فيديو: ترتيب الأعداد الكسرية ترتيبًا تنازليًّا

رتِّب الأعداد الموجودة على البطاقات ترتيبًا تنازليًّا.

٠٣:٤٣

‏نسخة الفيديو النصية

رتب الأعداد الموجودة على البطاقات ترتيبًا تنازليًّا.

عشان نرتب الأعداد ترتيب تنازلي، هنرتبها من الأكبر للأصغر. فبالنظر للبطاقات هنلاقي الأعداد كسرين وعددين كسريين، فهنوحد صورتهم ونكتبهم على شكل كسور. فعشان نحوّل العدد الكسري واحد واتنين على تلاتة إلى صورة كسر، هنضرب واحد في المقام اللي هو تلاتة، بعدين نجمع حاصل الضرب مع اتنين اللي هي البسط؛ فواحد في تلاتة هيساوي تلاتة، بعدين نجمع تلاتة على البسط يبقى تلاتة زائد اتنين هيساوي خمسة؛ يبقى واحد واتنين على تلاتة هيساوي خمسة على تلاتة.

العدد الكسري التاني واحد وواحد على أربعة، هنضرب واحد في المقام ونجمع حاصل الضرب مع البسط، فواحد في أربعة هيساوي أربعة، وأربعة زائد البسط اللي هو واحد هيساوي خمسة؛ يبقى واحد وواحد على أربعة هيساوي خمسة على أربعة. كده يبقى الأعداد كلها على صورة كسور.

بعد كده عشان نقدر نقارن الكسور هنوحّد المقامات، فهنضرب البسط والمقام في الكسر الأول في تمنية، فهيبقى واحد على تلاتة بيساوي واحد في تمنية، على تلاتة في تمنية، فهيساوي تمنية على أربعة وعشرين.

بالنسبة للكسر التاني هنضرب البسط والمقام في تلاتة، فالكسر خمسة على تمنية هيساوي خمسة في تلاتة، على تمنية في تلاتة، ده هيساوي خمستاشر على أربعة وعشرين.

الكسر التالت هو خمسة على تلاتة، فهنضرب البسط والمقام برضو في تمنية، هيبقى خمسة في تمنية، على تلاتة في تمنية، ده هيساوي أربعين على أربعة وعشرين.

بعدين الكسر الأخير خمسة على أربعة، هنضرب البسط والمقام في ستة، فده هيساوي خمسة في ستة، على أربعة في ستة، وده هيساوي تلاتين على أربعة وعشرين.

كده نبقى وحدنا مقامات الكسور الأربعة. وبمقارنة الكسور هنلاقي إن أكبر بسط هو أربعين؛ يبقى أربعين على أربعة وعشرين هو أكبر كسر؛ يليه البسط تلاتين، يبقى تلاتين على أربعة وعشرين هو الكسر التاني؛ يليه البسط خمستاشر، يبقى خمستاشر على أربعة وعشرين هو الكسر التالت؛ وفي النهاية الكسر تمنية على أربعة وعشرين.

يبقى ترتيب الكسور تنازليًّا هو: أربعين على أربعة وعشرين، يليه تلاتين على أربعة وعشرين، يليه خمستاشر على أربعة وعشرين، يليه تمنية على أربعة وعشرين؛ وبالتالي الترتيب التنازلي للأعداد الموجودة على البطاقات هو: واحد واتنين على تلاتة، يليه واحد وواحد على أربعة، يليه خمسة على تمنية، يليه واحد على تلاتة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.