تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد القِيَم المحتملة لمعاملات الانحدار من شكل الانتشار

أحمد مدحت

نموذج انحدار خطي على الصورة ﺹ = ﺃ + ﺏﺱ يطابق البيانات الموضَّحة. أيُّ العبارات التالية صواب عن قيم ﺃ، ﺏ في نموذج الانحدار المطابق؟ [أ] ﺏ > ٠، ﺃ = ٠ [ب] ﺏ < ٠، ﺃ < ٠ [ج] ﺏ < ٠، ﺃ > ٠ [د] ﺏ > ٠، ﺃ < ٠ [ﻫ] ﺏ > ٠، ﺃ > ٠

٠٢:١١

‏نسخة الفيديو النصية

عندنا في المثال نموذج انحدار خطي على الصورة ص تساوي أ زائد ب س بيطابق البيانات الموضَّحة. وعندنا خمس اختيارات عايزين نعرف أنهي عبارة فيهم صواب عن قيم أ وَ ب في نموذج الانحدار المطابق. بالنسبة للاختيارات؛ فالاختيار أ: هو ب أكبر من صفر وَ أ تساوي صفر. والاختيار ب: هو ب أقل من صفر وَ أ أقل من صفر. والاختيار ج: هو ب أقل من صفر وَ أ أكبر من صفر. والاختيار د: هو ب أكبر من صفر وَ أ أقل من صفر. والاختيار ﻫ: ب أكبر من صفر وَ أ أكبر من صفر.

عندنا في المثال شكل، الشكل ده عبارة عن نموذج لانحدار خطي. والانحدار الخطي ده على الصورة ص تساوي أ زائد ب س. والصورة دي بتوضّح علاقة خطّيّة بين متغيرين هم ص وَ س. أما بالنسبة لـ أ وَ ب في الانحدار الخطي؛ أ هي ثابت الانحدار، وبتعتبر هي الجزء المقطوع من محور الصادات. أما ب فهي معامل انحدار ص على س، وبتعتبر هي ميل الخط المستقيم الموضّح عندنا في الشكل. وبكده بعد ما عرفنا كلٍّ من أ وَ ب، هنبدأ نحدّد هل قيمهم أكبر من صفر ولا تساوي صفر ولا أقل من صفر.

هنبدأ الأول بقيمة ثابت الانحدار اللي هو أ. فهنرجع للشكل اللي عندنا، هنلاقي إن الخط المستقيم هيقطع محور الصادات في نقطة الإحداثي الصادي بتاعها موجب. فده معناه إن الجزء المقطوع من محور الصادات أو المقطع الصادي موجب؛ يعني أكبر من صفر. بالتالي قيمة ثابت الانحدار واللي هي قيمة أ هتبقى أكبر من صفر. بعد كده هنشوف هل قيمة ب أكبر من صفر ولّا أقل من صفر ولّا تساوي صفر. فلمّا نرجع للشكل اللي عندنا هنلاحظ إن المستقيم بيكون لأسفل لمّا نتحرك من الشمال لليمين. ده معناه إن ميل المستقيم سالب؛ يعني أقل من صفر. معنى كده إن قيمة معامل انحدار ص على س وَاللي هي قيمة ب هتبقى أقل من صفر.

كده إحنا حدّدنا إن قيمة أ أكبر من صفر، وقيمة ب أقل من صفر. فلمّا هنرجع للاختيارات اللي عندنا، هنلاقي إن الإجابة الصحيحة هي الاختيار ج، اللي هو ب أقل من صفر وَ أ أكبر من صفر. وبكده يبقى إحنا اخترنا الإجابة الصحيحة.