تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: الآحاد والعشرات

نهال عصمت

يوضح الفيديو بالأمثلة كيفية تكوين مجموعات من آحاد وعشرات.

٠٦:٥٠

‏نسخة الفيديو النصية

الآحاد والعشرات.

هنتعلم إزاي نكوّن مجموعات من عشرات وآحاد. بمعنى لو عندنا مكعب واحد أو نموذج واحد بالشكل ده. يبقى كده عندنا نموذج واحد فقط. يبقى خانة الآحاد هنكتب فيها واحد. يبقى عندنا واحد آحاد.

لكن لو عندنا ست نماذج بالشكل ده. يبقى خانة الآحاد كده فيها ستة. يبقى عندنا ستة آحاد. لكن لو عندنا تسع نماذج بالشكل ده. يبقى في الحالة دي خانة الآحاد فيها تسعة. يبقى عندنا تسعة آحاد. طب لو زودنا كمان نموذج على التسع نماذج. هيبقى عندنا عشر نماذج. يبقى كده كوّنّا مجموعة من عشرة. وبالتالي هيبقى عندنا خانة جديدة هنسميها خانة العشرات.

هنجيب صفحة جديدة ونشوف شكل العشر نماذج. هتبقى بالشكل ده. يبقى كده عندنا عشر نماذج. يبقى عندنا عشرة آحاد. أو ممكن نكتبها بطريقة تانية، وهي هنكتب هنا خانة الآحاد. وهنكتب هنا خانة العشرات. خانة الآحاد هنكتب فيها صفر، وخانة العشرات هنكتب فيها واحد. يبقى إحنا دلوقتي عندنا صفر آحاد وواحد عشرات.

هنبدأ نجيب صفحة جديدة، ونشوف مجموعة نماذج عايزين نكوّن منها مجموعات من عشرة.

مُعطى النماذج الآتية والمطلوب نستخدم النماذج في تكوين مجموعات من عشرة. هنبدأ نبص على النموذج الأول، هنلاقي عندنا أربع نماذج، كل نموذج مكوّن من عشر مكعبات. معنى كده إن إحنا عندنا أربعين آحاد. يعني أربعين مربّع. الأربعين مربّع دول كوّنوا أربع مجموعات، كل مجموعة مكوّنة من عشر مكعبات. يبقى إحنا كده عندنا أربعة عشرات. يبقى معنى كده إن الأربعين آحاد بتساوي أربعة عشرات.

هنبدأ نبص على النموذج التاني. هنلاقي إن عندنا سبع نماذج، كل نموذج مكون من عشر مكعبات. يبقى سبع نماذج، كل نموذج مكوّن من عشر مكعبات. يبقى عندنا سبعين مكعب. يبقى هنكتب سبعين آحاد. وسبعين آحاد بتساوي سبع عشرات. وإحنا فعلًا عندنا سبع نماذج كل نموذج مكوّن من عشر مكعبات. يعني عندنا سبع مجموعات، كل مجموعة مكونة من عشرة؛ يبقى عندنا سبع عشرات. والسبعين آحاد بتساوي سبع عشرات.

نبدأ نجيب صفحة جديدة، ونشوف أمثلة أخرى. لو عندنا مثلًا ستاشر مكعب بالشكل ده. يبقى عندنا ستة آحاد، وواحد عشرات. إزاي؟ يعني عندنا ست مكعبات بالشكل ده. وعندنا مجموعة تانية مكوّنة من عشر مكعّبات. يبقى كده عندنا ستة آحاد، وعندنا مجموعة واحدة بس مكوّنة من عشر مكعبات. يبقى عندنا واحد عشرات. يبقى لو عندنا ستاشر مكعب ممكن نكتبها على صورة آحاد وعشرات، وهي ستة آحاد، وواحد عشرات.

هنجيب صفحة جديدة، ونشوف أمثلة أخرى. عايزين نستخدم النماذج الآتية ونكوّن مجموعات من العشرات والآحاد ونكتب العدد.

عندنا في النموذج الأول أربعتاشر مكعب. معنى كده إن إحنا عندنا أربعتاشر آحاد. الأربعتاشر آحاد دي عبارة عن إيه؟ عبارة عن واحد عشرات، وأربعة آحاد. يبقى هنكتب مكان النقط واحد عشرات؛ يعني عندنا مجموعة واحدة بس مكوّنة من عشر مكعبات. وعندنا أربعة آحاد؛ يعني أربع مكعبات لوحدهم. يبقى كده العدد هو أربعتاشر.

أما في النموذج التاني هنبدأ نعدّ المكعبات، هنلاقي إن عندنا تمنتاشر مكعب. معنى كده إن إحنا عندنا تمنتاشر آحاد. والتمنتاشر آحاد بتساوي واحد عشرات وتمنية آحاد. يبقى هنكتب واحد عشرات وتمنية آحاد. وبالتالي العدد هو تمنتاشر. يبقى كده عرفنا نكون مجموعات من العشرات والآحاد.

هنجيب صفحة جديدة، ونشوف مثال آخر. لو عندنا خمسة وتلاتين آحاد، تساوي كام آحاد وكام عشرات؟ هنلاقيها إنها بتساوي خمسة آحاد، وتلاتة عشرات. معنى كده إن العدد هو خمسة وتلاتين.

لكن لو عندنا سبعة وستين آحاد؛ فده بتساوي كام آحاد، وكام عشرات؟ هنلاقي إنها بتساوي سبعة آحاد، وستة عشرات. معنى كده إن العدد هو سبعة وستين.

يبقى كده اتكلمنا عن الآحاد والعشرات، وعرفنا إزاي نكوّن مجموعات من عشرات وآحاد.