فيديو: التحويل بين وحدات السعة في النظام المتري

يعرض الفيديو وحدات قياس السعة في النظام المتري، وكيفية التحويل بينها، مع أمثلة توضيحية.

٠٧:١٠

‏نسخة الفيديو النصية

هنتعرّف في الفيديو ده على وحدات قياس السعة في النظام المتري. وإزّاي بنقدر نحوّل بين الوحدات دي. الأول خلّونا نفتكر، يعني إيه السعة. السعة كانت كمية السائل، اللي بيتسع ليها وعاء ما. أو اللي يستطيع أن يحتوي عليها الوعاء. فإبريق العصير اللي قدامنا ده، يستطيع أن يحتوي على واحد لتر من العصير. فنقدر نقول إن سعته واحد لتر. برضو علبة العصير الكبيرة، اللي بنشتريها من المحل. لو قرينا اللي مكتوب عليها، هنلاقي إن مكتوب عليها واحد لتر. يعني السعة بتاعتها مقدارها واحد لتر. تقدر تحتوي على واحد لتر من العصير.

زيّ ما اللتر وحدة من وحدات قياس السعة في النظام المتري، عندنا وحدة أخرى، وهي وحدة الملليلتر. ووحدة الملليلتر هي وحدة صغيرة، بنستخدمها لقياس كميات السوائل الصغيرة. والعلاقة اللي بتربط اللتر بالملليلتر، هي إن الواحد لتر، بيساوي ألف ملليلتر. ولو حبينا نتخيّل هو الواحد ملليلتر ده، بيعبّر عن كمية سائل قدّ إيه. هنلاقي إن الواحد ملليلتر، هو تقريبًا كمية السائل اللي في القطارة.

ناخد بالنا إننا لمّا بنيجي نحوّل من اللتر إلى الملليلتر. يعني بنحوّل من وحدة كبيرة، لوحدة أصغر. هنستخدم عملية الضرب. هنضرب في ألف. أمّا العكس، لو جينا نحوّل من الملليلتر، إلى اللتر. يعني من الوحدة الصغيرة، للوحدة الأكبر. فهنستخدم عملية القسمة. هنقسم على ألف. لأن الواحد لتر، بيساوي ألف ملليلتر.

هنشوف بقى إزّاي هنستخدم العلاقة دي، في التحويل بين الوحدات اللي بنستخدمها في قياس السعة، في النظام المتري. في المثال اللي عندنا ده، عندنا فيه صنبور بيتقطّر منه الماء باستمرار. وبيُهدر حوالي تسعين لترًا من الماء كل أسبوع. مطلوب منّنا نعبّر عن المقدار ده من الماء، بالملليلترات.

يعني دلوقتي إحنا عايزين نشوف التسعين لتر من الماء دول، هيقابلهم قدّ إيه من الملليلترات. إحنا عايزين نحوّل من اللتر، إلى الملليلتر. يعني من الوحدة الكبيرة، للوحدة الأصغر. يعني هنعمل عملية ضرب. هنضرب في ألف. لأن الواحد لتر، بيكافئ ألف ملليلتر. يبقى نقدر نقول إن التسعين لتر دي، هنضربها في ألف. فهيبقى عندنا تسعين ألف ملليلتر. يبقى قدرنا نستنتج إن الصنبور اللي عندنا ده، هيُهدر تسعين ألف ملليلتر أسبوعيًّا.

في المثال اللي عندنا ده، هنلاقي وعاء بيتسع لخمسمية وتلاتين ملليلترًا من اللبن. مطلوب منّنا نعبّر عن المقدار ده من اللبن، باللترات. إحنا دلوقتي عايزين نشوف الخمسمية وتمانين ملليلتر دول، بيكافئهم قدّ إيه من اللترات. يعني عايزين نحوّل من الملليلتر، إلى اللتر.

إحنا عارفين إن الواحد لتر بيكافئه ألف ملليلتر. ولمّا بنيجي نحوّل من الوحدة الكبيرة للوحدة الصغيرة، يعني من اللتر للملليلتر، هنضرب في ألف. العكس، لو جينا نحوّل من الملليلتر، اللي هي الوحدة الأصغر. إلى اللتر، اللي هي الوحدة الأكبر. في الحالة دي هنستخدم عملية القسمة. وهنقسم على ألف.

