فيديو: إيجاد محيط مضلع بمعلومية أبعاده

أوجد محيط الشكل المظلل.

٠٢:٣٣

‏نسخة الفيديو النصية

أوجد محيط الشكل المظلل.

محيط أيّ شكل هو مجموع أطوال أضلاعه، يعني هنجيب أطوال أضلاع الشكل اللي قدامنا ده، ونجمعها كلها. طيب إحنا عندنا كام طول ضلع هنا؟ أهو ده ضلع واحد، وده ضلع اتنين، وده تلاتة، وده أربعة، وده خمسة؛ عندنا خمس أضلاع. هنبدأ نجمّعهم؛ أول ضلع عندنا واحد وعشرين سنتيمتر، والضلع اللي بعده واحد وعشرين سنتيمتر، زائد الضلع اللي بعده خمسة وأربعين سنتيمتر، والضلع اللي بعده خمسة وتلاتين سنتيمتر، والضلع الأخير خمسة وأربعين سنتيمتر.

لمّا نجمع الخمس أعداد دول، أو خمس أطوال الأضلاع دول؛ يبقى إحنا كده جِبنا محيط الشكل. أول حاجة هنجمَعها واحد وعشرين زائد واحد وعشرين؛ واحد زائد واحد اتنين، واتنين زائد اتنين أربعة.

تاني حاجة هنجمَعها خمسة وأربعين زائد خمسة وأربعين. الأعداد اللي شبه بعض نجمَعها عشان تتجمع بسهولة. خمسة زائد خمسة عشرة؛ صفر ومعانا الواحد فوق الأربعة. واحد وأربعة خمسة، خمسة وأربعة تسعة؛ يبقى مجموعهم تسعين. اتبقّى لنا هنا إيه؟ خمسة وتلاتين، نكتبها؛ زائد خمسة وتلاتين.

ودلوقتي هنجمع اتنين وأربعين وتسعين وخمسة وتلاتين، يا نجمعهم وهم جنب بعض كده، يا إمّا نكتبهم فوق بعض عشان نعرف نجمعهم بسهولة. هنعمل الطريقتين، تعالوا نكتبهم فوق بعض: اتنين وأربعين زائد تسعين زائد خمسة وتلاتين، يلا نجمع الآحاد: اتنين زائد صفر هي الاتنين، زائد خمسة يبقى سبعة. نجمع العشرات: أربعة زائد تسعة تلتاشر، تلتاشر وتلاتة ستّاشر. يبقى مجموعهم إيه؟ مية سبعة وستين، مية سبعة وستين سنتيمتر، وهو ده محيط الشكل المطلوب.

لو عاوزين نجمّعهم برضو وهم جنب بعض، عادي؛ اتنين زائد صفر اتنين، زائد خمسة يبقى سبعة. أربعة زائد تسعة تلتاشر، وتلاتة؛ ستاشر. طلعت نفس النتيجة مية سبعة وستين سنتيمتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.