فيديو: الضرب في ١١ و١٢

يوضح الفيديو كيفية الضرب في الأعداد ١١ و١٢ بالاستعانة بالنماذج، وأمثلةً عليها.

٠٥:٤٥

‏نسخة الفيديو النصية

دلوقتي هنتكلّم عن الضرب في العدد حداشر، واتناشر. هنتعلّم إزاي نضرب في العدد حداشر، والعدد اتناشر. هبتدي الشرح بالمثال التالي.

يبيع محل معدات للتصليح في مجموعات. إذا كانت كل مجموعة بتحتوي على حداشر أداة للتصليح، وطلب العميل سبع مجموعات؛ كم عدد أدوات التصليح في السبع مجموعات؟

عشان نجيب عدد أدوات التصليح كلها هنجيب ناتج ضرب سبعة في حداشر. الضرب في حداشر؛ هنلاحظ إن واحد في حداشر هيساوي حداشر. اتنين في حداشر هيساوي اتنين وعشرين. تلاتة في حداشر هيساوي تلاتة وتلاتين. أربعة في حداشر هيساوي أربعة وأربعين. خمسة في حداشر هيساوي خمسة وخمسين. ستة في حداشر هيساوي ستة وستين. وأخيرًا سبعة في حداشر هيساوي سبعة وسبعين.

هنلاحظ إنه عند ضرب أيّ رقم في العدد حداشر ناتج الضرب هو عبارة عن الرقم متكرّر مرتين. يعني خمسة في حداشر الناتج هيكون خمسة وخمسين؛ كرّرنا الخمسة مرتين. ستة في حداشر الناتج هيكون ستة وستين؛ كرّرنا الرقم ستة مرتين. وبالتالي سبعة في حداشر هيكون سبعة وسبعين؛ كرّرنا السبعة مرتين. كمان ممكن نستعمل النماذج عشان نجيب ناتج ضرب سبعة في حداشر. هنكمّل في الصفحة اللي جايّة.

هنستعمل النماذج. هرسم سبع صفوف، في كل صف حداشر قطعة. والحداشر قطعة هقسّمهم لعشر قطع، وقطعة؛ لأنه عشرة زائد واحد هيساوي حداشر. وبكده أقدر أقول إنه سبعة في عشرة هيساوي سبعين، وسبعة في واحد هيساوي سبعة. يعني عشان أجيب ناتج ضرب سبعة في حداشر هيساوي سبعين زائد سبعة. وسبعين زائد سبعة هيساوي سبعة وسبعين، يعني سبعة في حداشر هيساوي سبعة وسبعين. نفس الناتج اللي حصلنا عليه بالطريقة الأولى. وبالتالي يوجد سبعة وسبعين أداة تصليح في السبع مجموعات. هنكمّل في الصفحة اللي جايّة.

مثال: يوجد تمن تفاحات في الصندوق الواحد. إذا كان عدد الصناديق اتناشر، فكم تفاحة في اتناشر صندوق؟

عشان أجيب عدد التفاحات في اتناشر صندوق هجيب حاصل ضرب تمنية في اتناشر. هكوّن تمن مجموعات، في كل مجموعة اتناشر قطعة؛ باستعمال النماذج. كل مجموعة من التمن مجموعات متقسّمة لعشر قطع، وقطعتين؛ لأنه عشرة زائد اتنين هيساوي اتناشر.

وبكده أقدر أقول إنه تمنية في عشرة هيساوي تمانين، وتمنية في اتنين هيساوي ستاشر. يعني أقدر أقول إنه تمنية في اتناشر هيساوي مجموع تمانين وستاشر؛ يعني هيساوي تمانين زائد ستاشر، يعني هيساوي ستة وتسعين. وبكده أقدر أقول إنه يوجد ستة وتسعين تفاحة في اتناشر صندوق. هنكمّل في الصفحة اللي جايّة.

أوجد ناتج ضرب كلٍّ مما يلي. رقم واحد: حداشر في تلاتة.

بما إنه ناتج ضرب أيّ رقم في العدد حداشر هو عبارة عن إني بكرّر الرقم مرتين. إذن بما إنه الرقم هنا تلاتة؛ إذن ناتج الضرب هيكون تلاتة وتلاتين.

بنفس الطريقة حداشر في خمسة هيساوي خمسة وخمسين.

رقم اتنين: اتناشر في اتنين.

هنستعمل النماذج. هرسم مجموعتين، في كل مجموعة اتناشر قطعة. وكل اتناشر قطعة متقسّمة لعشرة، واتنين؛ لأنه عشرة زائد اتنين يساوي اتناشر. وبكده هلاحظ إنه اتنين في عشرة هيساوي عشرين، واتنين في اتنين هيساوي أربعة. إذن اتناشر في اتنين هيساوي عشرين زائد أربعة؛ يعني هيساوي أربعة وعشرين. وبكده أقدر أقول إنه ناتج ضرب اتناشر في اتنين هيساوي أربعة وعشرين.

رقم تلاتة: اتناشر في ستة.

هستعمل النماذج. هرسم ست مجموعات، في كل مجموعة اتناشر قطعة متقسّمة لعشر قطع، وقطعتين؛ لأنه عشرة زائد اتنين هيساوي اتناشر. وبكده أقدر أقول إنه ستة في عشرة هيساوي ستين، وستة في اتنين هيساوي اتناشر. يعني أقدر أستنتج إنه اتناشر في ستة هيساوي ستين زائد اتناشر؛ يعني هيساوي اتنين وسبعين. وبكده ناتج ضرب العدد اتناشر في ستة هيساوي اتنين وسبعين.

وبكده هنكون اتعلّمنا إزاي نجيب ناتج الضرب في العدد حداشر، والعدد اتناشر؛ باستعمال النماذج.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.