فيديو: استخدام جدول الضرب للتحقق من حاصل ضرب الأعداد الفردية والزوجية

في جدول الضرب الموضَّح، لوَّنت أميرة حاصل ضرب الأعداد الزوجية جميعها باللون الأزرق وحاصل ضرب الأعداد الفردية جميعها باللون الأخضر. ابحث عن أنماط في الجدول لتحديد هل حاصل الضرب التالي زوجي أم فردي. ٤ × ٣، ٥ × ٦، ٩ × ٧، ١٧ × ٨، ٢٢ × ٢٨.

٠٣:١٥

‏نسخة الفيديو النصية

في جدول الضرب الموضَّح، لوَّنت أميرة حاصل ضرب الأعداد الزوجية جميعها، باللون الأزرق. وحاصل ضرب الأعداد الفردية جميعها، باللون الأخضر. ابحث عن أنماط في الجدول، لتحديد هل حاصل الضرب التالي زوجي أم فردي.

والسؤال ده مكوّن من خمس أسئلة. السؤال الأول: حاصل ضرب أربعة في تلاتة. والسؤال التاني: حاصل ضرب خمسة في ستة. السؤال التالت: حاصل ضرب تسعة في سبعة. أمّا السؤال الرابع، فهو: حاصل ضرب سبعتاشر في تمنية. والسؤال الخامس: حاصل ضرب اتنين وعشرين في تمنية وعشرين. ودلوقتي عايزين نعرف هل حاصل الضرب لكل سؤال زوجي ولّا فردي.

أول سؤال هو حاصل ضرب أربعة في تلاتة. أربعة عدد زوجي، وتلاتة عدد فردي. علشان نعرف نجاوب، هنبُص الأول في الجدول، ونشوف النمط اللي شبهه. يعني عايزين نشوف حاصل ضرب عدد زوجي، في عدد فردي، هيكون الناتج إيه. لو مثلًا اختارنا الاتنين على إنها عدد زوجي، واخترنا التلاتة على إنها عدد فردي؛ هيكون الناتج هو ستة. وستة عدد زوجي. معنى كده إنه حاصل ضرب العدد الزوجي في العدد الفردي، بيساوي عدد زوجي.

وتاني سؤال: حاصل ضرب خمسة في ستة. خمسة هو عدد فردي، وستة هو عدد زوجي. برضو زيّ السؤال اللي قبله، زوجي في فردي، هيساوي عدد زوجي. وبالتالي هتكون الإجابة هي زوجي.

والسؤال التالت: حاصل ضرب تسعة في سبعة. تسعة عدد فردي، وسبعة برضو عدد فردي. هنشوف في الجدول النمط اللي فيه عدد فردي وعدد فردي، حاصل ضربهم هيكون إيه. عندنا مثلًا تلاتة عدد فردي، لو ضربناها في تلاتة؛ هيكون الناتج تسعة. وتسعة عدد فردي. معنى كده إنه حاصل ضرب فردي في فردي، يساوي فردي.

في السؤال الرابع: حاصل ضرب سبعتاشر في تمنية. عايزين نعرف هيكون زوجي ولّا فردي. سبعتاشر هو عدد فردي، وتمنية عدد زوجي. وبالتالي هيكون حاصل الضرب، زيّ ما اتفقنا في أول سؤال، هيكون عدد زوجي.

والسؤال الخامس: حاصل ضرب اتنين وعشرين، في تمنية وعشرين. اتنين وعشرين عدد زوجي، وتمنية وعشرين برضو عدد زوجي. عايزين نعرف حاصل ضرب عدد زوجي، في عدد زوجي، هيكون عدد زوجي ولّا فردي. هنبُص في الجدول، هنشوف مثلًا العدد أربعة. العدد أربعة عدد زوجي، لو ضربناه في أربعة برضو، هو عدد زوجي؛ هيكون الناتج العدد ستاشر. فهنلاقي إن العدد ستاشر عدد زوجي برضو. وبالتالي زوجي في زوجي، يساوي زوجي. وبالتالي هتكون إجابة السؤال الخامس، هي برضو عدد زوجي.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.