فيديو: ضرب عدد من رقمين في عدد آخر من رقمين

يوضِّح الفيديو كيفية إيجاد حاصل ضرب عدد مكون من رقمين في عدد آخر مكون من رقمين، وأمثلةً عليها.

٠٩:١٤

‏نسخة الفيديو النصية

ضرب عدد من رقمين في عدد من رقمين.

هنتعلم في الدرس ده إزاي نقدر نوجد حاصل ضرب عدد من رقمين، في عدد آخر من رقمين.

إذا كان الذئب يقطع تلاتة وأربعين كيلومترًا في الساعة. فكم يقطع في اتناشر ساعة؟

عندنا أكتر من طريقة نقدر نستخدمها لإيجاد ناتج الضرب في عدد مكون من رقمين. أول طريقة: هنستخدم نواتج الضرب الجزئية. في الطريقة دي هنبدأ نضرب الآحاد بتاع العدد اللي تحت. نضربه الأول في آحاد العدد اللي فوق. وبعدين نضربه في عشرات العدد اللي فوق. وبعد كده نبتدي نضرب عشرات العدد اللي تحت في آحاد اللي فوق. وبعدين في عشرات اللي فوق. ونجمّع نواتج أو حواصل الضرب الجزئية؛ عشان نحصل على حاصل الضرب النهائي.

هنشوف دلوقتي خطوة خطوة إزاي هنعمل كده. هنضرب اتنين في آحاد اللي فوق اللي هي تلاتة فهيدّينا ستة. الخطوة اللي بعدها هنضرب الاتنين في عشرات العدد اللي فوق، اللي هي الأربعة. اتنين في أربعة بتمنية في العشرات؛ يعني تمانين.

دلوقتي هنبدأ نضرب عشرات العدد اللي تحت في آحاد اللي فوق. واحد في العشرات دي عبارة عن عشرة. عشرة في تلاتة؛ يعني هتبقى النتيجة تلاتين. وبعدين نضرب الواحد اللي في العشرات دي في عشرات العدد اللي فوق؛ يعني في أربعين، هي اللي تحت الواحد دي عبارة عن عشرة، والأربعة اللي فوق دي عبارة عن أربعين؛ عشان هي في العشرات. يعني كأني بضرب عشرة في أربعين. فهتبقى الناتج في الحالة دي ربعمية.

هنجمّع حواصل الضرب الجزئية اللي حصلنا عليها. الستة بتاعة اللي في الآحاد هتنزل زي ما هي. وبعدين في العشرات عندنا تمنية زائد تلاتة هيبقى حداشر. واحد، وهنرحّل الواحد اللي باقي فوق خانة المئات، هيبقى واحد زائد أربعة هيدّينا خمسة. فهيبقى الناتج هو خمسمية وستاشر.

هنوضح عملية الضرب اللي عملناها دي من خلال الشكل اللي عندنا ده. إحنا بنجيب حاصل ضرب اتناشر، اللي هي عبارة عن عشرة زائد اتنين؛ في تلاتة وأربعين، اللي هي عبارة عن أربعين زائد تلاتة. يبقى هنلاقي إن عشرة في تلاتة هتساوي تلاتين. آدي أول حاصل ضرب جزئي هنحطه هنا.

وبعدين هنضرب العشرة في الأربعين، هتدينا ربعمية. هنضرب الاتنين في التلاتة هتدينا ستة. وهنضرب الاتنين في الأربعين هتدينا تمانين. ونتيجة تجميع حواصل الضرب الجزئية دي هي الخمسمية وستاشر اللي حصلنا عليها كناتج أو حاصل ضرب كلي.

ممكن نستخدم طريقة أخرى عشان نحل عملية الضرب دي. هنبتدي نضرب آحاد العدد اللي تحت، في العدد اللي فوق. اتنين في تلاتة وأربعين، هتدينا ستة وتمانين. بعدين ناخد عشرات العدد اللي تحت، ونضربه في العدد اللي فوق؛ يعني عشرة في تلاتة وأربعين. عشرة في تلاتة وأربعين هتدّينا ربعمية وتلاتين.

الخطوة التالتة هنجمّع حواصل الضرب الجزئية؛ عشان نجيب حاصل الضرب النهائي. هيبقى عندنا ستة زائد صفر ستة. وتمنية زائد تلاتة حداشر. واحد، وهنرحل الواحد فوق الأربعة هنا، وبعدين نجمع واحد زائد أربعة هيدّينا خمسة. كده حصلنا على نفس النتيجة اللي حصلنا عليها باستخدام الطريقة الأولى، اللي هي خمسمية وستاشر.

