فيديو: إيجاد الجذر التربيعي لعددٍ مُعطًى في سياق واقعي

لدى فريدة ٣٦١ كرة صغيرة تستخدمها لتُشكِّل مربعًا. أوجد عدد الكرات الصغيرة التي ينبغي أن تكون في كل صف.

٠٢:٥١

‏نسخة الفيديو النصية

لدى فريدة تلتمية واحد وستين كرة صغيرة تستخدمها لتُشكِّل مربعًا. أوجد عدد الكرات الصغيرة التي ينبغي أن تكون في كل صفّ.

يعني معطى عندنا إن فريدة عندها تلتمية واحد وستين كورة، وعايزة تستخدمهم علشان تعمل بيهم مربع أو تشكّل مربع. وخلّينا في الأول نفتكر إن المربع بتبقى جميع أضلاعه متساوية، فمعنى كده إننا لو عندنا مربع بالشكل ده، فلو عايزين نشكّل المربع ده باستخدام كور صغيّرة، فبما إن جميع الأضلاع لازم تكون متساوية فمعنى كده إن مثلًا لو حطّينا كور في الاتجاه ده، واللي هنلاحظ إن عددهم خمسة، فعلشان نشكّل مربع بالكور يبقى لازم يكون عدد الكور اللي في اتجاه ده أو في العمود ده برضو بتساوي خمسة.

ففي المثال اللي رسمناه ده لو عايزين نعرف المربع ده هيتكوّن من كام كورة، يبقى هنشوف عندنا كام كورة في العمود ده؛ فنلاقي إن عندنا خمس كور. وأمّا في الصفّ اللي فوق ده عندنا خمس كور؛ فمعنى كده إن عدد الكور اللي هنستخدمها علشان نكوّن المربع ده هتكون حاصل ضرب خمسة في خمسة، واللي هيساوي خمسة وعشرين. فمعنى كده إن المربع ده هيتكوّن من خمسة وعشرين كورة؛ يعني لازم كل صفّ يكون فيه خمس كور، وكل عمود يكون فيه خمس كور.

طيب لو جينا نفكّر فيها بالعكس؛ يعني لو مُعطى عندنا عدد الكور اللي هو خمسة وعشرين، وعايزين نعرف عدد الكور اللي المفروض تكون في كل صفّ. يعني هنحسبها بالعكس. فبالتالي عشان نعرف عدد الكور اللي في كل صفّ يبقى هنوجد الجذر التربيعي لخمسة وعشرين؛ لأن الجذر التربيعي لخمسة وعشرين هو عبارة عن العدد اللي لو ضربناه في نفسه هيبقى بيساوي خمسة وعشرين. وبما إن خمسة في خمسة بتساوي خمسة وعشرين؛ فبالتالي هيبقى الجذر التربيعي لخمسة وعشرين بيساوي خمسة. فمعنى كده إننا لمّا كان عندنا خمسة وعشرين كورة وعايزين نشكّل بيهم مربع، فيبقى هنحتاج خمس كور في كل صفّ.

فبنفس الطريقة، لمّا نيجي نشوف السؤال اللي عندنا هنلاحظ إن عندنا بدل من خمسة وعشرين كان عندنا تلتمية واحد وستين كرة صغيرة، وبرضو هنستخدمهم علشان نشكّل مربع. والمطلوب إننا نوجد عدد الكرات اللي المفروض تكون في كل صفّ. فبالتالي هيبقى عدد الكرات بيساوي الجذر التربيعي لتلتمية واحد وستين؛ لأن عندنا تلتمية واحد وستين كورة، وعايزين نستخدمهم عشان نشكّل مربع. فمعنى كده إن لازم تكون عدد الكرات في كل صفّ بتساوي عدد الكرات في كل عمود؛ يعني عايزين نوجد عدد حاصل ضربه في نفسه بيساوي تلتمية واحد وستين، اللي هو الجذر التربيعي لتلتمية واحد وستين، فلمّا نحسبها هتبقى بتساوي تسعتاشر.

وبالتالي هيبقى عدد الكرات الصغيرة اللي لازم تكون في كل صفّ هو: تسعتاشر كرة صغيرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.