تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: استخدام الخطوط المستقيمة لتمثيل العلاقات بين متغيرين كميين

أحمد مدحت

يوضح شكل الانتشار نتائج اختبارين لفصل مكوَّن من ٢٦ طالبًا. إذا حصلتْ أميرة على ٨٤ في الاختبار الأول، فأيٌّ من التالي يمكن أن يكون نتيجتها في الاختبار الثاني؟ [أ] ٧٠ [ب] ٩٢ [ج] ٨٦ [د] ٥٠ [ﻫ] ٦٠

٠١:٤٠

‏نسخة الفيديو النصية

عندنا في المثال شكل انتشار بيوضّح نتائج اختبارين لفصل مكوّن من ستة وعشرين طالب. وأميرة حصلت على أربعة وتمانين في الاختبار الأول، فعايزين نعرف أيٌّ من التالي يمكن أن يكون نتيجتها في الاختبار الثاني. وعندنا خمس اختيارات. الاختيار أ هو سبعين. والاختيار ب هو اتنين وتسعين. والاختيار ج هو ستة وتمانين. والاختيار د هو خمسين. والاختيار ﻫ هو ستين.

علشان نحدد نتيجة أميرة في الاختبار التاني، هنرجع لشكل الانتشار اللي عندنا، ونشوف طريقة انتشار النقط. فهنلاقي النقط واخدة شكل خط مستقيم، لكن ما فيش خط مستقيم يقدر يمرّ بكل النقط اللي موجودة. معنى كده إن البيانات ذات نزعة خطية. فهنستخدم الخط الأفضل مطابقة علشان نحدد نتيجة أميرة في الاختبار التاني.

فهنرسم الخط الأفضل مطابقة، زي ما هيظهر لنا. بعد ما رسمنا الخط الأفضل مطابقة، هنبدأ نحدّد نتيجة أميرة في الاختبار التاني. وعندنا أميرة حصلت في الاختبار الأول على أربعة وتمانين، فهنقف على المحور الأفقي اللي بيمثّل نتيجة الاختبار الأول، عند أربعة وتمانين. ومن عند النقطة اللي إحنا حدّدناها دي، هنرسم خط رأسي متقطع بيقطع الخط الأفضل مطابقة، زي ما هيظهر لنا.

بعد ما رسمنا الخط الرأسي المتقطع، هنلاقيه قطع الخط الأفضل مطابقة في النقطة. فمن نقطة التقاطع دي، هنرسم خط أفقي متقطّع، بيقطع المحور الرأسي اللي بيمثل نتيجة الاختبار التاني، زي ما هيظهر لنا. فهنلاحظ إن الخط الأفقي قطع المحور الرأسي في النقطة دي، اللي عندها هتكون نتيجة الاختبار التاني هي ستة وتمانين. معنى كده إن نتيجة أميرة في الاختبار التاني ممكن تكون ستة وتمانين. بالتالي هتبقى الإجابة هي الاختيار ج، وهو ستة وتمانين.