فيديو: تحديد الكسور المتكافئة تحت شرط مُعين

ما الكسر الذي يساوي ٣/١ وبسطه أكبر من ٧؟ [أ] ١٨/٦ [ب] ٢١/٧ [ج] ٢٤/٨ [د] ٢٥/٨

٠١:٤١

‏نسخة الفيديو النصية

ما الكسر الذي يساوي واحد على تلاتة وبسطه أكبر من سبعة؟ الاختيار الأول: ستة على تمنتاشر. الاختيار التاني: سبعة على واحد وعشرين. الاختيار التالت: تمنية على أربعة وعشرين. الاختيار الرابع: تمنية على خمسة وعشرين.

دلوقتي إحنا مطلوب مننا كسر يكافئ واحد على تلاتة بسطه أكبر من سبعة. خلّينا نشوف الاختيارات اللي عندنا، هنلاقي إن أول اختيار البسط بتاعه ستة، يعني أقل من سبعة؛ فهنستبعد الاختيار ده. الاختيار التاني البسط بتاعه سبعة، وإحنا بنقول عايزين كسر البسط بتاعه يبقى أكبر من سبعة؛ يبقى برضو هنستبعد الاختيار التاني؛ يبقى باقي عندنا الاختيار التالت والرابع، عايزين نشوف أي كسر فيهم هو اللي بيكافئ واحد على تلاتة.

دلوقتي هنختبر صحة الاختيار التالت، عايزين نتأكد إذا كان تمنية على أربعة وعشرين بيكافئ واحد على تلاتة. دلوقتي التلاتة عشان تصبح أربعة وعشرين، يبقى عملنا لها عملية ضرب في تمنية. عشان يبقى الكسر متكافئ، يبقى لازم إننا نضرب البسط في نفس العدد اللي عملنا له ضرب في المقام، يعني برضو نضرب في تمنية، وفعلًا لو ضربنا واحد في تمنية هيصبح البسط تمنية؛ يبقى كده اتأكّدنا إن تمنية على أربعة وعشرين ده كسر بيكافئ واحد على تلاتة.

لو جينا نختبر الاختيار الرابع ونشوف هل تمنية على خمسة وعشرين بتكافئ واحد على تلاتة، إحنا مش هنلاقي أي عدد لو ضربناه في تلاتة يدّينا خمسة وعشرين؛ وبالتالي مش ممكن كسر مقامه خمسة وعشرين يبقى بيكافئ كسر مقامه تلاتة؛ يبقى الاختيار الرابع ده اختيار خاطئ.

ويبقى الكسر اللي بيساوي أو بيكافئ واحد على تلاتة هو تمنية على أربعة وعشرين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.