فيديو: حل المسائل الكلامية التي تتضمن النِّسَب المئوية

تعمل علياء في متجر لبيع الملابس وتنتفع بالتخفيضات المحدَّدة للموظَّفين. إذا دفعت علياء ٤٤٫٨٧ جنيهًا لشراء بنطلون تكلفته ٦٤٫١٠ جنيهًا، فأوجد النسبة المئوية لمقدار التخفيض.

٠٢:٢٨

‏نسخة الفيديو النصية

تعمل علياء في متجر لبيع الملابس، وتنتفع بالتخفيضات المحددة للموظفين. إذا دفعت علياء أربعة وأربعين وسبعة وتمانين من مية جنيهًا لشراء بنطلون تكلفته أربعة وستين وواحد من عشرة جنيهًا، فأوجد النسبة المئوية لمقدار التخفيض.

يعني علياء حصلت على تخفيض عند شراء بنطلون، وكان السعر الأصلي للبنطلون أربعة وستين وواحد من عشرة جنيه، لكن المبلغ اللي دفعته علياء هو أربعة وأربعين وسبعة وتمانين من مية جنيه، فمعنى كده إنه هو ده السعر بعد التخفيض اللي حصلت عليه علياء.

فلو عايزين نوجد النسبة المئوية لمقدار التخفيض، يبقى في الأول خلينا نحسب مقدار التخفيض. فمقدار التخفيض هيساوي السعر الأصلي للبنطلون ناقص السعر بعد الخصم. وزي ما عرفنا إن السعر الأصلي للبنطلون هو أربعة وستين واحد من عشرة جنيه ناقص السعر بعد الخصم، وهنعوّض عنه بأربعة وأربعين وسبعة وتمانين من مية. فعشان نوجد مقدار التخفيض، يبقى هنطرح أربعة وستين وواحد من عشرة ناقص أربعة وأربعين وسبعة وتمانين من مية، فلما هنطرحهم من بعض هيبقى بيساوي تسعتاشر وتلاتة وعشرين من مية جنيهًا.

فكده إحنا عرفنا إيه هو مقدار التخفيض، فلو عايزين نوجد النسبة المئوية لمقدار التخفيض، يعني عايزين نعرف مقدار التخفيض ده نسبته قد إيه من السعر الأصلي للبنطلون، فمعنى كده إن النسبة المئوية لمقدار التخفيض هتساوي مقدار التخفيض اللي هو تسعتاشر وتلاتة وعشرين من مية جنيه، على السعر الأصلي للبنطلون اللي هو أربعة وستين وواحد من عشرة جنيه. وعشان إحنا عايزين نوجد النسبة المئوية لمقدار التخفيض، يبقى هنضرب في مية. فلما هنقسم تسعتاشر وتلاتة وعشرين من مية على أربعة وستين وواحد من عشرة هتساوي تلاتة من عشرة.

بعد كده هنضرب تلاتة من عشرة في مية، فلما نضرب في تلاتة من عشرة في مية، فمعنى كده إننا هنحرك العلامة العشرية مكانين جهة اليمين، فهتبقى بتساوي تلاتين، وهنحط علامة النسبة المئوية؛ فبالتالي هيبقى النسبة المئوية لمقدار التخفيض هو تلاتين في المية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.