فيديو: كتابة نسبة مُعطاة في أبسط صورة

احسب ما يلي: ٩ × ((٧^٢) + ٨) − ٨.

٠٢:٠٤

‏نسخة الفيديو النصية

احسب ما يلي: تسعة في، سبعة تربيع زائد تمنية، ناقص تمنية.

يعني معطى عندنا المقدار ده، وعايزين نوجد قيمته. وخلينا في الأول نفتكر ترتيب العمليات. وترتيب العمليات عندنا بيبقى أول حاجة الأقواس، بعد كده الأُسُس، بعد كده الضرب والقسمة وآخر حاجة الجمع والطرح. فهنلاحظ في المقدار اللي عندنا إن عندنا عمليات ضرب، وعندنا عمليات جمع وطرح، وعندنا مقدار بين أقواس، وعندنا عدد مرفوع لأُس.

وزي ما عرفنا من ترتيب العمليات إن أول حاجة بنعملها هي حل ما بداخل الأقواس. ففي المقدار اللي عندنا أول حاجة هنعملها إننا هنحل ما بداخل الأقواس. فهيبقى المقدار هو تسعة في … وما بداخل الأقواس عندنا سبعة تربيع زائد تمنية. يعني عندنا عملية جمع، وفي نفس الوقت عندنا عدد مرفوع لأس. ومن ترتيب العمليات عرفنا إن اللي هنعمله الأول هو إننا نحل العدد المرفوع لأُس. يعني هنحسب قيمة سبعة تربيع. وسبعة تربيع معناها سبعة في سبعة، واللي هتساوي تسعة وأربعين. فبالتالي هيبقى ما بداخل الأقواس هو تسعة وأربعين زائد تمنية، وهينزل باقي المقدار زي ما هو.

فهنحسب ما بداخل الأقواس، يعني هنجمع تسعة وأربعين زائد تمنية. فهيبقى المقدار هو تسعة في … وهنجمع تسعة وأربعين زائد تمنية، واللي هتساوي سبعة وخمسين. وهنكتب باقي المقدار زي ما هو. فهيبقى المقدار هو تسعة في سبعة وخمسين، ناقص تمنية. يعني هيبقى عندنا عملية ضرب وعملية طرح.

ومن ترتيب العمليات عرفنا إننا بنعمل عملية الضرب والقسمة أولًا، فهنعمل الأول عملية الضرب اللي عندنا. يعني عايزين نوجد حاصل ضرب تسعة في سبعة وخمسين. فلمّا نحسب تسعة في سبعة وخمسين هتبقى بتساوي خمسمية وتلتاشر. فهيبقى المقدار هو خمسمية وتلتاشر ناقص تمنية.

فهيتبقى عندنا عملية الطرح، وهي آخر حاجة عندنا في ترتيب العمليات. فهنطرح خمسمية وتلتاشر ناقص تمنية. فلمّا نحسبها هتبقى بتساوي خمسمية وخمسة. وبالتالي هتبقى قيمة المقدار هي خمسمية وخمسة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.