فيديو: ضرب عدد عشري في عدد عشري آخَر

الميل الواحد يساوي ١٫٦٠٩ كيلومتر تقريبًا. كم كيلومترًا في ٧٫٥ أميال؟

٠٣:٢٢

‏نسخة الفيديو النصية

الميل الواحد يساوي واحد وستمية وتسعة [من ألف] كيلومترًا تقريبًا. كم كيلومترًا في سبعة وخمسة من عشرة أميال؟

مُعطى عندنا إن العلاقة اللي بتربط الميل بالكيلومتر، إن الميل الواحد بيساوي تقريبًا واحد وستمية وتسعة من ألف كيلومتر. يعني معناها لمّا نييجي نحوّل من الأميال إلى ما يكافئها بالكيلومترات، هنضرب عدد الأميال في واحد وستمية وتسعة من ألف.

يعني عشان نقدر نعرف سبعة وخمسة من عشرة أميال، هيكافئوا قدّ إيه بالكيلومترات، هنضرب سبعة وخمسة من عشرة في واحد وستمية وتسعة من ألف.

طب دلوقتي إحنا بنُجري عملية ضرب لعددين عشريين. إزّاي هنقدر نُجري عملية الضرب دي؟ أول خطوة هنتجاهل العلامة العشرية في العددين اللي بنضربهم. ونضربهم كإنهم عددين خاليين من أي علامة عشرية. يعني هنضرب ألف ستمية وتسعة في خمسة وسبعين.

ونبدأ نُجري عملية الضرب بالطريقة العادية. خمسة في تسعة يساوي خمسة وأربعين. خمسة، وهنحتفظ بالأربعة فوق خانة العشرات.

بعد كده هنضرب خمسة في صفر بصفر. ونجمع عليها الأربعة يبقى الناتج هنا أربعة.

بعد كده هنضرب خمسة في ستة بتلاتين. هنحط صفر، والتلاتة هنحتفظ بيها فوق خانة الألوف..

وبعدين نضرب خمسة في واحد هيساوي خمسة. وما ننساش التلاتة اللي فوق دي نجمعها عليها، هيبقى بيساوي تمنية.

هنضرب سبعة في تسعة هيساوي تلاتة وستين. هنكتب التلاتة، والستة هنخليها فوق خانة العشرات.

وبعدين نضرب سبعة في صفر بصفر. وما ننساش نجمع الستة. فيبقى عندنا ستة.

بعد كده نضرب سبعة في ستة هتساوي اتنين وأربعين. هنكتب الاتنين، والأربعة هنكتبها فوق خانة الألوف.

بعد كده نضرب سبعة في واحد يساوي سبعة. وما ننساش نجمع عليها الأربعة دي، فيبقى عندنا حداشر.

دلوقتي نبتدي نجمع. خمسة هتنزل زي ما هي. أربعة زائد تلاتة يساوي سبعة. صفر زائد ستة يساوي ستة. تمنية زائد اتنين يساوي عشرة. صفر، وبعدين هنكتب الواحد هنا. واحد زائد واحد يساوي اتنين. وبعدين الواحد الأخير ده هينزل زي ما هو.

يبقى ده حاصل الضرب اللي حصلنا عليه لمّا استبعدنا العلامات العشرية من العددين اللي بيتمّ ضربهم دلوقتي. هنرجع نشوف مكان العلامة العشرية في كل عدد من العددين اللي كنا بنضربهم. هنبدأ من اليمين هنلاقي إن العلامة العشرية في العدد الأول موجودة بعد رقم واحد من اليمين. أما في العدد التاني فموجودة بعد تلات أرقام من جهة اليمين. ده معناه إن حاصل الضرب، العلامة العشرية هتبقى موجودة بعد أربع أرقام من جهة اليمين، بالشكل ده. يعني هنحط العلامة العشرية هنا. يعني حاصل الضرب هيبقى اتناشر وستمية خمسة وسبعين من عشرة آلاف كيلومتر. هو ده ما يكافئ سبعة وخمسة من عشرة أميال بالكيلومترات.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.