تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ضرب الأعداد الكسرية

سوزان فائق

يوضح الفيديو كيفية ضرب الأعداد الكسرية.

٠٤:٤٢

‏نسخة الفيديو النصية

في الفيديو ده هنتكلم على ضرب الأعداد الكسرية.

لضرب عددين كسريين بنكتب كل منهم في صورة كسر مركَّب، ثم نضرب كما في الكسور العادية خالص. بنضرب البسط في البسط، والمقام في المقام، زي المثال ده.

المثال بيقول: اوجد ناتج الرُّبع في أربعة وأربعة على خمسة.

أول حاجة هنحوّل العدد الكسري إلى كسر مركَّب. يعني هحول أربعة وأربعة على خمسة لكسر مركب هتبقى أربعة وعشرين على خمسة. وبعدين نضرب زي الكسور الاعتيادية. هنضرب رُبع في أربعة وعشرين على خمسة. هتساوي البسط في البسط، والمقام في المقام. وقبل ما نضرب البسط في البسط والمقام والمقام، نشوف فيه عوامل مشتركة، قاسم مشترك بين البسط والمقام اللي في الكسر التاني. يعني مثلًا الأربعة وعشرين والأربعة ما بينهم قاسم مشترك، اللي هو الأربعة. يعني هنقسم الأربعة على أربعة هتبقى واحد، وأربعة وعشرين عَ الأربعة هتبقى ستة. يبقى هنضرب البسط في البسط بعد كده. يبقى واحد في ستة على واحد في خمسة، اللي هي ستة على خمسة. هنبسطها هتبقى واحد وخُمس.

يبقى خطوات الحل عندنا، أول حاجة هنحوّل الأعداد الكسرية إلى كسر مركَّب. تاني خطوة إن إحنا نضرب بسط في بسط ومقام في مقام زي الكسور العادية بالضبط. وبعد كده نبسَّط.

نقلب الصفحة، وناخد مثال.

المثال بيقول: خزان أ سعته خمسة ونُص ألف متر مكعب، وخزان ب سعته اتنين وربع سعة الخزان أ. اوجد سعة الخزان ب.

يعني عندنا الخزان أ عندنا قيمة السعة بتاعته اللي هي خمسة ونص أ. لكن الخزان ب عندنا اتنين وربع سعة أ. يبقى معناها إن إحنا هنضرب خمسة ونص، ونشوف قد إيه الاتنين ورُبع دي من الخمسة ونُص. يبقى هنضرب خمسة ونُص في اتنين ورُبع. هتساوي … كده عندنا عددين كسريين. أول خطوة عندنا هنحوّل لكسر مركَّب. يعني الخمسة ونُص هنحوّلها هتبقى حداشر عَ الاتنين. في … اتنين وربع هنخليها تسعة على تمنية. وبعد كده نشوف لو فيه اختصارات هنختصرها، لو ما كانش يبقى هنضرب البسط في البسط والمقام في المقام. يبقى كده تسعة وتسعين على ستاشر. لمّا هنبسطها هتبقى ستة وتلاتة على ستاشر. يبقى ستة وتلاتة على ستاشر ألف متر مكعب. ده سعة الخزان ب.

نقلب الصفحة وناخد مثال كمان.

إذا كانت د تساوي واحد وسبعة على تمنية، وَ هـ تساوي تلاتة وتُلت. فما قيمة د هـ؟

هنحط د هـ. نعوّض عن كل واحد فيها؛ يعني الرمز د هنعوّض عليه بواحد وسبعة على تمنية. والـ هـ إحنا كده د هـ يعني مضروبين في بعض في الـ هـ قيمتها تلاتة وتُلت. كده هنضرب عددين كسريين في بعض. يبقى أول خطوة هنحوّل العدد الكسري إلى كسر مركَّب. هيبقى خمستاشر على تمنية. في … تلاتة وتلت هنحوّلها هتبقى عشرة على تلاتة. نشوف لو فيه اختصارات هنختصرها. عندنا هنا التلاتة والخمستاشر بينهم عامل مشترك اللي هو التلاتة. يبقى التلاتة عَ التلاتة فيها الواحد، والخمستاشر على التلاتة فيها الخمسة. وعندنا العشرة والتمنية بينهم الاتنين. يبقى هنقسم التمنية عَ الاتنين هتبقى أربعة. والعشرة على الاتنين هتبقى خمسة. وبعدين نضرب البسط في البسط، اللي هو خمسة في خمسة؛ على المقام في المقام. يبقى كده قيمة الناتج عندنا هتبقى خمسة وعشرين على أربعة. هنبسطها أكتر من كده، هتبقى ستة ورُبع. يبقى قيمة د هـ هتساوي ستة ورُبع.

يبقى اتكلمنا في الفيديو ده إزاي نضرب أعداد كسرية. أول خطوة عندنا إن إحنا بنحوّل العدد الكسري لصورة كسر مركَّب. وبعد كده بنضرب كما في الكسور الاعتيادية اللي هي نضرب البسط في البسط والمقام في المقام. ولو كان فيه اختصارات بنختصرها. وبعد كده بنبسط العدد النهائي.