فيديو: حل المسائل الكلامية باستخدام جدول الضرب والجمع

اشترى باسم ٧ كتب بسعر ٥ جنيهات للكتاب، واشترى ٦ أقلام بسعر جنيهين للقلم. إذا كان المتبقي ٦ جنيهات، فكم كان معه من مال؟

٠٣:٠٥

‏نسخة الفيديو النصية

اشترى باسم سبع كتب، بسعر خمس جنيهات للكتاب. واشترى ست أقلام، بسعر جنيهين للقلم. إذا كان المتبقي ست جنيهات، فكم كان معه من مال؟

السؤال بيقول لنا إن فيه ولد اسمه باسم، اشترى كذا كتاب وكذا قلم. وبعد ما اشتراهم اتبقّى معاه فلوس. فعاوزين نعرف، قبل ما يشتري أصلًا الكتب والأقلام، كان معاه كام جنيه. تعالوا نشوف الأول هو اشترى إيه. باسم اشترى سبع كتب، الكتاب الواحد بخمسة جنيه. يبقى سعر الكتب اللي اشتراها إيه، أو ثمن الكتب إيه؟

عددهم، في قيمة الكتاب. إحنا قلنا إن عددهم سبع كتب، فنقول سبعة في … سعر أو ثمن الكتاب الواحد خمسة جنيه. السبعة في خمسة بتساوي خمسة وتلاتين. يبقى ده معناه إن تمن الكتب اللي هو اشتراها، خمسة وتلاتين جنيه.

بنفس الطريقة هنجيب تمن الأقلام. هو اشترى ست أقلام. وسعر القلم الواحد جنيهين، يعني اتنين جنيه. فنقول ثمن الأقلام بيساوي إيه؟ عددهم، في تمن القلم الواحد. عددهم ستة، في اتنين جنيه اللي هو تمن القلم الواحد. ستة في اتنين بيساوي اتناشر. يبقى هو تمن الأقلام اللي اشتراها اتناشر جنيه.

بعد ما اشترى الكتب والأقلام، اتبقّى معاه ستة جنيه. يبقى علشان نعرف هو كان معاه كام في الأول، هنجمع تمن الكتب، على تمن الأقلام، على الفلوس اللي اتبقّت معاه. فنقول خمسة وتلاتين، زائد اتناشر، زائد ستة. ونبدأ نجمع الآحاد. خمسة زائد اتنين زائد ستة.

أول حاجة هنجمعها خمسة زائد اتنين. بنعدّ بعد الخمسة اتنين، فبنقول بعد الخمسة: ستة، سبعة. وصلنا للسبعة. يبقى ناتج جمع خمسة واتنين، سبعة. بعدين نجمع سبعة وستة. السبعة في مخّنا، وست علامات قدامنا. ونعدّ بعد السبعة: تمنية، تسعة، عشرة، حداشر، اتناشر، تلتاشر. يبقى سبعة زائد ستة، بتساوي تلتاشر. هنكتب التلاتة هنا في الآحاد، والواحد فوق العشرات. نحطّه في دايرة.

بعدين نبدأ نجمع العشرات. واحد زائد تلاتة زائد واحد. واحد زائد واحد، اتنين. واتنين زائد تلاتة؟ التلاتة في مخنا، ونعدّ بعد التلاتة، اتنين. فنقول: أربعة، خمسة. تبقى تلاتة زائد اتنين، خمسة. فيبقى ناتج جمع خمسة وتلاتين، زائد اتناشر، زائد ستة؛ هو تلاتة وخمسين. فده معناه إن كان مع باسم تلاتة وخمسين جنيهًا. وهي دي الإجابة الصح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.