في الحالة اللي عندنا دي، إحنا بنحوّل من الملليلتر اللي هي الوحدة الصغيرة، إلى الوحدة الأكبر. يبقى هنقسم على ألف. فهتبقى بتساوي خمسمية وتمانين على ألف لتر. أو نقدر نكتبها على صورة عدد عشري. فهتبقى تمنية وخمسين من مية لتر.

المثال اللي عندنا ده، هنلاقي إن في أحد المحال التجارية، فيه زيت طهي معبأ في زجاجات. سعة الزجاجة الواحدة منها واحد ونص لتر. وفيه زجاجات أخرى. سعة الزجاجة الواحدة ألف خمسمية سبعة وتلاتين ملليلتر. يا ترى أيهما أكبر؛ الزجاجة الأولى، ولّا الزجاجة الثانية؟

يبقى إحنا دلوقتي عايزين نقارن بين السعتين. بس فيه حاجة هتعمل لنا مشكلة في المقارنة دي. عندنا العبوة الأولى سعتها باللتر، والتانية سعتها بالملليلتر. ما نقدرش نقارن بين السعتين إلّا لو كان ليهم نفس وحدة القياس. يعني لازم نخلّي الزجاجتين نقيس السعة بتاعتهم يا إمّا باللتر، يا إمّا بالملليلتر. فهنحوّل سعة الزجاجة الأولى، اللي هي واحد ونص لتر، إلى ما يكافئها بالملليلترات.

إحنا عارفين إن الواحد لتر، بيكافئه ألف ملليلتر. يبقى واحد ونص لتر، هنحوّلها بإننا هنضربها في ألف. وده هيطلّع لنا ألف وخمسمية ملليلتر. يعني الواحد ونصف لتر، هيكافئهم ألف وخمسمية ملليلتر. دلوقتي نقدر نقارن السعتين ببعض؛ عشان ليهم نفس وحدة القياس، اللي هي الملليلتر. هنلاقي أول زجاجة سعتها ألف وخمسمية ملليلتر. والزجاجة التانية سعتها ألف خمسمية سبعة وتلاتين ملليلتر. كده الزجاجة الثانية سعتها أكبر من الزجاجة الأولى. يعني الواحد ونصف لتر، أقل من الألف خمسمية سبعة وتلاتين ملليلتر. كده قدرنا نستنتج إن الزجاجة الثانية سعتها أكبر.

في المثال اللي عندنا ده، بنعرف إن فيه عائلة بتستهلك أسبوعيًّا ست زجاجات من اللبن. سعة كلّ منها ألف ومية ملليلتر. مطلوب منّنا نوجد باللتر، كمية اللبن اللي بتستهلكها العائلة دي أسبوعيًّا. استهلاك العائلة الأسبوعي، هيبقى عبارة عن ست زجاجات من اللبن، في سعة كل زجاجة، اللي هي ألف ومية ملليلتر. كده هنوجد استهلاكها في الأسبوع، بس بالملليلتر. اللي هنلاقيه ست آلاف وستمية ملليلتر. ده كده استهلاكها الأسبوعي من اللبن، بس بالملليلتر.

دلوقتي عايزين نحوّل الاستهلاك ده، لمّا ما يكافئه باللترات. عشان نحوّل من الملليلتر، إلى اللتر. مِ الوحدة الصغيرة للوحدة الأكبر، هنقسم على ألف. لأن اللتر الواحد، بيكافئه ألف ملليلتر. يبقى هنقسم ست آلاف وستمية ملليلتر، على ألف. هنختصر عدد متساوي من الأصفار، من البسط والمقام. هنلاقي إن الاستهلاك عبارة عن ستة وستين على عشرة. نقدر نكتبه على صورة عدد عشري مكافئ، اللي هو ستة وستة من عشرة لتر. يبقى قدرنا نستنتج إن الأسرة دي هتستهلك ستة وستة من عشرة لتر من اللبن أسبوعيًّا.

عرفنا في الدرس ده إيه مفهوم السعة. وإيه الوحدات المستخدمة لقياس السعة، في النظام المتري. وإيه العلاقة اللي بتربط بينهم، واللي بنستخدمها في التحويل بين الوحدات دي. وعرفنا إننا لمّا بنيجي نقارن السعة مكتوبة بوحدات مختلفة … لازم قبل ما نجري المقارنة دي، نحوّل السعات اللي عندنا، لنفس الوحدة. عشان نقدر نقارن السعة مع بعض.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.