فيديو: إيجاد تعبيرات الجمع والطرح

يوضح الفيديو التعبيرات، وأنها تتكوَّن من أعداد أو متغيرات أو أعداد ومتغيرات، وكيفية إيجاد قيمة التعبيرات التي تحتوي على عمليات جمع أو طرح، وأن الأولوية تكون لحل العمليات داخل الأقواس في التعبيرات.

٠٣:٤١

‏نسخة الفيديو النصية

إيجاد تعبيرات الجمع والطرح.

في الفيديو ده هنعرف إزاي بنوجد قيم التعبيرات الرياضية، اللي بتحتوي على عمليات الجمع والطرح. بدأ نادر هواية جمع طوابع البريد. واشترى مجموعة من اتناشر طابع بريدي. ومن باب التشجيع، أهداه والده مجموعة أخرى مِ الطوابع. يبقى عدد الطوابع اللي مع نادر دلوقتي، بتساوي اتناشر زائد س. حيث س هو مجموعة الطوابع اللي أهداها ليه والده.

بنسمي الصورة اتناشر زائد س، التعبير. والتعبير هو جملة عددية بتتكوّن من أعداد، أو متغيرات، أو أعداد ومتغيرات. والمتغير هو رمز بيدل على قيمة غير معروفة. ونقدر نوجد قيمة التعبير، إذا عرفنا قيمة المتغيرات الموجودة فيه. طيب إذا عرفنا إن عدد الطوابع اللي أهداها والد نادر ليه، هو ست طوابع. يبقى كام عدد الطوابع اللي عنده دلوقتي؟

عدد طوابع نادر دلوقتي بيساوي اتناشر زائد س. وبما إننا عرفنا إن قيمة س بتساوي ستة. فيبقى عدد الطوابع هيساوي اتناشر زائد ستة. واتناشر زائد ستة، بيساوي تمنتاشر. يبقى عدد الطوابع البريدية، اللي مع نادر دلوقتي، هو تمنتاشر طابع بريدي.

في بعض الأحيان، التعبيرات الرياضية بتحتوي على أقواس. وفي الحالة دي، بنحل العمليات اللي جوّه الأقواس في الأول. أوجد قيمة التعبير: اتناشر ناقص، ص زائد اتنين. إذا كانت ص بتساوي سبعة. نعيد كتابة التعبير الرياضي. اتناشر ناقص، ص زائد اتنين.

هنلاحظ إن التعبير بيحتوي على عمليتين. عملية طرح، وعملية جمع. وبما إن فيه أقواس، يبقى هنبدأ بعملية الجمع الأول. ومن المثال، ص بتساوي سبعة. يبقى التعبير هيساوي اتناشر ناقص … ص هنعوّض عنها بسبعة. زائد اتنين. ده هيساوي اتناشر ناقص … نحلّ عملية الجمع اللي داخل القوس. سبعة زائد اتنين، بيساوي تسعة. يبقى اتناشر ناقص تسعة، هيساوي تلاتة.

أوجد قيمة التعبير: خمسة وعشرين ناقص خمسة، زائد ع. إذا كانت ع بتساوي تسعة.

بنفس الطريقة، التعبير الرياضي بيحتوي على عمليتين. عملية طرح، وعملية جمع. وبما إنه بيحتوي على أقواس، فهنبدأ بعملة الطرح الأول. فنعيد كتابة التعبير الرياضي. خمسة وعشرين ناقص خمسة، زائد ع. ده هيساوي …

نبدأ بالعملية اللي داخل القوس. خمسة وعشرين ناقص خمسة، هيساوي عشرين. يبقى عشرين زائد ع. ومن المثال، ع بتساوي تسعة. فهنعوّض عن قيمة ع، بتسعة. يبقى التعبير هيساوي عشرين زائد تسعة. وعشرين زائد تسعة، هيساوي تسعة وعشرين.

يبقى في الفيديو ده عرفنا يعني إيه تعبير. وعرفنا إنه بيتكوّن من أعداد، أو متغيرات، أو أعداد ومتغيرات. وإزاي بنوجد التعبيرات اللي بتحتوي على عمليات جمع وطرح. وإن في حالة وجود أقواس في التعبير، يتمّ حل العمليات داخل الأقواس في الأول. وبعد كده بنوجد قيمة التعبير.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.