فيديو: التحويل من الكيلوجرامات إلى الجرامات

اشترت سالي علبة دقيق وعلبة شاي. إذا كان وزن العلبتين ٤/٣ ٢ كجم، ٨٢٥ جم، فما وزنهما الكلي بالجرام؟

٠٣:٢٩

‏نسخة الفيديو النصية

اشترت سالي علبة دقيق، وعلبة شاي. إذا كان وزن العلبتين اتنين وتلاتة على أربعة كيلوجرام، وتمنمية خمسة وعشرين جرام، فما وزنهم الكلي بالجرام؟

عشان نعرف وزن العلبتين بالجرام، هنكتب وزن العلبة الأولى بالجرام، بعدين نجمعه مع وزن العلبة التانية. وزن العلبة الأولى بيساوي اتنين وتلاتة على أربعة كيلوجرام. وده بيساوي اتنين زائد تلاتة على أربعة كيلوجرام. الكيلوجرام الواحد بيساوي ألف جرام. وبالتالي هنضرب ألف في اتنين، وفي تلاتة على أربعة. يبقى وزن العلبة الأولى هيساوي اتنين في ألف، زائد تلاتة على أربعة، في ألف.

وفي حالة ضرب عدد في إحدى قوى العشرة. زيّ عشرة، أو مية، أو ألف، وهكذا … بنحرّك العلامة العشرية باتجاه اليمين، بعدد حركات بيساوي أصفار قوة العشرة. اللي هي في الحالة دي، تلات أصفار. يبقى ده هيساوي الأول العدد اتنين، العلامة العشرية على يمينه. هنحرّكها بمقدار تلات حركات، باتجاه اليمين. بعدين نحطّها مرة تانية. وأماكن الحركات اللي ما فيهاش أرقام، هنحطّ أصفار. وبالتالي اتنين في ألف، بيساوي ألفين. زائد … بتطبيق نفس الطريقة مع تلاتة على أربعة في ألف، ده هيساوي تلات آلاف على أربعة.

بعد كده هنستخدم القسمة المطوّلة، عشان نوجد قيمة تلات آلاف على أربعة. وبما إن أول رقم من اليسار هو تلاتة، وهو أصغر من أربعة. فهنقسم أول رقمين من اليسار، على أربعة. تلاتين على أربعة، أقرب ناتج ليها هو سبعة. بعدين هنضرب سبعة في أربعة، فالناتج هيساوي تمنية وعشرين. بعدين نطرح تلاتين ناقص تمنية وعشرين، هيساوي اتنين. وننزّل صفر ونكمّل.

عشرين على أربعة، هيساوي خمسة. وخمسة في أربعة، بيساوي عشرين. بعدين نطرح عشرين ناقص عشرين، هيساوي صفر. بعد كده ننزّل آخر صفر، ونكمّل. صفر على أربعة، هيساوي صفر. وصفر في أربعة، بيساوي صفر. وصفر ناقص صفر، بيساوي صفر. يبقى تلات آلاف على أربعة، بيساوي سبعمية وخمسين. يبقى ده هيساوي ألفين زائد سبعمية وخمسين. يعني هيساوي ألفين وسبعمية وخمسين.

يبقى وزن العلبة الأولى بيساوي ألفين وسبعمية وخمسين جرام. يبقى وزن العلبتين الكلي بيساوي … وزن العلبة الأولى، اللي هو ألفين وسبعمية وخمسين جرام؛ زائد وزن العلبة التانية، اللي هو تمنمية خمسة وعشرين جرام. ومجموعهم بيساوي تلات آلاف وخمسمية وخمسة وسبعين جرام.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.