فيديو: علاقة القسمة بالضرب

يوضح الفيديو طريقة القسمة عن طريق استخدام العلاقة بين القسمة والضرب، كما يوضح تعريف الحقائق المترابطة.

٠٤:٤٣

‏نسخة الفيديو النصية

هنتكلم عن علاقة القسمة بالضرب. هنتعلم إزاي نقسم باستعمال العلاقة بين القسمة والضرب. هبتدى الشرح بالمثال التالي. تحتوي صينية قطعًا صغيرة من الكيك، مرتّبة في تلات صفوف. في كل صف أربع قطع، زيّ ما هو موضح قدامي. اكتب جملة الضرب، وجملة القسمة المترابطة بها.

في البداية، عشان نكتب جملة الضرب وجملة القسمة، هنستعمل النماذج. هنبتدي بالضرب. هستعمل نموذج مكوّن من تلات صفوف. في كل صف أربع قطع. وبكده أقدر أقول إن جملة الضرب هي: تلاتة في أربعة هيساوي اتناشر. تلاتة عدد الصفوف. أربعة عدد القطع في كل صف. واتناشر العدد الكلي للقطع. تلاتة بتسمى عامل. وأربعة بتسمى عامل. واتناشر بتسمى ناتج الضرب.

تاني حاجة عشان نكتب جملة القسمة، برضو هنستعمل نموذج. النموذج مكوّن من تلات صفوف. في كل صف أربع قطع. وبكده أقدر أقول إن جملة القسمة هي: اتناشر على تلاتة، هيساوي أربعة. اتناشر بتمثّل العدد الكلي للقطع. تلاتة بتمثّل عدد الصفوف. وأربعة عدد القطع في كل صف. اتناشر اسمه المقسوم. تلاتة المقسوم عليه. وأربعة ناتج القسمة. وبكده أقدر أقول إن جمل الضرب والقسمة المترابطة، هي: إنه تلاتة في أربعة هيساوي اتناشر، واتناشر على تلاتة هيساوي أربعة.

هنكمل في الصفحة اللي جاية. هنلاحظ كمان إن مجموعة الحقائق، اللي بنستعمل فيها الأعداد نفسها، بتسمى الحقائق المترابطة. يعني مثلًا لو أنا هكتب الحقائق المترابطة للأعداد: تلاتة، وأربعة، واتناشر. هي: تلاتة في أربعة، هيساوي اتناشر. وأربعة في تلاتة، هيساوي اتناشر. واتناشر على تلاتة، هيساوي أربعة. واتناشر على أربعة، هيساوي تلاتة. لو هكتب الحقائق المترابطة للعددين: سبعة، وتسعة وأربعين. هتكون سبعة في سبعة، هيساوي تسعة وأربعين. وتسعة وأربعين على سبعة، هيساوي سبعة.

هناخد مثال. استعمل الحقائق المترابطة للأعداد: تلاتة، وستة، وتمنتاشر؛ لكتابة جمل الضرب والقسمة الأربعة المترابطة.

في البداية هنستعمل نموذج. هنستعمل نموذج مكوّن من تلات صفوف. في كل صف ست قطع. وبكده أقدر أقول إن الحقائق المترابطة هي: تلاتة في ستة، هيساوي تمنتاشر. وستة في تلاتة، هيساوي تمنتاشر. تمنتاشر على تلاتة، هيساوي ستة. وتمنتاشر على ستة، هيساوي تلاتة. هنلاحظ إن الأعداد: تلاتة، وستة، وتمنتاشر استعملناها في كل جملة عددية.

هنكمل في الصفحة اللي جاية. تدريبات، رقم واحد: استعمل الشبكات لتُكمل الجمل العددية التالية. كام في خمسة هيساوي خمستاشر؟ وكام على تلاتة هيساوي خمسة؟ هستعمل نموذج مكوّن من خمستاشر قطعة. هقسّمه لمجموعات، في كل مجموعة خمس قطع. هلاحظ إني كوّنت تلات مجموعات؛ عشان أحصل على خمستاشر قطعة. إذن تلاتة في خمسة، هيساوي خمستاشر. وخمستاشر على تلاتة، هيساوي خمسة.

رقم اتنين: اكتب الحقائق المترابطة لمجموعة الأعداد التالية: اتنين، وستة، واتناشر. أول حاجة اتنين في ستة، هيساوي اتناشر. وستة في اتنين، هيساوي اتناشر. واتناشر على اتنين، هيساوي ستة. واتناشر على ستة، هيساوي اتنين.

سؤال رقم تلاتة: وزّع أحمد عشرين كرة صغيرة بالتساوي في خمس أكياس. وضّح ذلك بجملة عددية. هستعمل نموذج مكوّن من عشرين قطعة. هبتدي أوزّعهم في خمس مجموعات. وبكده هلاحظ إن في كل مجموعة، أربع قطع. يعني الجملة العددية هي: عشرين على خمسة، هيساوي أربعة. وحقيقة الضرب المرتبطة بها، هي إن خمسة في أربعة، هيساوي عشرين.

وبكده هنكون اتعلّمنا إزاي نقسّم باستعمال العلاقة بين القسمة والضرب. وعرفنا كمان إن مجموعة الحقائق اللي بنستعمل فيها الأعداد نفسها، بتسمى الحقائق المترابطة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.