فيديو: شكل الطائرة الورقية

يوضح الفيديو شكل الطائرة الورقية، وخصائصه، ونظرياته، وأمثلةً على ذلك.

٠٦:٥٣

‏نسخة الفيديو النصية

شكل الطائرة الورقية.

في البداية شكل الطائرة الورقية هو عبارة عن شكل رباعي بيكون فيه زوجان منفردان من ضلعين متجاورين ومتساويين. يعني على سبيل المثال لو أنا عندي الشكل الرباعي أ ب ج د هو شكل طائرة ورقية. يبقى في الحالة دي أقدر أقول إن هو شكل رباعي فيه زوجان منفردان من ضلعين متجاورين ومتساويين. يعني فيما معناه إن على سبيل المثال الضلع أ ب بيطابق الضلع أ د. والضلع ب ج بيطابق الضلع ج د.

شكل الطائرة الورقية بيكون فيها قطرين. على سبيل المثال أنا عندي القطر أ ج والقطر ب د. القطر أ ج هو اسمه القطر الرئيسي. والقطر ب د هو القطر الثانوي. القطر الرئيسي بينصّف القطر الثانوي. يعني فيما معناه أنا عندي القطر الرئيسي أ ج بيقطع القطر الثانوي ب د في نقطة م. يبقى في الحالة دي أقدر أقول إن ب م طول بيساوي طول م د. يبقى الضلع ب م بيطابق الضلع م د.

يبقى إحنا عرفنا إن شكل الطائرة الورقية هو عبارة عن شكل رباعي يكون فيه زوج منفرد من ضلعين متجاورين ومتساويين. وإن بيكون فيه قطرين، واحد فيهم هو القطر الرئيسي، والآخر هو القطر الثانوي. والقطر الرئيسي بيقسم القطر الثانوي لجزئين متطابقين، أو جزئين متساويين.

فيه بعض النظريات لشكل الطائرة الورقية محتاجين نعرفها. بس هنكتب النظريات دي في صفحة جديدة.

أول نظرية عندي: إذا كان الشكل الرباعي على شكل طائرة ورقية. فأقطاره تكون متعامدة.

يعني على سبيل المثال لو أنا عندي الشكل الرباعي أ ب ج د على شكل طائرة ورقية. يبقى في الحالة دي أقدر أقول إن القطر أ ج يكون عمودي على القطر ب د. ودي أول نظرية.

أما تاني نظرية: إذا كان الشكل الرباعي على شكل طائرة ورقية، فزوج واحد فقط من الزوايا المتقابلة متطابقة.

يعني على سبيل المثال أنا عندي شكل رباعي أ ب ج د على شكل طائرة ورقية. الزوايا اللي بتقع ما بين الأضلاع الغير متطابقة، اللي هي عندي هنا في الشكل الرباعي أ ب ج د، هي زاوية ب وزاوية د. لأن زاوية ب بتقع ما بين الضلع أ ب والضلع ب ج اللي همّ ضلعين غير متطابقين. وزاوية د بتقع ما بين الضلع أ د والضلع د ج اللي همّ ضلعين غير متطابقين. الزاويتين دول هم زاويتين متطابقتين. يبقى إذا كان الشكل الرباعي على شكل طائرة ورقية، فزوج واحد فقط من الزوايا المتقابلة متطابقة.

في الحالة دي نقدر ناخد بعض الأمثلة في صفحة جديدة.

أ ب ج د شكل رباعي على شكل طائرة ورقية. أوجد قياس زاوية ب أ د.

في البداية هو قايل لي إن أ ب ج د شكل رباعي على شكل طائرة ورقية. يبقى في الحالة دي أقدر أقول إن زاوية أ بتطابق زاوية ج؛ لأن زاوية أ هي محصورة ما بين الضلع أ ب والضلع أ د، وهم ضلعين غير متطابقين. وزاوية ج محصورة ما بين الضلع ب ج والضلع ج د وهم ضلعين غير متطابقين. وإحنا عارفين إن فيه نظرية بتقول إن في شكل الطائرة الورقية يوجد زوج واحد من الزوايا المتقابلة متطابقة، وهمّ هنا زاوية أ وزاوية ج.

وبما إن مجموع قياسات الزوايا الداخلية للشكل الرباعي بتساوي تلتمية وستين درجة. يبقى في الحالة دي أقدر أقول إنه قياس زاوية أ، زائد قياس زاوية ب، زائد قياس زاوية ج، زائد قياس زاوية د، هيساوي تلتمية وستين درجة.

وقياس زاوية أ بيساوي قياس زاوية ج. يبقى أقدر أقول إن قياس زاوية أ زائد قياس زاوية ج، أقدر أرمز لها باتنين مضروبة في قياس زاوية أ. ده هيساوي تلتمية وستين درجة، ناقص قياس زاوية ب، زائد قياس زاوية د.

إحنا كنا نسينا نحط علامة درجة على التلتمية وستين هنا، لازم ناخد بالنا. يبقى اتنين قياس زاوية أ بيساوي تلتمية وستين درجة ناقص مجموع قياس زاوية ب زائد قياس زاوية د. بيساوي تلتمية وستين درجة ناقص قياس زاوية ب بيساوي مية وعشرين درجة، زائد قياس زاوية د بتمانين درجة. مية وعشرين درجة زائد تمانين درجة بتساوي ميتين درجة. يبقى اتنين قياس زاوية أ بيساوي تلتمية وستين درجة ناقص ميتين درجة. يعني بيساوي مية وستين درجة. يبقى في الحالة دي أقدر أقول إن قياس زاوية أ، أو قياس زاوية ب أ د اللي مطلوبة مني في المسألة، بتساوي مية وستين درجة على اتنين؛ يعني بتساوي تمانين درجة. وهو ده المطلوب مني في المسألة.

وبكده بنكون عرفنا إيه هو الشكل الرباعي اللي على شكل طائرة ورقية. تعريفه، والخصائص الخاصة بيه. والخصائص الخاصة بأقطار الشكل الرباعي اللي على شكل طائرة ورقية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.