تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد جيوب تمام اتجاه متجه

أحمد لطفي

أوجد جيوب تمام الاتجاه للمتجه الذي يقع في المستوى الإحداثي الموجب ﺱﻉ ويصنع زاوية ٦٠°‎ مع الجزء الموجب من محور ﻉ.

٠٢:٤٣

‏نسخة الفيديو النصية

أوجد جيوب تمام الاتجاه للمتجه الذي يقع في المستوى الإحداثي الموجب س ع، ويصنع زاوية ستين درجة مع الجزء الموجب من محور ع.

في البداية لو عندنا المحاور س وَ ع بالشكل ده، فمعطى إن المتجه بيصنع زاوية ستين درجة مع الجزء الموجب من محور ع؛ يعني المتجه هيكون بالشكل ده، ومطلوب إننا نوجد جيوب تمام الاتجاه للمتجه.

عشان نقدر نوجد جيوب تمام الاتجاه للمتجه، فهتكون … هتكون جتا الزاوية اللي بين المتجه ومحور س، وَ جتا الزاوية اللي بين المتجه ومحور ص، وَ جتا الزاوية اللي بين المتجه ومحور ع. ومعطى إن الزاوية اللي بيعملها المتجه مع محور ع هتكون ستين درجة، وبما إن المتجه بيقع في المستوى الإحداثي س ع، وعندنا محور ع بيكون عمودي على محور س؛ يعني الزاوية بينهم بتكون تسعين درجة؛ وبالتالي الزاوية ما بين المتجه ومحور س هتكون تلاتين درجة، اللي هي عبارة عن تسعين درجة، اللي هي الزاوية العمودية بين محور ع ومحور س، ناقص ستين درجة اللي هي الزاوية بين المتجه ومحور ع. ولو عايزين نوجد الزاوية اللي بيعملها المتجه مع محور ص، فبما إن المتجه في المستوى الإحداثي س ع، ومحور ص بيكون عمودي على المستوى الإحداثي س ع؛ يبقى محور ص هيكون عمودي على المتجه، وبالتالي الزاوية اللي بيعملها المتجه مع محور ص هتكون تسعين درجة.

يبقى قدرنا نوجد إن الزاوية اللي بيعملها المتجه مع محور س بتساوي تلاتين درجة، والزاوية اللي بيعملها المتجه مع محور ص بتساوي تسعين درجة، والزاوية اللي بيعملها المتجه مع محور ع بتساوي ستين درجة؛ وبالتالي علشان نقدر نوجد جيوب تمام الاتجاه للمتجه، فهتكون عندنا جتا الزاوية اللي بيعملها المتجه مع محور س يعني جتا تلاتين درجة، وَ جتا الزاوية اللي بيعملها المتجه مع محور ص فهتكون جتا تسعين درجة، وَ جتا الزاوية اللي بيعملها المتجه مع محور ع فهتكون جتا ستين درجة؛ يعني جيوب تمام الاتجاه للمتجه هتكون … جتا تلاتين درجة هتساوي الجذر التربيعي لتلاتة عَ الاتنين، وَ جتا تسعين درجة هتساوي صفر، وَ جتا ستين درجة هتساوي واحد على اتنين؛ وبالتالي جيوب تمام الاتجاه للمتجه هتكون الجذر التربيعي لتلاتة عَ الاتنين وصفر وواحد عَ الاتنين.