تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: معادلة المستقيم المار بنقطة ويوازي مستقيمًا آخر

نهال عصمت

يوضِّح الفيديو بالمثال طريقة كتابة معادلة المستقيم المار بنقطةٍ ما، ويوازي مستقيمًا آخر.

٠٣:٥٤

‏نسخة الفيديو النصية

معادلة المستقيم المار بنقطة ويوازي مستقيمًا آخر.

هنبدأ نعرف إزاي نكتب معادلة المستقيم المار بنقطة ويوازي مستقيمًا آخر. في البداية يعني إيه مستقيم يوازي مستقيم آخر؟ يعني عندنا مستقيمان لا يقطع إحداهما الآخر، والمستقيمان لهما نفس الميل وهيبقى بالشكل ده.

بعد ما افتكرنا يعني إيه مستقيم يوازي مستقيم آخر، هنبدأ نجيب صفحة جديدة ونبدأ نتكلم عن إزاي نكتب معادلة مستقيم مار بنقطة ويوازي مستقيمًا آخر.

عايزين نكتب معادلة المستقيم بصيغة الميل والمقطع، المار بالنقطة سالب تلاتة وخمسة، ويوازي المستقيم الذي معادلته ص تساوي اتنين س ناقص أربعة. أول حاجة عندنا مستقيمان متوازيان، معنى كده إن ميل المستقيم المُعطى يساوي ميل المستقيم المطلوب كتابة معادلته. أول حاجة عندنا المستقيم المُعطى هو ص تساوي اتنين س ناقص أربعة. معادلة المستقيم مكتوبة بصيغة الميل والمقطع، وبالتالي نقدر نقول إن ميل المستقيم هو اتنين، يبقى الميل يساوي اتنين، وعشان المستقيمان متوازيان يبقى نقدر نقول إن ميل المستقيم المُعطى يساوي ميل المستقيم المطلوب كتابته، يساوي اتنين.

بعد كده هنبدأ نكتب معادلة المستقيم بصيغة الميل والمقطع، بس في البداية هنكتبها بصيغة الميل ونقطة، ونبدأ نعيد كتابة المعادلة عشان نكتبها بصيغة الميل والمقطع. معادلة المستقيم بصيغة الميل ونقطة هي ص ناقص ص واحد تساوي م مضروبة في س ناقص س واحد، هنبدأ نعوّض في المعادلة، هيبقى عندنا ص ناقص ص واحد، هنعوّض بالنقطة اللي بيمر بيها المستقيم، يعني خمسة هتساوي الميل هو اتنين مضروبة في س ناقص س واحد، اللي هي سالب تلاتة، يبقى هنكتب ناقص سالب تلاتة، وبالتالي ص ناقص خمسة هتساوي اتنين في س زائد تلاتة. هنستخدم خاصية التوزيع هنضرب اتنين في كل حد من حدود القوس، وبالتالى ص ناقص خمسة هتساوي اتنين س زائد ستة. عايزين نكتب المعادلة بصيغة الميل والمقطع، يبقى هنجمع خمسة على طرفي المعادلة، هيبقى عندنا ص ناقص خمسة زائد خمسة هتساوي اتنين س زائد ستة زائد خمسة، وبالتالي ص هتساوي اتنين س زائد حداشر.

وبالتالي نقدر نقول إن معادلة المستقيم بصيغة الميل والمقطع هي ص تساوي اتنين س زائد حداشر. وبكده عرفنا إزاي نكتب معادلة المستقيم المار بنقطة ويوازي مستقيمًا آخر.