فيديو: تحديد دالة تعبِّر عن تحويلة هندسية

في الشكل الموضّح انتقلت أ إلى ب. ما الدالة التي تصف هذه التحويلة الهندسية؟

٠٢:٤٥

‏نسخة الفيديو النصية

في الشكل الموضّح انتقلت أ إلى ب. ما الدالة التي تصف هذه التحويلة الهندسية؟

يعني هنلاحظ عندنا في الصورة، إن الشكل أ انتقل إلى الشكل ب، فعايزين نوجد الدالة اللي بتصف هذا الانتقال. وعشان نوجد الدالة، يبقى عايزين نشوف الشكل أ اتحرّك بمقدار قد إيه في الاتجاه الموازي لمحور السينات. وبرضو اتحرّك بمقدار قد إيه في الاتجاه الموازي لمحور الصادات. فعشان نعمل كده، يبقى هنوجد إحداثي نقطة على الشكل أ. وعشان نعمل كده، يبقى هنوجد إحداثيات نقطة على الشكل أ، ولتكن النقطة دي. وبعد كده هنشوف إحداثيات النقطة بعد الانتقال، واللي هتبقى النقطة دي.

فهنشوف إحداثيات النقطة اللي على الشكل أ، وهنلاحظ إنها موجودة عند سالب واحد على محور السينات، وواحد على محور الصادات. فهتبقى إحداثيات النقطة هي سالب واحد وواحد.

بعد كده هنشوف إحداثيات النقطة في الشكل ب، بعد الانتقال. فهنلاحظ إن النقطة موجودة عند خمسة على محور السينات، وتلاتة على محور الصادات. فبالتالي هيبقى إحداثيات النقطة بعد الانتقال هي خمسة وتلاتة.

وعشان نشوف مقدار الانتقال، يبقى هنشوف مقدار زيادة س. فهنلاحظ إن النقطة قبل الانتقال كان إحداثي الـ س بتاعها سالب واحد، وبعد كده بقت خمسة. فبالتالي هتبقى زادت ست وحدات. بعد كده هنشوف التغير اللي حصل في إحداثي الـ ص للنقطة بعد الانتقال. ففي الأول النقطة قبل الانتقال كان إحداثي الـ ص ليها واحد. وبعد الانتقال، بقى إحداثي الـ ص تلاتة. فمعنى كده إن حصل زيادة بمقدار وحدتين.

وبالتالي عشان نكتب الدالة اللي بتصف الانتقال، فهنفرض إن النقطة اللي على الشكل أ قبل الانتقال، س وَ ص. وبالتالي هتبقى النقطة اللي على الشكل ب بعد الانتقال، إحداثي الـ س لها زاد مقدار ست وحدات، فهيبقى إحداثي الـ س لها س زائد ستة. وبنفس الطريقة إحداثي الـ ص زاد بمقدار وحدتين، فهيبقى إحداثي الـ ص للنقطة، ص زائد اتنين. وبالتالي هتبقى هي دي الدالة اللي بتصف هذه التحويلة الهندسية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.