فيديو: التحويل من الكيلومترات إلى الأمتار

المسافة بين مدرسة رامي وبيته ٥ كم. إذا سار رامي مسافة ٨٤٤ م، فكم مترًا يتبقى؟

٠٤:١٣

‏نسخة الفيديو النصية

المسافة بين مدرسة رامي وبيته خمسة كيلومتر. إذا سار رامي مسافة تمنمية أربعة وأربعين متر، فكم مترًا يتبقَّى؟

فيه ولد اسمه رامي. المسافة بين بيته ومدرسته خمسة كيلومتر. والسؤال بيقول لنا: لو رامي مشي مسافة تمنمية أربعة وأربعين متر، هيتبقَّى كام متر؟ فعلشان نعرف نجاوب على السؤال ده، أول حاجة هنعملها هي إننا هنحوّل من الكيلومتر للمتر. طيب إحنا علشان نحوّل من الكيلومتر للمتر، محتاجين نعرف الأول هو الكيلومتر فيه كام متر. الكيلومتر فيه ألف متر. يبقى إحنا علشان نحوّل من الكيلومتر للمتر، محتاجين نضرب في ألف.

طيب هي المسافة بين المدرسة والبيت قدّ إيه؟ خمسة كيلومتر. يبقى إحنا علشان نحوّل الخمسة كيلومتر، ونخلّيها بالمتر، محتاجيين نضرب في ألف. فهنضرب خمسة في ألف. الخمسة في ألف بتساوي خمسة آلاف. يبقى ده معناه إن المسافة بين البيت والمدرسة هو خمسة، أو هي خمسة آلاف متر.

رامي بقى مشي تمنمية أربعة وأربعين متر من الخمسة آلاف دول. فعلشان نعرف الباقي هنطرح. هنقول: خمسة آلاف ناقص تمنمية أربعة وأربعين. والناتج اللي هيطلع هتبقى هي المسافة الباقية.

فأول حاجة هنعملها هي إننا هنكتب الخمسة آلاف. أول صفر، وتاني صفر، وتالت صفر، بعدين الخمسة. بعدين نحطّ علامة الناقص، ونكتب تمنمية أربعة وأربعين. نكتبها إزاي؟ أول أربعة، اللي هي الآحاد، تحت الصفر الأولاني. والأربعة التانية، اللي هي العشرات، تحت الصفر التاني. والتمنية، اللي هي المئات، تحت الصفر التالت. بعدين نشدّ خطّ الناتج، ونبدأ نطرح.

هنقول صفر ناقص أربعة. نبدأ بطرح الآحاد. هل ينفع نشيل أربعة من صفر؟ لأ طبعًا. ده الصفر صغيّر. هنعمل إيه؟ نحاول نستلف من اللي جنبه. هنلاقيه برضو صفر صغيّر، وما ينفعش ناخد منه حاجة. فنروح للي جنبه. برضو صفر، وأصغر عدد، وما ينفعش ناخد منه حاجة. نروح للي بعده، نلاقيها خمسة. آه، ينفع ناخد مِ الخمسة. فناخد مِ الخمسة واحد، نخلّيها أربعة.

الواحد اللي خدناه من الخمسة دي هندِّيه للصفر الأول ده، فهيبقى عشرة. طيب ما هي الصفر اللي جنبه ده محتاج، فيدِّي له واحد يخلِّيه عشرة، وهو يبقى تسعة. طيب ما هو الصفر اللي جنبه ده محتاج، فيدِّي له واحد، يخلِّيه عشرة، وهو يبقى تسعة. يبقى كده إحنا بعد ما استلفنا، أول صفر بقى عشرة، وده بقى تسعة، وده بقى تسعة. والخمسة بقت أربعة.

فنبدأ بقى كده نعرف إيه؟ نطرح. ونقول: عشرة ناقص أربعة، عشرة ناقص أربعة بتساوي ستة. بعدين نطرح العشرات؛ تسعة ناقص أربعة، تسعة ناقص أربعة تساوي خمسة. بعدين نطرح المئات؛ تسعة ناقص تمنية، تسعة ناقص تمنية بتساوي واحد. وآخر حاجة هنعملها هي طرح الألوف. هنبصّ عَ الألوف، نلاقي فيها أربعة، وما فيش تحتها حاجة، فننزّل الأربعة. فالأربعة تنزل هنا. ويبقى ناتج الطرح هو أربعة آلاف مية ستة وخمسين.

فده معناه إن المسافة اللي باقية لرامي هي: أربعة آلاف مية ستة وخمسين متر. وهي دي الإجابة الصحّ.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.