تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد مجموعة حل معادلة ذات خطوتين

أحمد مدحت

أوجد مجموعة الحل للمعادلة −٤ﺱ + ٣ = ٤.

٠١:٥٥

‏نسخة الفيديو النصية

في المثال اللي عندنا عايزين نوجد مجموعة الحل للمعادلة سالب أربعة س زائد تلاتة يساوي أربعة.

أول حاجة هنكتب المعادلة اللي عندنا مرة كمان، والمعادلة هي سالب أربعة س زائد تلاتة يساوي أربعة. ومعنى إن إحنا عايزين نحل المعادلة دي، إن إحنا عايزين نوجد قيمة س، فبالتالي هنحتاج نخلي س في طرف لوحدها من الطرفين بتوع المعادلة؛ معنى كده إن إحنا محتاجين نتخلص من موجب تلاتة، وكمان من سالب أربعة اللي مضروبة في الـ س.

هنبدأ في أول خطوة إن إحنا نتخلص من موجب تلاتة، وده من خلال إن إحنا هنطرح من طرفَي المعادلة تلاتة. فلما هنطرح من طرفَي المعادلة تلاتة، هيبقى عندنا سالب أربعة س زائد تلاتة ناقص تلاتة يساوي أربعة ناقص تلاتة. وبما إن تلاتة ناقص تلاتة يساوي صفر، يبقى كده قدرنا نتخلص من موجب تلاتة، يعني هيبقى عندنا سالب أربعة س يساوي أربعة ناقص تلاتة، يعني يساوي واحد؛ وبكده في أول خطوة اتخلصنا من موجب تلاتة.

في الخطوة التانية هنتخلص من سالب أربعة اللي مضروبة في س، وده هيكون من خلال إن إحنا هنقسم طرفَي المعادلة على سالب أربعة، يعني هيبقى عندنا سالب أربعة س على سالب أربعة يساوي واحد على سالب أربعة. وبما إن سالب أربعة س على سالب أربعة يساوي س، بكده يبقى قدرنا نتخلص من سالب أربعة اللي مضروبة في س، يعني هيبقى الطرف الأيمن عبارة عن س، والطرف الأيسر هيبقى عبارة عن واحد على سالب أربعة، يعني سالب واحد على أربعة؛ يعني معنى كده إن س تساوي سالب واحد على أربعة.

وبكده يبقى إحنا أوجدنا قيمة س، وهي سالب واحد على أربعة. بالتالي هتبقى مجموعة الحل للمعادلة اللي عندنا هي المجموعة سالب واحد على أربعة.