فيديو: حل المسائل الكلامية من خطوتين باستخدام الضرب

يرسم نبيل تصميمًا لحديقة. قسَّم نبيل الحديقة إلى ٣ صفوف و٥ أعمدة. قرَّر نبيل زراعة وردتين في كل مربع. كم وردة ستكون في الحديقة؟

٠٢:٤٢

‏نسخة الفيديو النصية

يرسم نبيل تصميمًا لحديقة. قسّم نبيل الحديقة إلى تلات صفوف، وخمس أعمدة. قرّر نبيل زراعة وردتين في كل مربع. كم وردة ستكون في الحديقة؟

فيه ولد اسمه نبيل. نبيل عنده الحديقة دي. قسّمها لتلات صفوف: أهو ده صف، اتنين، تلاتة. وخمس أعمدة: عمود، اتنين، تلاتة، أربعة، خمسة. بعد التقسيم ده، نتج لنا المربعات اللي قدامنا. السؤال عندنا: لو نبيل قرّر إنه يزرع في كل مربع وردتين، يبقى الحديقة كلها فيها كام وردة؟

علشان نعرف نجاوب على السؤال ده، هنعرف الأول الحديقة فيها كام مربع. يبقى أول حاجة هنجيبها، هي عدد المربعات في الحديقة. طب هنجيبها إزاي؟ مش إحنا عندنا تلات صفوف، وعندنا خمس أعمدة؟ لو ضربنا تلاتة في خمسة، هينتج عدد المربعات اللي قدامنا دي. طب هو التلاتة في خمسة بإيه؟ بخمستاشر. يبقى كده إحنا عندنا خمستاشر مربع.

طيب عاوزين بقى نعرف عدد الورد في الجنينة كلها، أو في الحديقة كلها. يبقى تاني حاجة هنجيبها، هو عدد الورد في الحديقة. عدد الورد هيساوي إيه؟ عدد المربعات، وعدد الورد في كل مربع. يعني إيه؟ إحنا قلنا إن نبيل هيزرع في كل مربع وردتين. طب هم كام مربع؟ خمستاشر مربع. كل مربع فيه كام وردة؟ فيه وردتين. يبقى ناتج خمستاشر في اتنين، هو عدد الورد اللي موجود في الحديقة.

طيب خمستاشر في اتنين بكام؟ تعالوا هنكتبهم بشكل رأسي، ونبدأ نضرب. خمستاشر في اتنين. أول حاجة هنضرب الاتنين في خمسة. اتنين في خمسة بعشرة؛ صفر تحت الاتنين، والواحد فوق الواحد. بعدين هنضرب الاتنين في واحد. اتنين في واحد باتنين، ونجمع عليها الواحد ده، يبقى تلاتة. معنى كده الاتنين في خمستاشر بتساوي تلاتين وردة. يبقى هو ده عدد الورد في الحديقة؛ تلاتين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.