فيديو: إيجاد الكسر كجزء من الوحدة في أبسط صورة بمعلومية الوحدة (الكل) والجزء في جدول

أُخذت مجموعة من السائحين في جولة في باريس. بعد الجولة أُجري استطلاع للرأي حول الوجهة التي وجدها السائحون أكثر متعة، وكانت النتيجة كما هي موضّحة في الجدول. أوجد نسبة السائحين الذين يعتبرون أن كاتدرائية نوتردام الأكثر متعة في أبسط صورة.

٠٤:٢٢

‏نسخة الفيديو النصية

أُخذت مجموعة من السائحين في جولة في باريس. بعد الجولة أُجري استطلاع للرأي حول الوجهة التي وجدها السائحون أكثر متعة، وكانت النتيجة كما هي موضّحة في الجدول. أوجد نسبة السائحين الذين يعتبرون أن كاتدرائية نوتردام الأكثر متعة، في أبسط صورة.

وفي الجدول ده هنلاقي إنه عدد تكرار زيارات السائحين لكاتدرائية نوتردام هو أربعين مرة. وفي المثال مطلوب نحسب نسبة السائحين اللي بيعتبروا إن كاتدرائية نوتردام هي الأكثر متعة. وعلشان نمثّلها في صورة كسر، هنحطّ عدد تكرار زيارات السائحين للكاتدرائية في البسط، اللي هو أربعين. أمّا في المقام، هنحطّ العدد الكلي لمرات تكرار زيارات السائحين في كل الأماكن. يعني هنجمع خمستاشر زائد أربعين زائد ستة وعشرين زائد سبعة وتلاتين زائد أربعة وتلاتين.

خمستاشر زائد أربعين هيساوي خمسة وخمسين. وخمسة وخمسين هنجمع عليها العدد اللي بعده اللي هو ستة وعشرين. خمسة زائد ستة حداشر. واحد وهنحطّ واحد في خانة العشرات، ونجمعه على الأرقام الموجودة في خانة العشرات. واحد زائد خمسة زائد اتنين هيساوي تمنية. واحد وتمانين هنجمع عليه العدد اللي بعده سبعة وتلاتين. واحد زائد سبعة، تمنية. تمنية زائد تلاتة، حداشر. مية وتمنتاشر هنجمع عليهم آخر عدد، اللي هو أربعة وتلاتين. تمنية زائد أربعة باتناشر. وواحد هحطّه في خانة العشرات. واحد زائد واحد زائد تلاتة بيساوي خمسة. وواحد في خانة المئات هينزل واحد. معنى كده إن المجموع هيساوي مية اتنين وخمسين، هو ده العدد اللي هنكتبه في المقام.

والمطلوب إننا نوجد النسبة دي في أبسط صورة، وده معناه إننا هنقسم البسط والمقام على نفس العدد. والعدد ده هيكون عامل مشترك بين العددين. علشان كده هنبدأ نجيب عوامل كل عدد فيهم. عوامل الأربعين؛ ممكن نقسمه على اتنين، فهيكون العدد عشرين. والعشرين ممكن نقسمها عَ الاتنين، فهتكون عشرة. والعشرة هنقسمها على اتنين، فهتكون خمسة. وخمسة على خمسة بيساوي واحد. معنى كده إن عوامل العدد أربعين هي: عشرين، وعشرة، وخمسة، واتنين، وواحد. وبالتالي الأربعين هتساوي حاصل ضرب اتنين في اتنين، في اتنين، في خمسة. واللي نقدر نقول برضو إن هي بتساوي تمنية في خمسة؛ لأن اتنين مضروبة في اتنين في اتنين بتساوي تمنية.

ودلوقتي هنحلّل العدد مية اتنين وخمسين. ولأنه عدد زوجي، فهيقبل القسمة على اتنين. مية اتنين وخمسين على اتنين هتساوي ستة وسبعين. وستة وسبعين على اتنين هيساوي تمنية وتلاتين. وتمنية وتلاتين على اتنين هيساوي العدد تسعتاشر. وتسعتاشر على تسعتاشر يساوي واحد. وده معناه إن عوامل العدد مية اتنين وخمسين هم: واحد، واتنين، وتسعتاشر، وتمنية وتلاتين، وستة وسبعين، ومية اتنين وخمسين. والمية اتنين وخمسين هتساوي حاصل ضرب اتنين في اتنين، في اتنين، في تسعتاشر. وكمان نقدر نكتبها إن هي بتساوي حاصل ضرب تمنية في تسعتاشر؛ لأن اتنين في اتنين في اتنين بيساوي تمنية.

وبكده نقدر نعتبر إن العامل المشترك بين العدد أربعين والعدد مية اتنين وخمسين، هو العدد تمنية. ودلوقتي هنرجع للكسر بتاعنا، وهنقسم على العدد تمنية. هيساوي … أربعين على تمنية هيساوي خمسة؛ لأن أربعين هي حاصل ضرب العدد تمنية في العدد خمسة. أمّا مية اتنين وخمسين على تمنية هتساوي العدد تسعتاشر؛ وبرضو لأن مية اتنين وتسعين [مية اتنين وخمسين] بتساوي حاصل ضرب تمنية في تسعتاشر. وبكده الكسر خمسة على تسعتاشر هو اللي بيعبّر عن نسبة تكرار زيارة السائحين لكاتدرائية نوتردام، بالنسبة لتكرار زيارتهم للأماكن كلها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.