فيديو: ضرب عدد عشري في عدد عشري آخَر

احسب ١٣٫٦ × ٦٫٣.

٠٤:٤٧

‏نسخة الفيديو النصية

احسب تلتاشر وستة من عشرة في ستة وتلاتة من عشرة.

وعشان نضرب الأعداد العشرية، أول حاجة بنعملها إننا بنتجاهل العلامة العشرية في العددين، وبعد كده بنعمل عملية الضرب عادي، فكأننا هنضرب مية ستة وتلاتين في تلاتة وستين.

فهنبدأ الضرب الأول بإننا نضرب تلاتة في مية ستة وتلاتين، وبنكتب الإجابة هنا. بعد كده هنضرب ستة في مية ستة وتلاتين، وهنكتب الإجابة هنا. بعد كده هنجمع الإجابتين دول مع بعض، فهيبقى مجموع الإجابتين هو حاصل ضرب مية ستة وتلاتين في تلاتة وستين.

فهنبدأ نضرب تلاتة في مية ستة وتلاتين؛ فهنضرب الأول تلاتة في ستة بتساوي تمنتاشر، بعد كده هنيجي عند واحد هنا اللي موجود في خانة العشرات وهنكتبه فوق عند خانة العشرات. بعد كده هنضرب تلاتة في تلاتة وحاصل الضرب هنجمع عليه واحد، فتلاتة في تلاتة بتساوي تسعة، وهنجمع عليها واحد فهتبقى عشرة.

وبنفس الطريقة هنكتب الواحد هنا اللي موجود في خانة المئات فوق خانة المئات، فهيبقى مكتوب فوق واحد. بعد كده هنضرب تلاتة في واحد، فتلاتة في واحد بتساوي تلاتة، وبعد كده هنجمع عليهم الواحد، فتلاتة زائد واحد بتساوي أربعة؛ وكده إحنا ضربنا تلاتة في مية ستة وتلاتين.

بعد كده هنضرب ستة في مية ستة وتلاتين، وناخد بالنا من حاجة مهمة؛ إن الرقم ستة هنا موجود في خانة العشرات، فمعنى كده إن هو قيمته ست عشرات، يعني ستين؛ وبالتالي لما هنيجي نضرب ستة في مية ستة وتلاتين هتبقى الإجابة مضروبة في عشرة؛ فمعنى كده إننا لازم نحط صفر في أول الإجابة، وبعد كده نبدأ نوجد حاصل ضرب ستة في مية ستة وتلاتين.

فهنبدأ الأول نضرب ستة في ستة واللي بتساوي ستة وتلاتين، وبنفس الطريقة التلاتة اللي موجودة هنا هنكتبها فوق الخانة اللي بعدها، يعني هنكتبها فوق تلاتة. بعد كده هنضرب ستة في تلاتة واللي بتساوي تمنتاشر، لكن فيه عندنا تلاتة مكتوبة فوق، فهنجمعها على تمنتاشر، فهتبقى تمنتاشر زائد تلاتة بتساوي واحد وعشرين. بعد كده هنيجي عند اتنين هنا وهنكتبها فوق الخانة اللي بعدها، يعني فوق واحد. وبعد كده هنضرب ستة في واحد، وهنجمع عليها اتنين، فستة في واحد بتساوي ستة، زائد اتنين بتساوي تمنية.

وآخر خطوة هي إننا نجمع الإجابتين دول مع بعض، وهيبقى مجموعهم هو حاصل ضرب مية ستة وتلاتين في تلاتة وستين. فهنبدأ نجمع تمنية زائد صفر بتساوي تمنية، وصفر زائد ستة يساوي ستة، وأربعة زائد واحد بتساوي خمسة، وبعد كده تمنية هتنزل زي ما هي؛ فهيبقى هو ده حاصل الضرب عندنا، تمن تلاف خمسمية تمنية وستين هو حاصل ضرب مية ستة وتلاتين في تلاتة وستين.

لكن نفتكر إن إحنا أصلًا كنا عايزين نوجد حاصل ضرب تلتاشر وستة من عشرة في ستة وتلاتة من عشرة، فهنبدأ دلوقتي نحط العلامة العشرية. وعشان نحط العلامة العشرية، فهنحسب عدد الأماكن العشرية في العوامل المضروبة؛ فعندنا هنا مكان واحد، وهنا مكان واحد؛ فمعنى كده إن مكان العلامة العشرية في حاصل الضرب بيساوي مجموع عدد الأماكن العشرية في العوامل المضروبة، يعني هنشوف مجموع الأماكن العشرية هنا وهنا. فعندنا هنا مكان واحد، وهنا مكان واحد، فبالتالي هيبقى مجموع الأماكن العشرية في العوامل اتنين؛ فهنيجي عند حاصل الضرب ونحط العلامة العشرية بعد مكانين من اليمين، فهيبقى ده أول مكان، وده تاني مكان؛ فمعنى كده إننا نحط العلامة العشرية هنا.

فبالتالي هيبقى حاصل ضرب تلتاشر وستة من عشرة في ستة وتلاتة من عشرة هو خمسة وتمانين وتمنية وستين من مية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.