فيديو: إيجاد قِيَم البيانات المجهولة بمعلومية منوال مجموعة بيانات ووسطها

توجد قيمتان مجهولتان في مجموعة البيانات الموضَّحة. إذا كان المنوال ٨٨ والوسط ٥٥ والبيانات مُرتَّبة ترتيبًا تصاعديًّا، فأوجد القيمتين المجهولتين. ٩، ٣٨، ٥٠، _، ٨٨، _.

٠٤:٢٣

‏نسخة الفيديو النصية

توجد قيمتان مجهولتان في مجموعة البيانات الموضحة. إذا كان المنوال تمنية وتمانين، والوسط خمسة وخمسين، والبيانات مرتّبة ترتيبًا تصاعديًّا؛ فأوجد القيمتين المجهولتين.

ومعطى عندنا مجموعة البيانات: تسعة، وتمنية وتلاتين، وخمسين، ونقط، وتمنية وتمانين، ونقط. يعني معطى عندنا مجموعة البيانات دي. وعندنا قيمتين مجهولتين، وعايزين نوجد قيمتهم. فخلينا في الأول نفرض إن القيمتين المجهولتين هم س وَ ص. بعد كده لمّا نيجي نشوف المعطيات عندنا في السؤال، هنلاحظ إن معطى عندنا إن المنوال تمنية وتمانين. وأمّا الوسط فهو خمسة وخمسين.

وخلينا في الأول نفتكر إن الوسط، أو المتوسط الحسابي، لمجموعة من البيانات، هو مجموع البيانات مقسومًا على عددها. فمعنى كده إن الوسط، اللي هو معطى عندنا بخمسة وخمسين، هيبقى بيساوي مجموع البيانات. اللي هو تسعة، زائد تمنية وتلاتين، زائد خمسين، زائد س، زائد تمنية وتمانين، زائد ص. مقسومًا على عدد البيانات. فلمّا نعدّ البيانات اللي عندنا، هنلاحظ إن عددهم ستة. فيبقى كده عندنا معادلة، وفيها قيمتين مجهولتين، اللي هم س وَ ص.

وأول حاجة هنعملها إننا هنضرب طرفَي المعادلة في ستة؛ علشان نتخلّص من الستة اللي في المقام عندنا في الطرف الأيسر للمعادلة. فهنبدأ الأول من الطرف الأيمن. فهنحسب ستة في خمسة وخمسين، واللي هتساوي تلتمية وتلاتين. وأمّا في الطرف الأيسر للمعادلة، فنقدر نختصر ستة مع ستة. فيبقى الطرف الأيسر هو: مية خمسة وتمانين زائد س زائد ص. ومية خمسة وتمانين هنا هي مجموع تسعة، وتمنية وتلاتين، وخمسين، وتمنية وتمانين. فلمّا نجمعهم، هيبقى المجموع هو مية خمسة وتمانين.

فبالتالي هتبقى المعادلة عندنا: تلتمية وتلاتين يساوي مية خمسة وتمانين زائد س زائد ص. وبطرح مية خمسة وتمانين من طرفَي المعادلة، فهتبقى المعادلة هي: مية خمسة وأربعين يساوي س زائد ص.

فكده يبقى قدرنا نوجد قيمة س زائد ص. لكن إحنا لسه عايزين نوجد قيمة كلٍّ منهم. فلمّا نرجع نشوف المعطيات اللي عندنا في السؤال، هنلاحظ إن المنوال معطى عندنا تمنية وتمانين. وخلينا في الأول نفتكر إن المنوال هو القيمة أو القيم الأكثر تكرارًا في البيانات.

وبما إن المنوال لمجموعة البيانات اللي عندنا هو تمنية وتمانين، فمعنى كده إن هيبقى فيه قيمة من س وَ ص قيمتها تمنية وتمانين؛ لأن عندنا هنا تمنية وتمانين. فمعنى كده إن هيبقى؛ يا إمّا س بتساوي تمنية وتمانين، أو ص تساوي تمنية وتمانين. وممكن برضو يبقى قيمة س وَ ص هم الاتنين تمنية وتمانين. لكن في الحالة اللي عندنا، الحل ده مش هينفع؛ لأن إحنا أوجدنا إن س زائد ص بتساوي مية خمسة وأربعين. فبالتالي لو كان س وَ ص هم الاتنين قيمتهم تمنية وتمانين، فيبقى مجموعهم أكبر من مية خمسة وأربعين. فبالتالي هيبقى الحل ده حل خاطئ.

طيب بما إننا فرضنا إن القيمة دي س، والقيمة دي ص. ومعطى عندنا إن البيانات مرتّبة ترتيبًا تصاعديًّا، يعني مرتّبة من الأصغر إلى الأكبر. فمعنى كده إن في مجموعة البيانات اللي عندنا دي، هتبقى قيمة س أقل من قيمة ص. وإحنا زيّ ما عرفنا إن فيه قيمة واحدة بس منهم هي اللي قيمتها تمنية وتمانين. فمعنى كده إننا عايزين نعوّض عن س أو ص بتمنية وتمانين في المعادلة دي؛ علشان نوجد القيمتين. لكن إحنا حاليًّا مش عارفين نعوّض عن س بتمنية وتمانين، ولّا عن ص بتمنية وتمانين. فخلّينا في الأول نجرّب. لو طرحنا تمنية وتمانين من مية خمسة وأربعين، هيبقى الناتج بيساوي سبعة وخمسين. فمعنى كده إننا لو عوّضنا عن قيمة فيهم بتمنية وتمانين، هتبقى القيمة التانية بسبعة وخمسين.

وبما إن البيانات مرتّبة ترتيبًا تصاعديًّا، فمعنى كده إن لازم تكون س هي الأصغر من ص. فبالتالي هتبقى قيمة س هي القيمة الصغيرة، اللي هي سبعة وخمسين. وأمّا ص، بما إن هي القيمة الأكبر، فهي اللي هتبقى بتساوي تمنية وتمانين. فمعنى كده إن القيمتين المجهولتين اللي عندنا هيبقوا: سبعة وخمسين وهنكتبها هنا، وتمنية وتمانين وهي آخر قيمة. وبالتالي هيبقى القيمتين المجهولتين هما: سبعة وخمسين، وتمنية وتمانين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.