فيديو: جمع ثلاثة كسور وتبسيط الناتج

أوجد ناتج ١٥/١ + ٢/١ + ٥/٤ في أبسط صورة.

٠٣:٥٢

‏نسخة الفيديو النصية

أوجد ناتج واحد على خمستاشر، زائد واحد على اتنين، زائد أربعة على خمسة؛ في أبسط صورة.

عندنا تلات كسور، وبينهم علامات الزائد. معنى كده إن المطلوب إننا نجمع التلات كسور دول. لكن مقامات التلات كسور دول مختلفة. علشان كده هنجيب مضاعفات كل مقام منهم؛ علشان نقدر نحدد المضاعف المشترك الأصغر بين مضاعفات التلات مقامات دول. وبالتالي نقدر نجمع بسهولة.

أول مقام مضاعفاته: خمستاشر، وتلاتين، وخمسة وأربعين، وهكذا … ومضاعفات العدد اللي بعده: اتنين، وأربعة، وستة، وتمنية، وعشرة، وهكذا … وعشرين، وتلاتين، وهكذا … أما مضاعفات الخمسة، فهي: خمسة، وعشرة، خمستاشر، وعشرين، وخمسة وعشرين، وتلاتين، وهكذا … ودلوقتي هندور على أصغر مضاعف مشترك بين التلات مقامات دول. هنلاقي إنه العدد تلاتين. وهو ده هيكون المقام الجديد بتاعنا.

الكسر الأول المقام بتاعه خمستاشر. الخمستاشر هيحصل لها إيه علشان تكون تلاتين؟ المفروض إن هي تكون اتضربت في اتنين. خمستاشر في اتنين بيساوي بالفعل تلاتين. وبما إننا ضربنا المقام في اتنين، فكمان هنضرب البسط في اتنين. واحد في اتنين باتنين. وهنكتب العدد ده في البسط. وبعدين نكتب علامة الزائد، ونشوف الكسر اللي بعده.

ومقام الكسر التاني هو العدد اتنين. هنسأل نفسنا: اتنين بقت تلاتين إزاي؟ هنعرف إننا ضربنا اتنين في خمستاشر؛ علشان تكون تلاتين. اتنين في خمستاشر يساوي تلاتين. ولأننا ضربنا المقام في خمستاشر، فهنضرب كمان البسط في نفس العدد. واحد في خمستاشر بيساوي خمستاشر. وهنكتب العدد ده في البسط. وهنكتب علامة زائد تاني، ونشوف الكسر الأخير، وهو الكسر أربعة على خمسة.

مقام الكسر التالت هو العدد خمسة. العدد خمسة هيكون العدد تلاتين إزاي؟ هنعرف إننا ضربناه في العدد ستة. خمسة في ستة بتلاتين. وبما إننا ضربنا المقام في ستة، فكمان هنضرب البسط في نفس العدد. أربعة في ستة بيساوي العدد أربعة وعشرين.

ودلوقتي هنبدأ نجمع الأعداد الموجودة في البسط. خمستاشر زائد اتنين بيساوي سبعتاشر. ولمّا نضيف عليها أربعة وعشرين كمان، هنلاقي إنه سبعة زائد أربعة بيساوي حداشر. واحد، والواحد التاني هنضيفه في خانة العشرات. واحد زائد واحد زائد اتنين بيساوي أربعة. معنى كده إن العدد اللي هنكتبه في البسط هو واحد وأربعين.

الكسر واحد وأربعين على تلاتين، علشان نخليه في أبسط صورة، هنلاقي إنه البسط اللي هو واحد وأربعين، أكبر من العدد تلاتين اللي هو المقام. علشان كده نقدر نجزّأ البسط لجزئين. الجزء الأول ممكن نخليه زيّ المقام بالظبط، اللي هو تلاتين. والمتبقّي من الواحد وأربعين، لمّا نشيل منه تلاتين، هو العدد حداشر.

وبالتالي واحد وأربعين على تلاتين، نقدر نكتبها تلاتين على تلاتين، واللي بتساوي واحد صحيح، زائد الكسر حداشر على تلاتين. وممكن نكتبه بالطريقة دي: واحد، وحداشر على تلاتين. علشان كده ناتج جمع التلات كسور هو: واحد صحيح، وكسر حداشر على تلاتين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.