تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: معادلة المستقيم بمعلومية ميله ونقطة يمر بها

نهال عصمت

يتناول الفيديو طريقة كتابة معادلة المستقيم إذا عُلِم ميلُه ونقطةٌ يمرُّ بها بصيغة الميل والمقطع، ويوضِّح ذلك بالأمثلة.

٠٣:٣٥

‏نسخة الفيديو النصية

معادلة المستقيم بمعلومية ميله ونقطة يمرّ بها.

هنتكلّم إزّاي نكتب معادلة المستقيم، إذا عُلمت ميله ونقطة يمرّ بها. عايزين نكتب معادلة المستقيم بصيغة الميل والمقطع. يبقى أول حاجة، هنفتكر إيه هي صيغة الميل والمقطع للمعادلة الخطية. هي: ص تساوي م س زائد ب. م هي الميل. أمّا ب فهي الجزء المقطوع من محور الصادات. يبقى بعد ما افتكرنا صيغة الميل والمقطع للمعادلة الخطية، هنبدأ نجيب صفحة جديدة، ونشوف مثال عليها.

المطلوب إيجاد معادلة المستقيم الذي يمرّ بالنقطة اتنين وواحد، وميله يساوي تلاتة. يبقى عايزين نكتب معادلة المستقيم الذي يمرّ بالنقطة اتنين وواحد، وميله يساوي تلاتة. أول حاجة هنبدأ نكتب المعادلة الخطية بصيغة الميل والمقطع. وهي: ص تساوي م س زائد ب. م هي ميل المستقيم. وَ ب هي الجزء المقطوع من محور الصادات.

عشان نقدر نوجد معادلة المستقيم، عايزين نوجد قيمة م، وقيمة ب. معطى في السؤال إن الميل يساوي تلاتة. يبقى م تساوي تلاتة. يبقى نقدر نقول إن ص تساوي م اللي هي تلاتة، في س زائد ب. يبقى عوّضنا عن م بتلاتة.

بعد كده عايزين نوجد قيمة ب، اللي هي الجزء المقطوع من محور الصادات. عندنا المستقيم يمرّ بالنقطة اتنين وواحد. معنى كده إن س باتنين، وَ ص بواحد. يبقى هنبدأ نعوّض في معادلة المستقيم عن ص بواحد، وعن س باتنين. وبالتالي هيبقى عندنا واحد تساوي تلاتة في اتنين، زائد ب.

بعد كده هيبقى واحد تساوي … اتنين في تلاتة، بستة. زائد ب هتنزل زيّ ما هي. بعد كده هنطرح ستة من طرفَي المعادلة. يبقى نقدر نقول إن ب هتساوي سالب خمسة. يبقى قدرنا نجيب قيمة ب. هنرجع نعوّض بقيمة ب في معادلة المستقيم. هيبقى عندنا ص تساوي تلاتة س ناقص خمسة. يبقى قدرنا نوجد معادلة المستقيم، وهي: ص تساوي تلاتة س ناقص خمسة.

وبالتالي لو عندنا ميل المستقيم، والنقطة التي يمرّ بها، نقدر نكتب معادلة المستقيم بصيغة الميل والمقطع. أول حاجة هنعوّض بالميل. بعد كده هنعوّض عن س وَ ص، بالنقطة التي يمرّ بها. ونقدر نوجد من خلالها، الجزء المقطوع من محور الصادات.

يبقى كده اتكلمنا عن معادلة المستقيم، بمعلومية ميله ونقطة يمرّ بها.