فيديو: المقارنة بين الوحدات المترية للطول

يوضح الفيديو كيفية المقارنة بين الوحدات المترية للطول، والعلاقة بين المتر والسنتيمتر، مع أمثلة توضيحية.

٠٣:٥٥

‏نسخة الفيديو النصية

في الفيديو ده هنعرف إزاي نقارن بين الوحدات المترية للطول، وهنحل بعض الأمثلة المختلفة.

وفي الأول خلينا نشوف ترتيب الوحدات المترية للطول من الأصغر للأكبر. وأصغر وحدة مترية عندنا هي الملليمتر، وبنرمز لها بـ مم. وبعد كده الوحدة المترية اللي أكبر من الميلليمتر هي وحدة السنتيمتر، وبنكتبها سم. والوحدة الأكبر من السنتيمتر هي وحدة المتر، وبنكتبها م. وأما أكبر وحدة مترية للطول فهي وحدة الكيلومتر، وبنكتبها كم.

ومن الشكل ده هنلاحظ إن الملليمتر هو الأصغر في الوحدات المترية للطول. وأما الكيلومتر فهو أكبر الوحدات المترية للطول. فمعنى كده إن أول وحدة أو أصغر وحدة هي الملليمتر. واللي أكبر منها على طول هي السنتيمتر. والأكبر منها المتر. وبعد كده كيلومتر وهي أكبر وحدة مترية للطول.

وأما المتر والسنتيمتر فعندنا علاقة بتربط ما بينهم، وهي إن الواحد متر بيساوي مية سنتيمتر. يعني لو عندنا حاجة طولها مية سنتيمتر، بنقدر نقول إن هي طولها واحد متر، وهكذا. لو عندنا حاجة تانية طولها تلتمية سنتيمتر، يبقى طولها تلاتة متر.

طيب خلينا نشوف بعض الأمثلة.

قارن بين الأ طوال مستخدمًا أكبر من أو أصغر من أو يساوي. وعندنا الطولين اللي عايزين نقارن بينهم، وهمّ تلاتين سنتيمتر وتلاتين متر. فزي ما عرفنا إن المتر أكبر من السنتيمتر. فبالتأكيد هيبقى التلاتين متر هي الأكبر. فبالتالي هيبقى تلاتين سنتيمتر أقل من تلاتين متر.

ونشوف مثال آخر. عايزين نقارن بين الطولين أربعة متر وربعمية سنتيمتر. هنلاحظ هنا إن الوحدات متر وسنتيمتر. وزي ما عرفنا إن فيه علاقة بتربط بين المتر والسنتيمتر، وهي إن الواحد متر بيساوي مية سنتيمتر. فلمّا نيجي نشوف أول طول هنا اللي هو أربعة متر. وزي ما عرفنا إن كل متر فيه مية سنتي، فمعنى كده إن أربعة متر هي هي ربعمية سنتيمتر. وبالتالي هيبقى الطول أربعة متر بيساوي الطول ربعمية سنتيمتر.

نشوف مثال آخر. عايزين نقارن بين الطولين اتنين متر وتلاتة ملليمتر. فزي ما عرفنا إن الملليمتر هو أصغر الوحدات المترية للطول. فمعنى كده إن المتر أكبر بكتير من الملليمتر. وبالتالي الطول اتنين متر أكيد هيبقى أكبر من الطول تلاتة ملليمتر.

وبكده نكون عرفنا إزاي نقارن بين الوحدات المترية للطول. وعرفنا إن أصغر الوحدات المترية للطول هي الملليمتر. بعد كده الأكبر منها هي السنتيمتر. بعد كده الوحدة الأكبر هي المتر. وأما أكبر واحدة مترية للطول فهي الكيلومتر. وعرفنا إن فيه علاقة بين السنتيمتر والمتر، وهي إن الواحد متر بيساوي مية سنتيمتر. وحلينا بعض الأمثلة المختلفة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.