فيديو: النموذج التجريبي الأول • الإستاتيكا • ٢٠١٩ • السؤال الثاني

النموذج التجريبي الأول • الإستاتيكا • ٢٠١٩ • السؤال الثاني

٠٣:٣٧

‏نسخة الفيديو النصية

وُضِع جسم وزنه و نيوتن على مستوى أفقي خشن. كان قياس زاوية الاحتكاك المحصورة بين الجسم والمستوى تلاتين درجة. إذا أثَّرت على الجسم قوة مقدارها مية جذر تلاتة نيوتن تميل على الأفقي بزاوية قياسها ستين درجة، فجلعت الجسم على وشك الحركة على المستوى الأفقي. فأوجد قيمة و بالنيوتن.

عندنا الجسم اللي قدامنا في الشكل وزنه و. بيؤثِّر رأسيًّا لأسفل بالشكل ده. وزاوية الاحتكاك ل بتساوي تلاتين درجة. والقوة مية جذر تلاتة نيوتن أثَّرت على الجسم وهي مايلة على المستوى بزاوية قياسها ستين درجة. والجسم بتاعنا على وشك الحركة، يعني في حالة اتزان نهائي. وعاوزين نوجد قيمة و.

طيب دلوقتي بما إن الجسم ده موضوع على مستوى أفقي خشن، يبقى ردّ فعل المستوى على الجسم غير معلوم الاتجاه. فبنبدأ نحلِّله لمركِّبتين متعامدتين؛ مركِّبة عمودية على المستوى، وهي ردّ الفعل العمودي ر. ومركِّبة موازية للمستوى عكس اتجاه الحركة، يعني في الاتجاه ده، عبارة عن قوة احتكاك ح. وهي طبعًا في الاتجاه المضاد لاتجاه القوة. وإحنا الجسم بتاعنا على وشك الحركة، يعني في حالة اتزان نهائي. يعني قوة الاحتكاك بتكون ح س، أو قوة الاحتكاك السُّكُوني النهائي.

وإحنا عندنا ح س بتساوي م س في ر. ومُعطى عندنا قياس زاوية ل أو زاوية الاحتكاك بتلاتين درجة. وإحنا عندنا م س بتساوي ظا ل. معامل الاحتكاك السُّكُوني بيساوي ظل زاوية الاحتكاك. يبقى من هنا نقدر نقول: إن م س بتساوي ظا تلاتين. ويبقى ح س بتساوي ظا تلاتين في ر، اللي هي جذر تلاتة على تلاتة ر. وحطِّيناها عَ الرسم بالشكل ده.

علشان نقدر نحسب قيمة و، محتاجين نحلِّل كل القوى اللي بتؤثِّر على الجسم في اتجاهين متعامدين. وإحنا عندنا القوة و والقوة ر والقوة جذر تلاتة على تلاتة ر فعلًا في اتجاهين متعامدين. ناقص القوة ق مية جذر تلاتة نيوتن، ودي هنحلِّلها لمية جذر تلاتة جتا ستين في الاتجاه الموازي لاتجاه المستوى. ومية جذر تلاتة جا ستين في اتجاه عمودي على اتجاه المستوى. كده إحنا حلِّلنا القوة ق. ونقول: بما أن الجسم متزن، إذن معادلتا اتزان الجسم هما … نبدأ بالقوة اللي في الاتجاه الرأسي: ر زائد مية جذر تلاتة جا ستين بتساوي الـ و. ونسمِّي دي المعادلة رقم واحد.

بعدين الاتجاه الأفقي فيه مية جذر تلاتة جتا ستين بتساوي جذر تلاتة عَ التلاتة ر. جتا ستين بتساوي نصّ. لمَّا نضربه في المية، يبقى خمسين جذر تلاتة بتساوي جذر تلاتة عَ التلاتة ر. نضرب الطرفين في جذر تلاتة، يبقى ردّ الفعل ر بيساوي مية وخمسين نيوتن. ونسمِّي المعادلة دي رقم اتنين.

وبالتعويض من اتنين في واحد، يعني هنشيل الـ ر ونخلِّيها مية وخمسين. يعني نقول: مية وخمسين زائد مية جذر تلاتة جا ستين بتساوي و. من هنا تبقى و بتساوي تلتمية نيوتن. وهو ده المطلوب عندنا في السؤال؛ إيجاد قيمة و بالنيوتن.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.