فيديو: تحويل الكسر إلى نسبة مئوية والعكس

سوزان فائق

يوضح الفيديو مفهوم النسبة، والنسبة المئوية، وكيفية تحويل النسبة إلى نسبة مئوية، وكيفية تحويل الكسر إلى نسبة مئوية والعكس.

٠٦:٥٥

‏نسخة الفيديو النصية

في الفيديو ده هنتكلّم على تحويل الكسر إلى نسبة مئوية والعكس. هنعرف يعني إيه نسبة. ويعني إيه نسبة مئوية. وإزّاي أحوّل الكسر إلى النسبة المئوية والعكس.

النسبة هي مقارنة ما بين كمّيتين باستخدام القسمة. لو عندنا مثلًا كمية تسعة من مية. بنقدر نكتبها على شكل نسبة. وبتبقى بالشكل ده. يا إما نكتبها تسعة إلى مية، أو تسعة على مية. ولمّا تكون النسبة بتقارن بين عدد أي عدد والمية. بيمكن كتابتها على صورة نسب مئوية.

يعني تعريف النسبة المئوية هي نسبة تقارن عددًا ما بمية. أي عدد على المية هيساوي العدد في المية. والعلامة دي هي اللي بنرمز ليها بالنسب المئوية.

المربعات اللي قدامنا دي عبارة عن مية مربع. ظللنا منهم بس تسعة. فدي بنقول عليها تسعة من مية. والنسبة المئوية بتاعتهم بتبقى تسعة في المية. ناخد مثال إزّاي هنكتب النسبة على صورة نسبة مئوية.

في المثال: اكتب النسب الآتية على صورة نسبة مئوية. أجابت منى تسعين ونص سؤال من مية سؤال.

يعني عايزين نعرف نسبة عدد الأسئلة اللي جاوبتها منى. النسبة المئوية هنحسبها بإن إحنا العدد اللي هيدّيهولنا هنحط له المقام مية. هنشيل المية دي ونحطها شكل العلامة في المية. يبقى هي جاوبت تسعين ونص في المية من الأسئلة.

ناخد الجزئية التانية في السؤال: في المتوسط خمسين من مية طالب يمتلكوا حيوان أليف.

يبقى الخمسين هنحطها على مقام مية. هنشيل المية نحط مكانها علامة في المية. والعدد هنحطه زي ما هو خمسين.

كده عرفنا إزّاي هنكتب النسبة على صورة نسبة مئوية. هنعرف إزّاي نكتب الكسر على صورة نسبة مئوية والعكس. الكسور والنسب المئوية هي نِسَب من الممكن أن تعبر عن نفس العدد. وبالتالي يمكن كتابة الكسر على صورة نسبة بإيجاد الكسر المكافئ بمقام يساوي مية.

يعني مثلًا الكسر أربعة على خمسة. ممكن أخليه كسر مكافئ بس المقام بتاعه مية. يعني علشان أوصّل المقام لمية. يبقى بضرب البسط والمقام في نفس العدد. الخمسة علشان تبقى مية هنضربها في عشرين. يبقى هنضرب كمان البسط في عشرين. يبقى البسط هيبقى تمانين على مية. وبالتالي التمانين على مية ده بيعتبر كسر مكافئ للأربعة على خمسة.

هناخد مثال إزّاي هنحوّل الكسر إلى نسبة مئوية.

اكتب الكسر تلاتة على عشرين على صورة نسبة مئوية.

هنوجد كسر مكافئ للتلاتة على عشرين، بس يكون المقام بتاعه مية. يعني التلاتة على عشرين هتساوي حاجة مقامها مية. عشان نخلّي المقام يبقى مية. يعني العشرين دي هنضربها في خمسة. ونفس العدد اللي هنضربه في المقام هنضربه في البسط. يبقى البسط هيبقى خمستاشر والمقام هيبقى مية. عشان نحوّل الكسر ده لنسبة مئوية اللي هو الخمستاشر على مية. هناخد المية دي نحطها على شكل علامة في المية. والخمستاشر اللي هو العدد هنسيبه زيّ ما هو. يبقى التلاتة على عشرين صورتها في النسبة المئوية هيبقى خمستاشر في المية. اللي هي في الرسم زي ما إحنا شايفين كده. تلات خانات متظللين على عشرين، بيكافؤا خمستاشر على مية. خمستاشر خانة متظلّلة من مية خانة موجودة عندنا. واللي هي النسبة بتساوي خمستاشر في المية.

هناخد مثال كمان: يوجد سبعتاشر من خمسة وعشرين سعر حراري في إحدى أنواع الجبن؛ بسبب الدهون. احسب النسبة المئوية من السعرات الحرارية للدهون الموجودة في هذا النوع.

يعني عايزين نحوّل الكسر سبعتاشر من خمسة وعشرين، اللي هو على خمسة وعشرين؛ لنسبة مئوية. يبقى هنضرب المقام في عدد يخليه يبقى مية. يعني هنضرب هنا في أربعة. والبسط في نفس العدد. يبقى المقام هيبقى مية، والبسط هيبقى تمنية وستين. علشان نحوّلهم لنسبة مئوية هناخد المية دي نحطها علامة في المية. والتمنية وستين هنسيبها زي ما هي.

كده عرفنا إزّاي هنحوّل النسبة أو الكسر إلى نسبة مئوية. عايزين نعرف إزّاي هنعمل العكس، اللي هو النسبة المئوية تتحول إلى كسر.

تحويل النسبة المئوية إلى كسر، بيبقى عن طريق إن إحنا ناخد النسبة المئوية … يعني مثلًا كانت خمسة في المية، هنحوّلها لكسر هنشيل المية دي، علامة الفي المائة، ونحطها في المقام، والخمسة هنحطها زي ما هي. ولو فيه تبسيط هنبسط، يعني لو الكسر ده محتاج تبسيط هنبسطه. يعني هنا الخمسة على المية، فيه عامل مشترك ما بينهم هو الخمسة. يبقى هنقسم البسط على الخمسة هيبقى الواحد. والمية على الخمسة هيبقى عشرين. يبقى ده الكسر اللي نسبته خمسة في المية.

ناخد مثال. في المثال: اكتب تمنية وأربعين في المية على صورة كسر في صورة مبسّطة.

يبقى النسبة تمنية وأربعين في المية، هنكتبها بالشكل. المية دي هتبقى المقام. علامة الفي المية. والبسط هيبقى تمنية وأربعين. يبقى الكسر عندنا تمنية وأربعين على مية. هنبسّطه بإن إحنا نوجد العامل المشترك ما بين البسط والمقام، ونقسم عليه. يبقى البسط والمقام العامل المشترك ما بينهم هيبقى الأربعة. هنقسم عليه البسط والمقام. يبقى الناتج هيبقى عندنا اتناشر على خمسة وعشرين. وهي دي الصورة المبسّطة للكسر.

اتكلمنا في الفيديو ده عن إيه هي النسبة. وإزّاي نحطها في صورة نسبة مئوية. إزّاي نحوّل كسر إلى نسبة مئوية. وإزّاي نحوّل نسبة مئوية إلى كسر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.