فيديو: خارج القسمة من رقمين

يوضح الفيديو كيفية حل مسائل القسمة التي لها خارج قسمة يتكوَّن من رقمين باستخدام القسمة المطولة؛ سواءٌ أكانت العملية لها باقٍ أو من دون باقٍ، وكيفية التحقق من منطقية الناتج باستخدام التقدير.

٠٥:٠٩

‏نسخة الفيديو النصية

خارج القسمة من رقمين.

في الفيديو ده هنحل مسائل قسمة، خارج القسمة ليها بيتكوّن من رقمين. عشان نقسم عدد مكوّن من رقمين، على عدد مكوّن من رقم واحد؛ بنقسم العشرات في الأول، بعد كده بنقسم الآحاد.

أوجد خارج قسمة واحد وتسعين على سبعة.

عشان نوجد خارج قسمة واحد وتسعين على سبعة، ممكن نقدّر الناتج باستخدام التقريب؛ عشان نعرف الناتج هيساوي قدّ إيه تقريبًا. فلو المطلوب هو واحد وتسعين على سبعة، هنقرّب الواحد وتسعين للمية. وهنقرّب السبعة للعشرة. بعدين نقسم مية على عشرة، هيساوي عشرة. ده معناه إن خارج القسمة المفروض يساوي تقريبًا عشرة.

بعدين نبدأ القسمة المطوَّلة. فنقسم العشرات في المقسوم، على المقسوم عليه. يعني تسعة على سبعة. فده هيساوي واحد. هنكتب واحد في الناتج. بعدين نضرب الواحد، في المقسوم عليه. يعني واحد في سبعة. فواحد في سبعة بيساوي سبعة. فنكتب سبعة. وبعدين نطرح تسعة ناقص سبعة، هيساوي اتنين. وبما إن اتنين أصغر من السبعة، فنكمّل ونكتب الواحد.

بعدين نقسم واحد وعشرين على السبعة. فهيبقى الناتج بيساوي تلاتة. فنكتب تلاتة في الناتج. بعدين نضرب تلاتة في المقسوم عليه. وتلاتة في سبعة، بيساوي واحد وعشرين. بعدين نطرح، فيبقى واحد وعشرين ناقص واحد وعشرين، بيساوي صفر. وبما إن ناتج الطرح بيساوي صفر، وما فيش أرقام تانية، كده عملية القسمة انتهت بدون باقي، وخارج القسمة بيساوي تلتاشر. يعني واحد وتسعين على سبعة، بيساوي تلتاشر.

ولو عايزين نتحقّق من إن الناتج منطقي، هنقارن خارج القسمة، بخارج قسمة التقدير. فهنلاقي إن تلتاشر قريبة للعشرة. وده معناه إن خارج القسمة منطقي.

في بعض الأحيان بيكون الرقم الموجود في أكبر قيمة مكانية، لا يمكن قسمته على المقسوم عليه. كان عدد الطلاب في أحد المعسكرات الصيفية، مائة واثنا عشر طالبًا. فإذا كانت كل خيمة تستوعب ستة طلاب، فكم خيمة يحتاج إليها الطلاب؟

يبقى العملية المطلوبة هي مية واتناشر على ستة. فأول حاجة هنستخدم التقدير. فهنقرّب المية واتناشر لمية وعشرين. فهيبقى مية وعشرين على ستة، بيساوي عشرين. وده معناه إن عدد الخيم المفروض يساوي تقريبًا عشرين.

فنبدأ القسمة المطوَّلة. فأكبر قيمة مكانية للمقسوم، هي المئات. لكن واحد ما نقدرش نقسمها على ستة. فبالتالي هنقسم أكبر قيمتين مكانيتين. يعني العشرات والمئات، على المقسوم عليه. يعني هنقسم حداشر على ستة. فده هيساوي واحد. فنكتب واحد في الناتج. بعدين نضرب الواحد في المقسوم عليه. وواحد في ستة، بيساوي ستة. فنكتب ستة. وبعدين نطرح، فحداشر ناقص ستة، هيساوي خمسة. وبما إن خمسة أصغر من ستة، فنكمّل ونكتب الاتنين.

بعدين نقسم اتنين وخمسين على ستة. فده هيساوي تمنية. بعدين نضرب تمنية في المقسوم عليه. فتمنية في ستة، بيساوي تمنية وأربعين. فنكتب تمنية وأربعين. بعدين نطرح اتنين وخمسين ناقص تمنية وأربعين، هيساوي أربعة. وبما إن أربعة أصغر من ستة، وما فيش أرقام تانية في المقسوم، تبقى عملية القسمة انتهت. ومية واتناشر على ستة، هيساوي تمنتاشر، والباقي أربعة. يعني الطلاب في المعسكر هيحتاجوا تمنتاشر خيمة. والأربعة الباقيين هياخدوا خيمة إضافية، هيبقى الناتج تسعتاشر خيمة.

ولو عايزين نتحقق من إن الناتج منطقي، هنقارنه بناتج التقدير. فهنلاقي إن تسعتاشر قيمة قريبة للعشرين. وده معناه إن الناتج منطقي.

يبقى في الفيديو ده اتعلمنا إزاي بنحلّ مسائل القسمة، اللي بيكون خارج القسمة بتاعها مكوّن من رقمين، باستخدام القسمة المطولة. في حالة إذا كانت المسألة ليها باقي، أو بدون باقي. وإزاي بنتحقق من منطقية الناتج باستخدام التقدير.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.