تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تحديد معادلة الضرب الخطية ذات الخطوة الواحدة بحل مختلف

نادر عاطف

أيّ معادلة من المعادلات الآتية تختلف عن المعادلات الأخرى؟ [أ] ٣س = ١٨ [ب] ٤س = ٢٤ [ج] ١٠س = ٦٠ [د] ١٢س = ٢٤

٠٢:٣٣

‏نسخة الفيديو النصية

أيّ معادلة من المعادلات الآتية تختلف عن المعادلات الأخرى؟ ومعطى عندنا الاختيارات؛ أ: تلاتة س تساوي تمنتاشر. ب: أربعة س تساوي أربعة وعشرين. ج: عشرة س تساوي ستين. د: اتناشر س تساوي أربعة وعشرين.

فعشان نشوف أنهي معادلة بتختلف عن المعادلات الأخرى، يبقى في الأول هنبدأ نحل ّكل معادلة. هنبدأ نشوف أول معادلة عندنا، اللي هي تلاتة س تساوي تمنتاشر. فعشان نحلّ المعادلة، يعني عشان نوجد قيمة س، يبقى هنقسم طرفَي المعادلة على تلاتة؛ فهيبقى الطرف الأيمن للمعادلة تلاتة س على تلاتة، فهنختصر تلاتة مع تلاتة فهيتبقّى س. وأمّا الطرف الأيسر فهنقسم تمنتاشر على تلاتة، فلمّا نحسبها هتبقى بتساوي ستة. وبالتالي هتبقى قيمة س هي ستة.

بعد كده هنشوف المعادلة اللي في اختيار ب، اللي هي أربعة س تساوي أربعة وعشرين. فبنفس الطريقة، عشان نوجد قيمة س يبقى هنقسم طرفَي المعادلة على أربعة؛ فهيبقى الطرف الأيمن للمعادلة أربعة س على أربعة، ونختصر أربعة مع أربعة فيتبقّى س. وأمّا الطرف الأيسر فهنقسم أربعة وعشرين على أربعة، فلمّا نحسبها هتبقى بتساوي ستة. فبالتالي هتبقى قيمة س هي ستة.

بعد كده هنشوف المعادلة اللي في اختيار ج، اللي هي عشرة س تساوي ستين. فبنفس الطريقة، عشان نوجد قيمة س يبقى هنقسم طرفَي المعادلة على عشرة؛ فهيبقى الطرف الأيمن للمعادلة عشرة س على عشرة. نقدر نختصر عشرة مع عشرة فيتبقّى س. وأمّا الطرف الأيسر فهيبقى ستين على عشرة، فلمّا نحسبها هتبقى بتساوي ستة. وبالتالي هتبقى قيمة س هي ستة.

بعد كده هنشوف آخر اختيار عندنا؛ الاختيار د: اتناشر س تساوي أربعة وعشرين. فبنفس الطريقة، عشان نوجد قيمة س يبقى هنقسم طرفَي المعادلة على اتناشر؛ فهيبقى الطرف الأيمن للمعادلة اتناشر س على اتناشر، فنقدر نختصر اتناشر مع اتناشر فيتبقّى س. وأمّا الطرف الأيسر للمعادلة فهنقسم أربعة وعشرين على اتناشر، فلمّا نحسبها هتبقى بتساوي اتنين. وبالتالي هتبقى قيمة س هي اتنين.

ومن هنا هنلاحظ إن أول تلات معادلات كانت ليهم نفس القيمة اللي هي ستة، وأمّا المعادلة اللي في الاختيار د، فكانت قيمة س هي اتنين، فهتبقى هي دي اللي مختلفة عن المعادلات التانية. فبالتالي هيبقى إجابة السؤال «أيّ معادلة من المعادلات الآتية تختلف عن المعادلات الأخرى؟»، فهتبقى الإجابة هي الاختيار د: اتناشر س تساوي أربعة وعشرين.