فيديو: امتحان الاستاتيكا للعام السابق • ٢٠١٨/٢٠١٧ • السؤال السادس

امتحان الاستاتيكا للعام السابق • ٢٠١٨/٢٠١٧ • السؤال السادس

٠٤:٢٠

‏نسخة الفيديو النصية

أكمل الآتي: إذا اتزنت مجموعة من القوى، فإن … أ: مجموع العزوم حوْل أيّ نقطة ينعدم فقط. ب: محصلة القوى تنعدم فقط. ج: مجموع العزوم للقوى حوْل أيّ نقطة ينعدم، ومحصلة القوى تنعدم أيضًا. د: محصلة القوى تساوي مجموع مقادير القوى، ومجموع العزوم للقوى حوْل أيّ نقطة لا ينعدم.

في السؤال ده عاوزين نعرف إمتى مجموعة القوى بنقدر نقول عليها إنها متّزنة. فعلشان نعرف نجاوب على السؤال ده، هنشوف إيه هي شروط الاتزان لمجموعة من القوى. الشرط الأول: مجموع القياسات الجبرية لهذه القوى تساوي صفر. يعني محصلة القوى بتساوي صفر. أو بصيغة تانية ممكن نقول إن محصلة القوى تنعدم. ده بالنسبة لأول شرط.

الشرط التاني: مجموع العزوم للقوى حوْل أيّ نقطة يساوي صفر. يعني مجموع العزوم حوْل أيّ نقطة ينعدم. ولازم يتحقّق الشرطين دول مع بعض. ما ينفعش نكتفي بتحقيق شرط واحد منهم. طيب الشرط الأول معناه إيه؟ الشرط الأول بيقول لنا إن لازم مجموع أو محصلة القوى كلها تنعدم. لأنها لو ما انعدمتش، الجسم هيتحرّك في اتجاه القوى الأكبر. فهيكون فيه حركة انتقالية. يبقى الشرط الأول بيضمن لنا عدم وجود حركة انتقالية.

والشرط التاني بيقول لنا إن لازم مجموع العزوم حوْل أيّ نقطة ينعدم. لأن لو ما انعدمش، الجسم هيتحرّك حركة دورانية، ويدور حوْل النقطة اللي طلع للعزوم قيمة عندها. فبالتالي هيكون فيه حركة دورانية. وده بيخلّ بالاتزان. يبقى لازم برضو نحقّق الشرط التاني، وهو عدم وجود حركة دورانية.

فلو جينا نبصّ عَ الاختيارات، وشُفنا أول اختيار: مجموع العزوم حوْل أيّ نقطة ينعدم فقط. أول اختيار بيضمن لنا عدم وجود حركة دورانية. لكنه مش بيضمن لنا عدم وجود حركة انتقالية؛ لأنه ما جبش سيرة المحصلة. فبالتالي نستبعد الاختيار الأول؛ لأنه حقّق الشرط التاني بس. الاختيار التاني: محصلة القوى تنعدم فقط. الاختيار التاني ضمن لنا عدم وجود حركة انتقالية. فهو حقّق الشرط الأول، ولكنه ما جابش سيرة الشرط التاني. فبرضو بنستبعده.

نيجي للاختيار التالت: مجموع العزوم للقوى حوْل أيّ نقطة ينعدم، ومحصلة القوى تنعدم أيضًا. في الاختيار التالت حقّق الشرطين. خلّى مجموع العزوم حوْل أيّ نقطة ينعدم، ومعاه محصلة القوى كمان بتنعدم. يبقى هو ده الاختيار الصح، اللي منع فيه الحركة الانتقالية والدورانية.

ولكن خلّينا برضو نتأكد مِ الاختيار الرابع، واللي بيقول لنا: محصلة القوى تساوي مجموع مقادير القوى. هنا خلّى للمحصلة قيمة، ما خلّاهاش منعدمة أو بتساوي الصفر. يبقى معنى كده إن الشرط الأول ما اتحقّقش. وتكملة الاختيار: ومجموع العزوم للقوى حوْل أيّ نقطة لا ينعدم. وبرضو خلّى للعزوم قيمة، ما ساواهاش بالصفر. يبقى الاختيار د ما حقّقش الشرطين. ومن هنا نقدر نتأكّد إن الاختيار الصح هو ج. واللي بيقول لنا إن مجموع العزوم للقوى حوْل أيّ نقطة ينعدم، ومحصلة القوى تنعدم أيضًا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.