يعني نقدر نستنتج إن الذئب بيقطع خمسمية وستاشر كيلومتر في زمن قدره اتناشر ساعة.

في صفحة جديدة هنشوف مثال تاني.

يسدد محمد فواتيره الشهرية كما هو مبين في الجدول. كم جنيهًا يسدد لفاتورة الماء في سنتين؟

دلوقتي عندنا هنلاقي إن فاتورة الماء في الشهر، محمد بيدفع تمنية وتلاتين جنيهًا. طيب المدة اللي عندنا اللي المطلوب نحسب فيها هي سنتين. عايزين نشوف السنتين دول فيهم كام شهر؟ السنة الواحدة فيها اتناشر شهر. يبقى السنتين عبارة عن اتناشر في اتنين. يعني بتساوي أربعة وعشرين شهرًا.

يبقى عايزين نعرف في مدة مقدارها أربعة وعشرين شهر، هيكون دفع فاتورة مية مقدارها قد إيه. يعني محتاجين نجيب حاصل ضرب تمنية وتلاتين اللي هو الفاتورة بالجنيه في الشهر الواحد، في أربعة وعشرين اللي هو عدد الشهور المطلوبة.

هنبدأ نضرب الآحاد بتاع العدد اللي تحت، في العدد اللي فوق. يعني أربعة في تمنية وتلاتين. أربعة في تمنية وتلاتين هيبقى الناتج مية اتنين وخمسين. الخطوة اللي بعد كده هنضرب العشرات بتاعة العدد اللي تحت، في العدد اللي فوق كله. يعني … اتنين في العشرات يعني عشرين. عشرين في تمنية وتلاتين هتدينا سبعمية وستين.

بعد كده هنجمّع عشان نجيب ناتج حواصل الضرب الجزئية. اتنين زائد صفر هيبقى عندنا اتنين. خمسة زائد ستة حداشر. واحد، والواحد التاني هنحطه فوق الخانة اللي بعدها، وبعدين نجمّع. واحد زائد واحد اتنين، زائد سبعة هيساوي تسعة. يبقى نتيجة الجمع عندنا تسعمية واتناشر. يعني نقدر نستنتج إن محمد بيدفع تسعمية واتناشر جنيهًا في سنتين. دي تكلفة استهلاكه من الماء لمدة سنتين.

عايزين نجيب حاصل الضرب التقديري. هنعمل إيه؟ هنقرّب العددين التمنية و … إحنا محتاجين نجيب حاصل ضرب تمنية وتلاتين … عفوًا … تمنية وتلاتين في أربعة وعشرين. هنشوف أكبر قيمة مكانية في العددين، هنلاقيها العشرات، فهنقرب العددين لأقرب عشرة. فهنخلّي التمنية وتلاتين دي بعد التقريب هتبقى أربعين، في … الأربعة وعشرين بعد التقريب هتبقى عشرين. حاصل الضرب التقديري هيبقى تمنمية.

ولو قارنّا الاجابتين ببعض التمنمية بـالتسعمية واتناشر، هنلاقي إن الإجابتين نوعًا ما قريبين. فبالتالي الإجابة معقولة.

ممكن نلخّص عملية الضرب الدقيقة اللي عملناها من خلال الشكل ده. إحنا بنعمل عملية ضرب لتمنية وتلاتين، اللي هي عبارة عن تمنية زائد تلاتين. في أربعة وعشرين، اللي هي عبارة عن أربعة زائد عشرين. بنضرب الآحاد في الآحاد. الأربعة في التمنية هتدينا اتنين وتلاتين. وبنضرب الأربعة اللي هي الآحاد في العشرات. يعني الأربعة في تلاتين، هتدينا مية وعشرين. وهنضرب العشرين في التمنية، هتدينا مية وستين. والعشرين هنضربها في تلاتين، هتدينا ستمية. وبتجميع حواصل الضرب الجزئية دي، هنحصل على حاصل الضرب النهائي اللي وصلنا له، اللي هو التسعمية واتناشر.

اتعلّمنا في الدرس ده إزاي نقدر نوجد حاصل ضرب عدد مكوّن من رقمين في عدد مكون من رقمين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.