فيديو: حل المسائل الكلامية التي تتضمن طرح عددين مكوَّنين من أكثر من رقم

فريدة معها ٦٩٦٧ جنيهًا في حساب التوفير الخاص بها. إذا سحبت ٥٧٧٩ جنيهًا، فكم جنيهًا تبقى في حسابها؟

٠٢:٢٥

‏نسخة الفيديو النصية

فريدة معها ست آلاف وتسعمية سبعة وستين جنيهًا في حساب التوفير الخاص بها. إذا سحبت خمسة آلاف وسبعمية تسعة وسبعين جنيهًا، فكم جنيهًا تبقّى في حسابها؟

عرفنا في المثال ده، إن رصيد فريدة في حساب التوفير هو ست آلاف تسعمية سبعة وستين جنيه. وعرفنا كمان إنها أخدت منهم خمسة آلاف سبعمية تسعة وسبعين جنيه. وعايزين دلوقتي نحسب عدد الجنيهات اللي اتبقّت في حساب فريدة. وكلمة «تبقّى» دي بتعرّفنا إننا هنستخدم عملية الطرح. واللي بيها هنقدر نحسب المتبقّي في حساب فريدة، بعد ما سحبت منه خمسة آلاف سبعمية تسعة وسبعين جنيه.

فهنطرح ست آلاف تسعمية سبعة وستين ناقص خمسة آلاف سبعمية تسعة وسبعين. هنكتب العددين تحت بعض بالشكل ده؛ علشان نقدر نطرح بسهولة، ونحدد خانات الأرقام اللي عندنا كلها.

ففي خانة الآحاد عندنا سبعة ناقص تسعة. وطبعًا مش هنقدر نطرح تسعة من السبعة؛ لأن السبعة أصغر من التسعة. لازم تكون السبعة دي أكبر. هنعمل إيه؟ هنستلف من الخانة اللي جنبها واحد. فهتكون الستة دي خمسة، والواحد اللي أخدناه هنحطّه في خانة العشرات. فالسبعة هتبقى سبعتاشر. وبكده نقدر نطرح تسعة من السبعتاشر. فهتكون تمنية.

بعدين نطرح أرقام خانة العشرات. هنلاقي عندنا نفس المشكلة. خمسة ناقص سبعة مش هينفع. لازم تكون الخمسة أكبر من السبعة؛ عشان نقدر ننقّص منها سبعة. هنستلف من خانة المئات برضو واحد، وهتبقى تمنية. والواحد اللي استلفناه هنحطّه في خانة العشرات. فهتبقى خمستاشر. ودلوقتي نقدر ننقّص من الخمستاشر، سبعة. خمستاشر ناقص سبعة يساوي تمنية.

وأرقام خانة المئات: تمنية ناقص سبعة تساوي واحد. أمّا خانة الألوف: ستة ناقص خمسة بيساوي واحد.

وبكده هيكون ناتج الطرح هو العدد ألف مية تمنية وتمانين. واللي بيمثل عدد الجنيهات المتبقّية في حساب التوفير الخاص بفريدة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.