فيديو: امتحان الديناميكا للعام السابق • ٢٠١٨/٢٠١٧ • السؤال السادس

امتحان الديناميكا للعام السابق • ٢٠١٨/٢٠١٧ • السؤال السادس

٠٣:٤٥

‏نسخة الفيديو النصية

كرة كتلتها واحد كيلوجرام. سقطت رأسيًّا على سطح أفقي صلب. مقدار دفع الكرة على السطح اتناشر نيوتن ثانية. وزمن التلامس بينهما واحد من عشرة ثانية. أوجد مقدار ردّ فعل السطح على الكرة بالنيوتن.

في البداية، مُعطى عندنا مقدار دفع الكرة على السطح، واللي بيساوي اتناشر نيوتن ثانية. ومُعطى عندنا زمن التلامس، واللي هو واحد من عشرة ثانية. والمطلوب إننا نوجد مقدار ردّ فعل السطح على الكرة بالنيوتن. ومقدار الدفع بيبقى عبارة عن حاصل ضرب مقدار القوة في الزمن. وبنرمز للدفع بالرمز د، وبنرمز للقوة بالرمز ق، وبنرمز للزمن بالرمز ن. فبالتالي هيبقى د بيساوي ق ن. ومُعطى عندنا في السؤال مقدار الدفع. ومُعطى عندنا زمن التلامس. فيبقى عايزين نوجد مقدار القوة.

فهيبقى عندنا اتناشر، اللي هو مقدار الدفع، بيساوي ق، اللي هو مقدار القوة، في واحد من عشرة، اللي هو زمن التلامس اللي معطى عندنا في السؤال. وعشان نقدر نوجد ق، يبقى هنقسم طرفَي المعادلة على واحد من عشرة. فهتبقى عندنا ق بتساوي اتناشر على واحد من عشرة. ولمَّا نحسبها هتبقى بتساوي مية وعشرين. وبما إننا بنوجد مقدار القوة، فتبقى الوحدة بالنيوتن. فهيبقى مقدار القوة بيساوي مية وعشرين نيوتن.

لكن المطلوب في السؤال إننا نوجد مقدار ردّ فعل السطح على الكرة. وهنلاحظ أيضًا من السؤال إن الكرة اللي عندنا سقطت رأسيًّا على سطح أفقي صلب. وخلِّينا نعرف إنه عند سقوط كرة وزنها و رأسيًّا على سطح أفقي صلب. فإنه عند لحظة التلامس يكون ردّ فعل السطح على الكرة بيساوي ضغط الكرة على السطح.

ولو جينا نشوف الكرة اللي عندنا، واللي هتبقى بالشكل ده مثلًا. وهنفرض إن هو ده السطح الأفقي الصلب. فزيّ ما عرفنا إنه عند لحظة التلامس هيكون ردّ فعل السطح على الكرة بيساوي ضغط الكرة على السطح. فلما نيجي نشوف ضغط الكرة عَ السطح، هيبقى أول حاجة عندنا … فيبقى عندنا تأثير وزن الكرة على السطح، واللي بنرمز له بالرمز و. وتاني حاجة هي مقدار القوة، واللي بنرمز له بالرمز ق. وأمَّا في الاتجاه المعاكس، فهيبقى عندنا ردّ فعل السطح على الكرة، واللي بنرمز له بالرمز ر.

بعد كده خلِّينا نفرض إن الاتجاه ده هو الاتجاه الموجب للحركة. فبالتالي هيبقى ردّ فعل السطح على الكرة، واللي بنرمز له بالرمز ر. وهيبقى بيساوي ضغط الكرة على السطح، واللي هو ق زائد و. وزيّ ما عرفنا إن و هو وزن الكرة، لكن المُعطى عندنا في السؤال إن الكرة كتلتها واحد كيلوجرام. فبالتالي عشان نوجد وزن الكرة، يبقى هنضرب الكتلة في تسعة وتمنية من عشرة. فبالتالي هتبقى و بتساوي واحد في تسعة وتمنية من عشرة. واللي هتساوي … واللي هتساوي تسعة وتمنية من عشرة. وأمَّا الوحدة، فهتبقى بالنيوتن. وبالتالي هيبقى وزن الكرة هو تسعة وتمنية من عشرة نيوتن.

وبالتالي هيبقى ردّ فعل السطح على الكرة بيساوي ق زائد و. فهنعوَّض عن ق بمية وعشرين نيوتن، وهنعوَّض عن و بتسعة وتمنية من عشرة نيوتن. فلما نحسب مية وعشرين زائد تسعة وتمنية من عشرة، هتبقى بتساوي مية تسعة وعشرين وتمنية من عشرة. وأمَّا الوحدة فهتبقى بالنيوتن. فبالتالي هيبقى مقدار ردّ فعل السطح على الكرة بيساوي مية تسعة وعشرين وتمنية من عشرة نيوتن. وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.