديو النصية

ق واحد وَ ق اتنين قوتان متوازيتان. مقدار الأولى منهما عشرة ثُقل كيلوجرام. ومقدار محصلتهما ح يساوي ستاشر ثُقل كيلوجرام. إذا كانت المسافة بين ق واحد وَ ح تساوي اتناشر سنتيمتر. وكانت القوتان ق واحد وَ ح تعملان في نفس الاتجاه. فأوجد بالسنتيمتر المسافة بين نقطتي تأثير القوتين ق واحد وَ ق اتنين.

هنلاقي إن المُعطيات عندنا في السؤال إن مقدار القوة الأولى عشرة ثُقل كيلوجرام. ومقدار المحصِّلة اللي هي ح ستاشر ثُقل كيلوجرام. ومُعطى عندنا المسافة بين ق واحد وَ ح باتناشر سنتيمتر. ومُعطى كمان إن القوتين ق واحد وَ ح تعملان في نفس الاتجاه. يبقى هنرسم القوة ق واحد والمحصلة ح بيعملوا في نفس الاتجاه، والمسافة بينهم اتناشر سنتيمتر.

نقدر نستنتج من المعلومات اللي مُعطاة عندنا في السؤال من إن القوة ق واحد والمحصلة تعملان في نفس الاتجاه. وبمقارنة مقدار المحصِّلة بمقدار القوة ق واحد، هنلاقي إن المحصلة مقدارها أكبر من مقدار ق واحد. إذن فده معناه إن القوتين ق واحد وَ ق اتنين هيبقوا هُمَّ كمان بيعملوا في نفس الاتجاه. وبنقدر نستنتج كمان إن نقطة تأثير المحصِّلة لو افترضنا إنها النقطة ج، هتبقى بتقسم المسافة بين خَطَّيِ عمل القوتين من الداخل بنسبة عكسية لمعيارهما. ده معناه إن المحصِّلة هتبقى موجودة ما بين خَطَّيِ عمل القوة ق واحد وَ ق اتنين. يعني هنرسم القوة ق اتنين على يسار المحصِّلة؛ بحيث تبقى المحصِّلة موجودة ما بين خطي عمل ق واحد وَ ق اتنين.

دلوقتي إحنا المطلوب منَّنا في السؤال إننا نوجد المسافة بين نقطتي تأثير القوتين ق واحد وَ ق اتنين. يعني نوجد المسافة دي. وإحنا معلوم عندنا المسافة بين نقطة تأثير المحصِّلة والقوة ق واحد. يبقى ناقص عندنا إن إحنا نعرف المسافة بين نقطة تأثير المحصلة والقوة ق اتنين. يبقى أول حاجة محتاجين نوجِد مقدار القوة ق اتنين، اللي هيساعدنا في إننا نستنتج المسافة بين نقطة تأثير القوة ق اتنين، ونقطة تأثير المحصِّلة.

بما إن القوتين ق واحد وَ ق اتنين متوازيتين، وبتعملان في نفس الاتجاه. فده معناه إن المحصِّلة بتاعة القوتين دول اللي هي ح، مقدارها هيبقى عبارة عن مجموع مقدار القوتين. واتجاهها في نفس اتِّجاه القوتين. هنعوّض عن المحصلة ح بمقدارها اللي هو ستاشر ثُقل كيلوجرام، وعن القوة ق واحد بمقدارها اللي هو عشرة ثُقل كيلوجرام. وناقص دلوقتي إن إحنا نعرف من المعادلة اللي عندنا دي مقدار القوة ق اتنين.

هنطرح عشرة من طرفَي المعادلة اللي عندنا، فهنلاقي إن ق اتنين تساوي ستة ثُقل كيلوجرام. كده يبقى قدرنا نستنتج مقدار القوة ق اتنين، واللي بيساوي ستة ثُقل كيلوجرام. دلوقتي بقى زي ما استنتجنا نقطة تأثير المحصِّلة اللي هي ج بتقسِم المسافة بين خَطَّي عمل القوتين من الداخل بنسبة عكسية لمعيارهما. ونقدر نكتب علاقة التناسب بينهم بالشكل ده: ق واحد على ق اتنين، هتساوي ج ب على أ ج.

معلوم عندنا مقدار القوة ق واحد والقوة ق اتنين. هنعوّض عنهم فهيبقى الطرف الأيمن عبارة عن عشرة على ستة. أما ج ب فهو المسافة بين نقطة تأثير المحصِّلة وخط عمل القوة ق اتنين. ده محتاجين نوجده. وَ أ ج فهو بيمثِّل المسافة بين نقطة تأثير المحصِّلة وخط عمل القوة ق واحد، اللي هو معطى في السؤال باتناشر. نقدر نستنتج من هنا إن ج ب هيساوي عشرة على ستة في اتناشر؛ يعني بيساوي عشرين سنتيمتر. يبقى كده قدرنا نستنتج المسافة ما بين نقطة تأثير المحصِّلة، وخط عمل القوة ق اتنين.

كده بقى من السهل بالنسبة لنا إننا نوجد المسافة بين نقطتي تأثير القوتين ق واحد وَ ق اتنين، اللي هو هيبقى عبارة عن مجموع المسافتين دول. يعني نقدر نقول إن أ ب هيبقى عبارة عن أ ج زائد ج ب. هنعوَّض عن أ ج باتناشر، وَ ج ب بعشرين. فهنلاقي إن أ ب بيساوي اتنين وتلاتين سنتيمتر. وبكده يبقى قدرنا نستنتج المسافة بين نقطتي تأثير القوتين ق واحد وَ ق اتنين، واللي بتساوي اتنين وتلاتين سنتيمتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.