فيديو: النسب المئوية والأعداد العشرية

يوضح الفيديو طريقة تحويل النسبة المئوية إلى عدد عشري، والعكس، مع أمثلة توضيحية.

٠٣:٤٨

‏نسخة الفيديو النصية

النسب المئوية والأعداد العشرية.

لو عايزين نكتب أيّ نسبة على شكل عدد عشري، هنكتبها إزاي؟ أول خطوة هنكتب النسبة المئوية. بعدين نكتبها على شكل كسر عادي، مقامه مية. وبعدين نحوّله لعدد عشري، أو نكتبه على شكل عدد عشري.

يعني لو عندنا على سبيل المثال، ستة وخمسين في المية، نسبة مئوية مكتوبة بالشكل ده. وإحنا عايزين نكتبها بشكل عدد عشري. هنكتبها الأول على شكل كسر عادي، يعني كسر مقامه مية؛ يعني ستة وخمسين على مية. وبعدين الكسر العادي ده، نقدر نكتبه بعد كده، في شكل عدد عشري. ستة وخمسين على مية، معناها ستة وخمسين من مية.

ولو عندنا نسبة مئوية مكتوبة بالشكل ده: تمنية في المية. بنفس الطريقة، هنكتبها الأول على شكل كسر عادي؛ يعني تمنية على مية، كسر مقامه مية. يبقى كده سهل نقدر نكتبها على شكل عدد عشري. تمنية على مية نقدر نكتبها بالشكل ده تمنية من مية.

لو عندنا نسبة أخرى مكتوبة بالشكل ده: مية وعشرين في المية. هحوّلها الأول لكسر لمقامه مية. المرة دي الكسر هيبقى كسر مركب. مية وعشرين على مية. هنحوّل الكسر المركب ده، لعدد كسري الأول. هيبقى بيساوي واحد، وعشرين على مية.

دلوقتي نقدر نحوّل العدد الكسري ده، لعدد عشري. هيبقى بيساوي واحد، وعشرين من مية. الصفر اللي عندنا، اللي على يمين العلامة ده، ليس له قيمة. مش بيغيّر ولا بيضيف أيّ قيمة للعدد اللي عندنا. فنقدر نكتبه بالشكل ده: هيبقى بيساوي واحد واتنين من عشرة. هو ده الشكل العدد العشري اللي بيمثّل النسبة المئوية اللي عندنا.

هنشوف دلوقتي في صفحة جديدة، إزاي لو مطلوب منّنا العكس. يعني لو عندنا عدد عشري، ومطلوب منّنا نكتبه في صورة نسبة مئوية. لو عندنا عدد عشري، وكان مطلوب منّنا نحوّله لشكل نسبة مئوية. لازم نعدّي الأول على مرحلة في النص، قبل ما نوصل لشكل النسبة المئوية. هنكتب العدد العشري الأول، على شكل كسر. وبعدين نحوّل الكسر ده، أو نكتبه على صورة نسبة مئوية.

فلو عندنا عدد عشري، زيّ اللي معطى ده: واحد وخمسة وأربعين من مية. وكان مطلوب منّنا نكتبه على شكل نسبة مئوية. أول خطوة هنكتبه على شكل كسر. يعني هنكتبه هنا، في الحالة دي، على شكل عدد كسري. يعني واحد وخمسة وأربعين على مية. بعد كده هنحوّل العدد الكسري ده، لشكل كسر مركب. واحد في مية بمية. زائد خمسة وأربعين، يبقى مية خمسة وأربعين، على نفس المقام؛ على مية. كده بقى على شكل كسر مركب.

دلوقتي بقى الكسر مقامه مية. وبقى عندنا من السهل إن إحنا نقدر نكتبه على شكل نسبة مئوية. فنقدر نقول إن هو هيبقى بيساوي مية خمسة وأربعين في المية. وبكده يبقى قدرنا نحوّل العدد العشري اللي عندنا ده، لنسبة مئوية.

وهنا اتعلّمنا في الدرس ده، إزاي نقدر نحوّل النسبة المئوية، لعدد عشري. وإزاي نقدر نحوّل العدد العشري، لنسبة مئوية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.