فيديو: إيجاد أكبر عدد صحيح وفقًا لشرط مُعطى

ما أكبر عدد صحيح إذا قُرِّب إلى أقرب عشرة آلاف يكون الناتج ٩‎٨٩٠‎٠٠٠؟

٠٣:٠٢

‏نسخة الفيديو النصية

ما أكبر عدد صحيح إذا قُرِّب إلى أقرب عشرة آلاف يكون الناتج تسعة مليون تمنمية وتسعين ألف.

دلوقتي إحنا عايزين نشوف أكبر عدد صحيح لمَّا نقرّبه إلى أقرب عشرة آلاف هيدِّينا الناتج ده: تسعة مليون تمنمية وتسعين ألف. دلوقتي دي الخانة الخاصة بعشرات الألوف، يعني الخانة اللي فيها الرقم اللي هنقرّب ليه. دلوقتي عايزين نفكَّر عشان نحصل على العدد اللي عندنا ده، ويكون هو الناتج بعد التقريب لأقرب عشرة آلاف. يبقى فيه احتمال من الاحتمالين؛ يا إمَّا إن خانة عشرات الألوف كان فيها الرقم تمنية، والخانة اللي على يمينها، اللي هي خانة الألوف، كان فيها رقم من خمسة فأكثر. في الحالة دي، ده هيخلِّي الرقم اللي في خانة عشرات الألوف بعد التقريب يوصل لتسعة. وكده كده كل الأرقام اللي على يمينه، أيًّا كان فيها إيه، هتتحوِّل لأصفار.

بس إحنا عايزين أكبر عدد صحيح بعد التقريب يدِّينا العدد اللي فوق ده. يبقى بالطريقة اللي بنفكّر بيها دي، أكبر أرقام ينفع نحطّها في الخانات التالية كلها تسعات. يبقى بافتراض إن خانة عشرات الألوف فيها الرقم تمنية، فده هيبقى أكبر عدد بعد التقريب يدِّينا الناتج اللي فوق ده.

طب خلِّينا نشوف إيه الافتراض التاني. الافتراض التاني إن خانة عشرات الألوف يبقى فيها أصلًا الرقم تسعة. أمَّا على يمينه، فرقم أقلّ من خمسة، يعني أكبر رقم ينفع نحطّه هنا هيبقى أربعة. عشان لو كان خمسة أو أكتر كان هيزوِّد لنا الرقم اللي هو تسعة ده بمقدار واحد. فكده هنتخطَّى الناتج اللي المفروض نحصل عليه بعد التقريب. أمَّا بقية الخانات، فهنحطّ فيها كلها الرقم تسعة. وده هيبقى أكبر عدد نحصل عليه باستخدام التقريب للأقل، بحيث إن هو يدِّينا في الآخر الناتج اللي فوق ده بعد التقريب.

طب إحنا مطلوب منّنا في السؤال أكبر عدد صحيح بعد التقريب لأقرب عشرة آلاف يدّينا العدد اللي معطى عندنا ده. فيبقى هنقارن العددين اللي إحنا وصلنا لهم، ونشوف أيُّهم أكبر. هنلاقي إن في خانة الملايين العددين فيهم الرقم تسعة، يعني متساويين في الخانة دي. وفي خانة مئات الألوف، العددين فيهم الرقم تمنية. أمَّا في خانة عشرات الألوف، فالعدد اللي فوق فيه الرقم تمنية، والعدد اللي تحت فيه الرقم تسعة. وطبعًا تسعة أكبر من تمنية. وده معناه إن العدد التاني هو العدد الأكبر.

وكده يبقى قدرنا نستنتج إن العدد تسعة مليون وتمنمية أربعة وتسعين ألف وتسعمية تسعة وتسعين هو أكبر عدد صحيح. إذا قُرِّب إلى أقرب عشرة آلاف يكون الناتج تسعة مليون وتمنمية وتسعين ألف.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.